Edinborgarblogg

Af sætum stelpum og sætari!

2006-05-29T22:47:00.000Z

"Maður getur ekki alltaf farið heim með sætustu stelpunni"

sagði Geir Haarde fyrir ekki alllöngu.

Aaaauuuuuuminginn hann Ólafur frjálslyndi. Hann hélt í allan gærdag að hann væri sætasta stelpan og yrði fyrir valinu. Það var náttúrlega gjörsamlega útilokað mál að ætla að treysta á Ólaf og Frjálslynda til að halda uppi meirihlutanum. Nokkurn veginn eins og að velja sér að keyra með tímasprengju í skottinu næstu fjögur árin og vita aldrei hvað væri langt í það að hún spryngi.

Villi talaði við alla en munurinn var sá að Frjálslyndir voru svo ákafir að þeir láku öllu í fjölmiðla til að sýna að nú væru þeir sæta stelpan á hraðri leið í bólið með stóru strákunum. Voru svolítið eins og pínulitlu stelpurnar sem eru í búðaleik og svo verður alveg rosalega mikið að gera allt í einu í búðinni og þær vita ekki alveg í hvorn fótinn þær eiga að stíga en eru rosalega stolltar yfir fínu búðinni sinni. Sætt!

Villi valdi hins vegar öruggu leiðina og tók Björn og Framsókn. Það ætti að tryggja tiltölulega góða sátt milli ríkis og borgar næsta árið alla vega. Verður fróðlegt að sjá. Held hins vegar að Villi eigi eftir að verða hinn ágætasti borgarstjóri. Hann er reynslubolti og er með hóp af mjög spræku fólki með sér sem ég held að geti gert góða hluti.

Annað sem var athyglisvert við þessar kosningar var að Svandís Svavars kom nokkuð sterk og fersk inn. Árni sást ekki í eitt einasta skipti í baráttunni enda orðinn hálfrykfallinn. Í Svandísi er pottþétt um að ræða framtíðarleiðtogaefni Vinstri grænna og má Kata litla varaformaður nú heldur betur fara að vara sig.

Það hefði líka verið athyglisvert ef Framsókn hefði dottið alveg út í Reykjavík. Hvað hefði þá gerst? Hefði flokkurinn alveg þurrkast út? Nei, líklega ekki. Þeir hafa t.d. ekki verið með mann inni í Hafnarfirði lengi og hafa ekki boðið fram formlega í Reykjavík lengi heldur.

Ég held að vandamál Framsóknar sé að sérstaða þeirra hefur gufað upp á markaði. Sjallarnir voru hægri og hinir voru vinstri. Framsókn var í miðjunni og gaf sig út fyrir að taka það besta frá báðum. Núna eru hins vegar bæði Sjallarnir og Samfylkingarfólkið komin inn á miðjuna og varla hægt að heyra muninn á þeirra málflutningi þannig að Framsókn hefur enga sérstöðu lengur. Lendir bara sem álegg á milli Sjallanna og Samfylkingarinnar. Það verður athyglisvert að sjá hvort þeir lifa það af.

X-Skátakórinn - Tónleikar 27. maí - Queen, Bee Gees, Bítlarnir o.fl. o.fl.

2006-05-20T18:12:00.000Z

Það verða frábærir tónleikar hjá Skátakórnum í Hafnarfjarðarleikhúsinu (við hliðina á Fjörukránni í Hafnarfirði) á kosningadaginn 27. maí kl. 17.

Dagskráin er fjölbreytt, óhefðbundin, hress og skemmtileg eins og okkur er einum lagið:

Nokkur dæmi:

California Dreaming (Mamas and the Papas)Proud Mary (Creedence Clearwater Revival - CCR)
You Have got a Friend
Take Me Home Country Road (John Denver)
Here There and Everywhere (The Beatles)
Imagine (The Beatles)
Putt'in on the Ritz
Money Money Money (Abba)Bohemian Raphsody (Queen)
Tragedy (Bee Gees)

Hlakka til að sjá ykkur á laugardaginn!!!

Til hamingju Ísland!

2006-05-08T17:50:00.000Z

Gleðilegt sumar annars...loksins orðið heitt, og þá meina ég mjög heitt.

Hjóluðum upp Fossvogsdalinn og Elliðaárdalinn í gær. Það var sannkölluð sumarstemning í Elliðaárdalnum, tugir barna á víð og dreif út um alla á að leika sér og busla. Fjölskyldur út um allt í lautarferð. Rosalega gaman að sjá hvað Reykvíkingar eru orðnir duglegir að vera úti með börnunum sínum að njóta lífsins án þess að það kosti tugi þúsunda. Til hamingju Ísland!

Franskar konur fitna ekki!

2006-05-08T17:29:00.000Z

Hvað er í gangi?

Fórum niður í Smáralind fyrir nokkrum dögum og í bókabúðina Eymundsson. Þar blasti við okkur metsölulistinn og viti menn; í öðru sæti yfir mest seldu bækur á Íslandi er metsölubókin "Franskar konur fitna ekki". Hvernig stendur á þessu?

Hvernig stendur á því að mörg þúsund konur láta plata sig til að kaupa svona bók? "Franskar konur fitna ekki"! Maður þarf ekki annað en að ganga eftir götum Parísarborgar til að sjá að þær fitna alveg jafnt og aðra konur. Getur reyndar verið að þær fitni ekki eins og BANDARÍSKAR konur en hei, hver gerir það...aðrir en kannski bandarískir karlar.

Það er skelfilegt að hægt sé að selja svona bækur í þúsundavís fólki sem heldur að þær muni bjarga því. Hvað er til ráða? Ég veit það ekki. Kannski hnattræn sjálfstyrkingarherferð fyrir konur! Get reyndar ekki hreykt mér af því að vera duglegur að fara í ræktina en geri mér grein fyrir að ég breyti því ekki með svona cheap sjálfstyrkingarbók.

Gleðilegt sumar!!!

2006-04-21T00:36:00.000Z

Já, gleðilegt sumar gott fólk! Alltaf skemmtilegt þegar sumardagurinn fyrsti gengur í garð. Skítt með veðrið en frá þeim degi telja Íslendingar sér trú um að komið sé sumar. Þeim líður betur, þeir brosa meira og almennt eru glaðari en fyrir þennan mikla dag.

Þetta er að sjálfsögðu frábært. Söng með Skátakórnum í Hallgrímskirkju í morgun. Söngurinn hitti einn öldunginn svo í hjartastað að hann fór af svæðinu með sjúkrabíl. Dagur Eggerts frambjóðandi sýndi læknataktana og þegar ég ræddi við hann á eftir sagðist hann vera svolítið í þessu í kirkjum, þ.e. að bjarga þeim sem skaparinn ýtir full mikið við. Já, sprækur strákur Dagur.

Eftir messu lögðum við skötuhjúin okkur en fórum síðan í göngutúr þegar líða tók á daginn. Þrömmuðum yfir í Nauthólsvík og var markmiðið að fá sér köku á Nauthól. Þar var hins vegar lokað vegna viðgerða og héldum við því áfram niður í bæ. Fengum okkur að snæða á Thorvaldsens-bar sem við höfum aldrei gert áður og stóðu þeir sig með prýði. Röltum síðan heim. Þetta teljast líklega á bilinu 5 - 10 km sem er ágætisframmistaða. Það er orðin næstum því regla að þegar við förum eitthvað út að ganga þá endum við nautnafólkið inni á einhverjum veitingastað og borðum til baka kaloríurnar sem við mögulega hefðum getað misst á göngunni. Maður verður að eiga forða þegar fuglaflensan kemur í hús!

Náði þeim merka áfanga á þriðjudaginn að verða Dirty-Too, þ.e. þrjátíuogtveggjaára. Þetta gat hann strákurinn! Þetta var brjálaður dagur alveg frá níu um m0rguninn til tíu um kvöldið en ég stal samt hléi í hádeginu þegar Inga bauð mér á Enricos á Laugaveginum. Mjög góður matur og notaleg stemning.

Hlustaði áðan á nýtt lag með Guðmundi Jónssyni Sálargítarista en það mun enda á disknum Óður til lífsins sem ég er að aðstoða MND-félagið við að gefa út. Flott lag sem mun sóma sér vel á disknum.

Allt brjálað að gera í kjarasamningunum. Vonandi kemst þetta eitthvað áfram í næstu viku. Það verður æðislegt þegar þetta brölt er búið og hægt að fara að gera eitthvað meira skapandi. ALDREI skal ég sækja um vinnu hjá verkalýðsfélagi við kjarasamningagerð. Með leiðinlegri verkefnum sem ég hef lent í þar sem þetta er orðið svo langt og erfitt ferli. 5 mánuðir hafa liðið og við að einhverju endalausu nuddi. Nú er þetta vonandi að komast í hús - vonandi.

Tek grunnprófið í söng og tónheyrn líklega 1. maí og í tónfræðinni líklega 5. maí. Vonum það besta...eins gott að fara að læra heima...

Kominn frá Kastró

2006-04-14T03:43:00.000Z

Sæl verið þið!

Blogg númer tvö á árinu!!!! Strákurinn alveg að standa sig! Hey...það er nú bara april!

Síðustu mánuðir hafa snúist með hraðasta móti eins og venjulega. Brjálað að gera í vinnunni. Hef verið á kafi í því að vera reiknimeistari OR í tengslum við kjarasamninga undanfarna tvo mánuði eða svo og lítið geta gert annað. Þetta gengur út á að leika sér í Excel og velta fyrir sér hvað vinnufélagarnir eigi nú að fá í laun næstu árin án þess að kostnaðurinn fari úr böndunum. Athyglisverð aðstaða að vinna við að reyna að koma í veg fyrir að vinir manns fái of mikla launahækkun. Merkilegt að maður skuli þó ekki vera óvinsælli en raun ber vitni.

Kristófer kom í heimsókn til okkar í febrúar í eina viku á meðan hann var í vetrarfríi. Hann eignaðist litla systur í byrjun febrúar og er að sjálfsögðu duglegasti bróðir í heimi. Þar sem við Inga vorum að byrja saman um það leyti sem hann fór út í fyrrasumar þá höfðu þau aldrei sést fyrr. Hlýnaði manni heldur betur um hjartaræturnar þegar við sóttum hann út á Keflavíkurflugvöll því við vorum varla komin í gegnum Keflavík þegar þau voru farin að spjalla eins og þú hefðu þekkst alla ævi. Vikan var frábær og tengslin milli þeirra styrktust með hverjum deginum. Mitt frábæra fólk hjá OR reyndu eins og þau gátu að gefa mér frí þessa viku og vann ég bara heima snemma á morgnana og seint á kvöldin auk þess að mæta á nokkra fundi. Prinsinn varð síðan 8 ára núna 30. mars. Time flies when you're having fun!!!

Hvað tónlistina varðar er ég á fullu í Söngskólanum þótt ég hafi ekki náð að sinna því sem skyldi undanfarinn mánuð eða svo út af vinnunni. Skylst að ég fari í grunnprófið 1. maí og tek þá 1.-3. stig í söng og um svipað leyti 3. stigið í tónfræði svo eitthvað sé nefnt. Lifi það vonandi af.

Í Skátakórnum er ég að leika formann og erum við með skemmtilegasta prógram ever. Syngjandi Tragedy með Bee Gees, Bohemian Raphsody með Queen og fleira skemmtilegt. Tónleikarnir verða 27. maí og verða örugglega frábærir.

Þá er ég aðallega í tveimur verkefnum þessa dagana: Annars vegar hluti af RAP-hópi Bandalags íslenskra skáta ásamt fjórum snillingum og erum við að vinna í því risavaxna verkefni að endurskoða dagskrárgrunn skátastarfs í landinu (nokkurs konar námsskrá). Því mun svo fylgja endurskoðun á öllu stuðningsefni, merkjum, búningum, námskeiðum o.s.frv. þannig að um er að ræða heildarendurskoðun á sviði dagskrármála. Mjög spennandi verkefni.

Hitt verkefnið er að ég leiði fyrir hönd MND-félagsins vinnu við geisladisk sem kemur út í sumar áfastur glæsilegri bók þar sem forsetinn skrifar inngangsorð. Um er að ræða styrktarverkefni fyrir MND-félagið þar sem við fengum fjölda málverka og ljóða frá þekktum listamönnum, tókum mynd af málverkunum og munum setja þau inn í bók ásamt ljóðunum. Buðum loks upp málverkin um daginn og rann ágóðinn, á þriðju milljón, til MND-félagsins. Verkefnið hefur vinnuheitið Ljóð í sjóð og verður yfirskrift bókarinnar “Við veljum lífið” og disksins “Óður til lífsins”. Jón Ólafsson framleiðir fyrir okkur diskinn og er okkur innan handar. Á diskinn erum við búin að fá listamenn eins og Hörð Torfason, Sálina hans Jóns míns, Ragnheiði Gröndal, Pál Óskar og Móniku, Rúnar Júlíusson og fleiri snillinga. Síðast í kvöld heyrði ég í Guðmundi Jónssyni úr Sálinni sem bauð okkur lag með sér tileinkað Rabba heitnum og þáði ég það með þökkum. Það er svo mikið af góðu fólki til í heiminum.

Í janúar fór ég til Svíþjóðar á Oracle-ráðstefnu með vinnunni. Mjög fín ráðstefna sem við fengum mikið út úr. Leigði bíl og kíkti í heimsókn til Árna, Guðbjargar og Lilju í Skövde. Glæsilegur túr og gott að hitta þau.

Núna 4. apríl var síðan komið að stóru ferðinni. Við skötuhjúin skelltum okkur til Kúbu. Draumaferðin sem ég hef verið að bíða eftir undanfarin fjögur til fimm ár. Kúba hefur verið efst á listanum þar sem mér fannst ég verða að komast þangað áður en Kastró karlinn geispar golunni. Ferðin stóð algerlega undir væntingum og var frábær frá upphafi til enda. Okkur tókst að gera allt sem við ætluðum að gera nema að dansa salsa á kúbverskum salsastað með fullt af Kúbverjum. Það voru þrumur og eldingar síðasta kvöldið þegar við ætluðum loks að láta verða af því og þess vegna fundum við ekki staðinn enda örugglega enginn þar á mánudagskvöldi í þrumuveðri. Skelltum okkur í dansskóla í vetur og höfum því æft stíft. :) Tökum þetta næst með trompi!!!

Vorum þarna úti ásamt pabba og mömmu sem verða viku í viðbót...eru farin að sækja svolítið í sig veðrið þau gömlu!

Jæja, úps...klukkan orðin fjögur og ég ætla að vakna klukkan hálf tíu til að skella mér til tengdó á Akureyri um páskana og á skíði. Hlakka til að komast norður. Stefni að því að það líði styttra á milli bloga næst. Hef ákveðið að stefna að því að skrifa a.m.k. einu sinni í viku. Kemur í ljós hvernig það gengur....

Sigginn

Ps. Settum upp hrikalega flotta klukku í eldhúsinu í dag. Erum búin að bíða eftir þessari klukku í nokkra mánuði. Fannst allar hinar ljótar og ákváðum að bíða eftir þessari. Glæsileg! Allir velkomnir á Miklubrautina til að skoða gripinn!

Gleðilegt ár!!!

2006-01-03T17:42:00.000Z

Gleðilegt ár kæru vinir!!!

Er Guð til eða ekki?

2005-11-28T09:13:00.000Z

Ég fékk póst frá Úlfari Viktori, 12 ára systursyni mínum. Hann hafði fengið tölvupóst og lesið þar sem einhver hafði sest niður og rökstutt það að Guð væri ekki til. Úlfar hafði lesið þetta yfir og fannst þetta bara meika nokkuð góðan sens. Svo góðan að hann sendi þetta á nánustu fjölskyldu og fjölmarga vini sína sem líklega eru á svipuðum aldri og hann.

Þegar ég las þetta fannst mér þarna vera á ferðinni nokkuð alvarlegt mál. Þarna var komin fram ein skoðun sem gat haft mikil áhrif á gildismat barnanna og þeirri spurningu hvort Guð væri til. Mér fannst því mikilvægt að hann fengi úr einhverju meiru að moða áður en hann myndaði sér skoðun. Það heitir víst að ráðast ekki á garðinn þar sem hann er lægstur að setjast niður og rökstyðja af hverju Guð sé til. Ég lét samt vaða og þar sem maður tekst ekki á við slíkar grundvallarspurningar á hverjum degi smelli ég bæði bréfinu sem var upphafið af þessu öllu saman hingað inn í bloggið mitt og þar fyrir neðan svarinu mínu.

Þetta bréf veitir okkur kannski svolitla innsýn inn í það hversu flókið það er að vera 12 ára núna á tímum internets og endalauss flæðis upplýsinga sem vilja hafa áhrif á mann og á það hvað manni eigi að finnast um lífið og tilveruna. Þetta sýnir líka hversu mikilvægt það er að ræða alvöru mál við börn vegna þess að þau eru svo sannarlega að spá í alvörumálum en ekki bara tölvuleikjum og tísku.

Frá Úlfari...

#####################################

LESIÐ ÞETTA!!!!

veistu!.. þegar ég fór að lesa þetta fyrir neðan byrjaði ég aðeins að hugsa.. er Guð ekki bara plat?.. hvað getur fólk sagt að hann sé til ef það getur hvort eð er ekki snert hann né séð hann???.. lestu þetta og prufaðu svo að velta vöngum fyrir þér..??

kv.Úlfar

---------------------------------------------------------------------------------

Hæ, ég er kallaður Nonni!

Ég er 8 ára. Ég trúi ekki á Guð.

Ég veit að margir krakkar trúa á Guð. En mörg þeirra þora ekki að segja að þau trúi ekki á Guð því þá verða þau skömmuð.

Í mínum bekk er ég sá eini sem þori að viðurkenna að ég trúi ekki á Guð.

Þegar ég var 6 ára þá trúði ég á Guð. Það var af því að kennarinn og allir krakkarnir sem ég þekki sögðu að hann væri til. Þá vissi ég ekki að hann var bara í þykjustunni. Þá hugsaði ég ekki sjálfur um Guð heldur trúði bara því sem allir sögðu. Mér var sagt að ég ætti að trúa þótt enginn gæti sýnt mér að Guð væri til. Mér var sagt að ég ætti bara að trúa, því þá sýndi ég Guði að ég væri góður.

Það er eins og að ljúga að sjálfum sér.

Pabbi og mamma trúa ekki á Guð en þau segja að ég verði sjálfur að hugsa um Guð og ákveða hvort ég vill trúa á hann.

Og það var einmitt það sem ég gerði og nú skal ég segja þér hvað gerðist.

Fyrst fór ég að hugsa um hvernig við getum vitað hvort Guð er til eða ekki. Til að vita hvort eitthvað er til er best að geta snert það og séð. En það er ekki hægt að snerta eða sjá Guð.
Þeir sem trúa á Guð segja að hann sé ósýnilegur og ekki hægt að snerta hann. Hvernig vita þeir þá að hann er til?

Þegar ég var í sex ára bekk þá trúðum við krakkarnir öll á ósýnilega álfa og tröll. Nú vitum við að álfar og tröll eru bara til í þykjustunni og sögurnar um þau voru búnar til af fullorðna fólkinu. Í gamla daga þegar eitthvað týndist þá sagði fólkið að álfar hefðu stolið því sem týndist. Þannig voru þykjustu álfar búnir til til að útskýra eitthvað sem fólkið skildi ekki. Guð var líka búinn til til að útskýra margt sem fólk skildi ekki í gamla daga. Þá hélt fólk að Guð stjórnaði rigningunni, rokinu, þrumum og eldingum og mörgu öðru sem fólk vissi ekki hvernig var til komið. Í dag eru vísindamenn búnir að útskýra allt það sem fólk bjó Guð til til að útskýra í gamla daga.

Það gerðist vegna þess að vísindamennirnir hugsuðu sjálfir um vandamálin og gerðu tilraunir sem gátu sannað að það var ekki ósýnilegur Guð sem stjórnaði.

Stundum spurja krakkarnir mig hvernig allt varð til ef Guð bjó það ekki til. Þau segja að ekkert geti orðið til nema einhver búi það til. Þá spyr ég oft fyrst: "hver bjó þá til Guð"? Þá segja þau að Guð hafi alltaf verið til og ég svara með því að segja að ég haldi líka að heimurinn hafi alltaf verið til.

Stundum reyna krakkarnir að hræða mig til að trúa. Þau segja að ef ég trúi ekki verði Guð vondur við mig og ég fari til Helvítis þegar ég dey. Þar er eldur. Þá segi ég að ef Guð geti verið svona vondur við lítið barn þá vil ég ekki fara til hans hvort sem er.

Þá spurja þau ekki meira.

Fólkið í gamla daga bjó til alls konar Guði. Sumir Guðirnir voru menn, sumir konur og sumir voru dýr.
Sumir voru meira að segja bæði menn og dýr. Sumir Guðir voru ósýnilegir en aðrir voru sýnilegir. Sumir voru góðir og sumir voru vondir. Fólkið bjó til alls konar sögur um Guðina. Alveg eins og hér á Íslandi voru búnar til margar sögur um ósýnilega álfa. Í öllum löndum var það allaf Guðinn sem var búinn til í hverju landi sem fólkinu þar fannst vera bestur. Guðinn var alltaf sérstakur vinur þjóðarinnar sem fann hann upp en óvinur hinna þjóðanna sem voru með aðra Guði. Mjög mikið af fólki hefur verið drepið vegna þess að það trúir ekki á sama Guðinn og einhverjir aðrir. Í dag er fólk enn að drepa hvert annað í styrjöldum út af mismunandi trú á Guð.

Sögurnar sem fólkið bjó til um Guðinn sinn voru svo settar í sérstakar bækur. Þar voru skrifaðar reglur um hvað Guðinn vildi að fólkið gerði. Þar var einnig sagt frá öllu því sem Guðinn ætlaði bara að gera fyrir þjóðina sem fann hann upp.

Á Íslandi eru flestir kristnir. Bókin sem hefur allar sögurnar um Guð hjá okkur heitir Biblían. Alveg eins og í álfasögum, eru sagðar sögur í Biblíunni sem ekki geta hafa gerst í alvörunni, t.d. sagan af Nóaflóðinu. Þú hefur örugglega lesið um Nóa í skólanum. Í dag vita allir að það var ekki til nógu mikið vatn fyrir svona flóð og að ekki var nóg pláss á bátnum hans Nóa nema fyrir pínulítið brot af dýrunum. Svo passar það ekki að segja að Guð sé góður fyrst hann lét öll litlu börnin í heiminum drukkna í Nóaflóðinu.

Svona fór ég að hugsa sjálfur um Guð og Biblíuna. Enginn hefur séð Guð og enginn getur sýnt að hann sé til með myndum eða neinum tilraunum.

Amma mín sem trúði á Guð, og sagði að hann hlutstaði alltaf á bænirnar mínar, var oft að biðja bænir. Þegar ég var 6 ára bað ég Guð um að láta ekki litlu börnin í Afríku deyja úr hungri. Þau dóu samt. Nú er ég búinn að sjá að ef einhver þarf mat er betra að ein manneskja fari heim til hans með mat heldur en að láta hundrað manns í kirkju biðja bæn fyrir hann. Ég veit þetta af því að ég hugsaði sjálfur um málið.

Nú veit ég að Guð er bara í þykjustunni. Eins og álfar og tröll.

Nú læt ég engan segja mér eitthvað án þess að hugsa fyrst sjálfur um málið.

Ég er trúleysingi. Trúleysingjar eru þeir sem trúa ekki á Guð eða ósýnilegar verur.

Þegar við fæðumst erum við öll trúleysingjar. Það þarf að læra að trúa á Guð. Þegar pabbi og mamma, allir vinir þínir og kennarinn í skólanum segja að Guð sé til þá fer maður að trúa á Guð án þess að hugsa sjálfur um málið. Þegar ég fór sjálfur að hugsa um málið sá ég að Guð er bara í þykjustunni. Nú líður mér betur því mér finnst vont að trúa einhverju sem mér finnst vera bara plat.

Mér finnst allt í lagi þótt hinir krakkarnir trúi á Guð en það væri skemmtilegra ef þau myndu reyna að skilja mig og hugsa sjálf um Guð.

Ég vil ekki ljúga að sjálfum mér.

SVARIÐ MITT....

Sæll Úlfar frændi,

Já, þetta eru athyglisverðar vangaveltur Úlfar og já mennirnir hafa oft klúðrað Guðinum sínum og notað hann sem afsökun til að gera alls konar slæma hluti.

Á sama hátt er hægt að nota góða hluti eins og t.d. verkfæri eða bíla til að gera slæma hluti eins og að keyra á einhvern eða fremja ofbeldisglæpi með því að lemja þá í hausinn með annars saklausum hamri. Það er alltaf hægt að taka hluti úr samhengi og gera eitthvað vont þegar fólk missir sjónar á því sem skiptir máli. Hvað er það sem skiptir máli? Það sem skiptir máli er kærleikurinn og lífið.

Hver er þá þessi Guð?
Fyrir mér er Guð kærleikurinn og lífið. Hvað í ósköpunum er það er eðlilegt að spyrja? Skiptum þessu í tvennt.

Byrjum á kærleiknum: Hann er þetta ósýnilega afl sem fær mann til að gera eitthvað gott fyrir aðra, hvort sem það er að taka eitthvað upp sem einhver missti í götuna, aðstoða einhvern eða yfir höfuð gera eitthvað fyrir einhvern sem maður, strangt til tekið, þarf ekki að gera.
Af hverju gerir maður það? Af því það er betra að lifa í heiminum ef fólk hjálpast að. En ég gæti sjálfur komist miklu hraðar yfir og gert mikið fleira ef ég væri ekki alltaf að eyða tíma í að hjálpa öðrum. Samt stoppa ég og hjálpa fólkinu í kringum mig, hrósa fólkinu í kringum mig og reyni að skapa þetta ósýnilega en góða andrúmsloft sem fær mann til að líða vel. Fyrir mér er Guð það andrúmsloft og það ósýnilega afl sem fær mig til að gera þetta. Þetta afl heitir kærleikur og fyrir mér er Guð kærleikurinn. Það er ekki til nein mynd af Guð. Það eru til myndir af Jesús sem var maður sem gat gert alls kyns góða hluti en hann var maður. Sagt er að Guð hafi notaði Jesús til að kenna okkur að við getum komið mörgu góðu til leiðar með því að gera öðrum gott. Hann kenndi okkur á kærleikann, þetta ósýnilega afl sem fær okkur til að breyta rétt og vera góð við aðra.

Hinn hlutinn sem ég nefndi var "lífið". Þegar maður skoðar alla náttúruna, þar með talið mannslíkamann er maður ekki lengi að komast að því að þarna er eitthvað magnað í gangi. Það er alveg ótrúlegt hvernig þetta spilar allt saman og virkar eins og ein heild. Þegar maður er úti í náttúrunni og sér hvað hún er falleg og magnað kraftaverk. Fólk lifir og fólk deyr og lífið heldur áfram á endalausri leið. Einhvers staðar kviknaði lífið og það er rangt í greininni hérna fyrir neðan að vísindamennirnir séu búnir að komast að þessu öllu. Þeir eru bara búnir að fatta lítið brot af öllu þessu samspili og því hvernig líf kviknaði í upphafi. Það eru til alls kyns kenningar en það eru bara hugmyndir og kenningar og í alvörunni hafa menn ekki hugmynd um það, vita það ekki með neinni vissu. Þeir bara halda þetta og halda hitt. Eftir situr ráðgátan um það hvernig náttúran lifnaði við og hvernig hún getur verið svona fullkomin og mögnuð þótt enginn (maður alla vega) sé í rauninni að stjórna henni. Sumir eiga hins vegar erfiða daga, verða veikir, slasast, missa mömmur sínar og pabba eða eitthvað (Jesús átti til dæmis erfiða daga en missti aldrei sjónar á því sem var mikilvægast - kærleikanum). Margir þeirra sem hafa það erfitt eru þó ótrúlega duglegir þótt þeir eigi erfiða daga og (eins og Jesús) kenna okkur hinum að gefast ekki upp og að vera þakklát fyrir lífið sem við höfum fengið í vöggugjöf. Fyrir mér hlýtur að vera til eitthvað ósýnilegt afl sem heldur þessu öllu gangandi.
Hins vegar þarf ekkert endilega að vera hægt að snerta allt eða skilgreina. Ef manni þykir vænt um einhvern eða eitthvað er ekkert hægt að snerta væntumþyggjuna. Hún er samt þarna - við finnum það alveg og efumst ekkert um það.

Já, þetta er allt svolítið skrítið og erfitt að henda reiður á því af því það er ekki hægt að koma við það, teikna það eða horfa á það. Fyrir mér er Guð hins vegar með því að kenna okkur kærleika og sýna okkur hvað náttúran er mögnuð að láta áttavita í hendurnar á okkur. Við vitum að við erum á réttri leið ef við erum á leiðinni að kærleikanum eða að fara vel með það sem í kringum okkur er. Við vitum líka að ef við erum ekki að þessu þá erum við ekki á réttri leið og þurfum að beygja aftur inn á réttu brautina. Þannig leiðbeinir Guð okkur í lífinu.

En heyrir Guð bænirnar manns? Ég veit það ekki? Kannski, kannski ekki. Manni líður alla vega vel að hafa einhvern, hvort sem það er Guð eða ég sjálfur, til að tala við um alls kyns hluti, sérstaklega þegar ég þarf að stilla áttavitann minn. Það er því ekki ólíklegt að Guð og kærleikurinn sé að koma þar einhversstaðar nærri.

Kannski er Guð líka bara eins og jólasveinninn. Allir vita að hann er ekki til...allir vilja samt hafa hann hjá sér og hafa bara ákveðið, þvert á öll vísindi, að bjóða kallinn bara velkominn! Það sem skiptir máli varðandi jólasveinninn er andinn og gleðin (kærleikurinn) sem fylgir honum alls staðar þar sem hann er, ekki í hvernig fötum hann er eða hvort hann sé stór, lítill, feitur eða mjór. Ég held að Guð sé eins. Það skiptir ekki máli hvort hægt sé að snerta hann eða hvernig hann lítur út. Það skiptir bara máli að finna fyrir honum í hjartanu á sér með því að finnast kærleikurinn og lífið skipta máli í því sem maður tekur sér fyrir hendur.

Eitt er þó rétt í bréfinu hérna að neðan. Það er sú fullyrðing að það sé mikilvægt að strákar eins og þú veltir þessum málum fyrir sér og myndi sér eigin skoðanir á þessum hlutum, útbúi sér sinn eigin áttavita og passi að fara eftir honum. Nú hefur þú skoðanir mínar á þessu efni og skoðanir þess sem skrifaði bréfið hér að neðan. Nú er komið að þér að nota skoðanir okkar og ýmislegt annað sem þú heyrir, lest og upplifir til að búa til þína eigin skoðun. Gangi þér vel með það.

Kær kveðja,

Siggi frændi

Ps. Það er líka athyglisvert að öll trúarbrögð hvaða nafni sem þau nefnast, hvort sem það er kristnin, islam (Múhameðstrú), Hindúismi, Búddismi eða hvað þetta heitir allt saman leggja höfuðáherslu á kærleikann og lífið. Í grundvallaratriðum eru þau eins. Síðan er bara mjög mismunandi hvernig mennirnir kjósa að túlka þau oft í ansi skrítnar áttir.

En ein prinsessan!

2005-11-22T18:00:00.000Z

Gunna og Kristbjörn eignuðust hana Huldu 12. nóvember síðastliðinn.

Til hamingju öll þrjú!!!!

Þetta er svakalegt prinsessulán hjá fólkinu í kringum mann. Fyrst Árni og Guðbjörg, svo Steini og Herdís og loks Gunna og Kristbjörn. Það verður fróðlegt að sjá hvers kyns verður í Álaborginni þegar Álaborgarunginn trítlar í heiminn á nýju ári.

Svo er bloggið mitt orðið eins og fréttasíða af fæðingardeildinni. En hey!! Það er bara ekki á hverjum degi (þangað til núna) sem heill fullskapaður einstaklingur stekkur inn í veröldina í kringum mann. Þetta er bara svo merkilegt að það er varla hægt annað en að minnast á.

Aftur til hamingju með þetta öll þrjú. Þið getið séð meiri myndir og gúmmulaði á heimasíðunni hjá Gunnu...

Til hamingju með prinsessuna Steini og Herdís!!!

2005-10-27T10:39:00.000Z

Steini og Herdís eignuðust litla prinsessu síðastliðna nótt klukkan átta mínútur yfir þrjú. 3370 gr. og 52 cm.

Frábært og til hamingju með þetta...og Alma Sól...til hamingju með að vera orðin STÓRA SYSTIR.

Mikið er það gaman þegar fólk er að eignast svona falleg börn allt í kringum mann. Árni og Guðbjörg nýbúin og Gunna og Kristbjörn á leiðinni með eitt.

Skemmtilegt!

Tónleikar á þriðjudaginn!

2005-10-21T19:37:00.000Z

Nemendatónleikar

Fyrstu nemendatónleikar vetrarins verða
þriðjudaginn 25. okt. n.k. kl. 20.00
í Tónleikasal Söngskólans í Reykjavík, Snorrabraut 54 - Snorrabúð

Söngvararnir eru nemendur Signýjar Sæmundsdóttur og Sigurðar Bragasonar:

Aron Axel Cortes
Guðbjörg Björnsdóttir
Haraldur S. Eyjólfsson
Haraldur Björn Sverrisson
Hildigunnur Einarsdóttir
Íris Elíasdóttir
Jenný Lára Arnórsdóttir
Ólafur Siurðsson
Rafn Hilmar Elvarsson
Ragnheiður Þórdís Stefánsdóttir
Sigurður Már Guðjónsson
Sigurður Viktor Úlfarsson
Skúli Sigurðsson
Þórunn Elfa Stefánsdóttir

Píanóleikarar: Krystyna Cortes og Lára S. Rafnsdóttir

Efnisskráin er afar fjölbreytt:
Íslensk þjóðlög og sönglög, erlendir ljóðasöngvar og dúettar, antík-aríur og aríur og dúettar úr óperum. Dagskránni lýkur með aríu Næturdrottningarinnar úr Töfraflautunni eftir Mozart.

Allir velkomnir
Söngskólinn í Reykjavík

Til hamingju Sonja!

2005-09-28T21:55:00.000Z

Hitti Sonju, Gísla og hin fimm fræknu í gær. OR veitir árlega styrki til kvenna í verk- og tæknifræði annars vegar og í iðngreinum hins vegar á sviðum sem nýst geta Orkuveitunni.

Í ár voru fjórar konur valdar úr og ein þeirra var Sonja sem er að læra byggingatæknifræði við HR. Önnur var reyndar Berglind nokkur sem vinnur hjá OR og býr í Vallarhúsi við hliðina á Öldu systur.

Það var sérstaklega skemmtilegt að koma inn í salinn og sjá hvernig Sonja og fylgdarlið tók næstum allan fremsta bekkinn (held það hafi vantað 2 sæti upp á). Þarna voru mætt Sonja og Gísli, allir krakkarnir, mamma og tengdó. Ótrúlega flottir krakkar...og auðvitað mamman!

Rosalega gaman að hitta ykkur - Long time no see.

Það er reyndar skemmtilegt frá því að segja að Sonja og fyrrnefnd Berglind eiga fleira sameiginlegt en að vera hinar útvöldu meðal kvenna. Þær eru nefnilega einnig hinar útvöldu þegar kemur að börnum. Berglind á nefnilega stelpu fædda ´93 og síðan eiga þau hjónin tvenna tvíbura fædda ´97 og 2001, alls fimm í allt. Heldur betur happy hour þarna!

Krakkarnir þeirra voru ekki mætt í gær en hefði verið mjög skemmtilegt ef öll strollan, 10 börn, hefði verið á staðnum. Það hefði vissulega vakið athygli! Glæsilegur hópur!

Annars allt geðveikt að gera í vinnunni. Erum að gera áætlanir fyrir næsta ár. Hlaupa náttúrlega á milljörðum í svona stóru fyrirtæki. Þetta verða svo eitthvað-út-úr korti tölur í svona stóru fyrirtæki og maður þarf að klípa sig reglulega í handarbökin og minna sig á að eitt prósent til eða frá SKIPTIR MÁLI því það hleypur á tugum milljóna. Skemmtilegt að hafa eitthvað fyrir stafni! :)

Fékk aðrar fréttir í dag: Verð með tónleika í Söngskólanum 25. október klukkan 20 ásamt öðrum nemendum sem eru að læra hjá Sigurði Bragasyni söngkennara. Já, í ýmsu lendir maður! En ætli maður massi þetta ekki. Vandamálið er auðvitað hjá hlustandanum en ekki flytjandanum komi þetta illa út. Ég verð búinn að æfa það mikið að ég verð orðinn samdauna þessu. Hlýtur samt að sleppa! :)

Hey, ert þú strákur og langar að skipta ærlega um umhverfiog syngja með skemmtilegu og spræku fólki einu sinni í viku. Skátakórinn getur bætt við sig röddum, sérstaklega tenórum. Aðrar raddir velkomnar líka. Endalaust skemmtilegt prógramm í gangi í vetur. Erum að syngja ýmiss popplög með Bee Gees (Tragety), Bítlunum, Steve Wonder og t.d. lögin Puttin' on the Ritz og You've got a Friend svo eitthvað sé nefnt. Þetta verður verulega skemmtilegur vetur!

Nóg að gera...

2005-09-08T22:00:00.000Z

Þessa dagana er nóg að gera og því lítill tími til að blogga mikið.

Helstu fréttir síðustu vikna eru þær að við Inga Jóna búum nú saman í íbúðinni hennar við Miklubraut 70, hurðin við hliðina á hárgreiðslustofunni við hliðina á blómabúðinni á horni Miklubrautar og Hringbrautar. Klárlega miðdepill alheimsins enda leitun að stað sem fleiri kjósa að leggja leið sína um á hverjum degi.

Aðrar fréttur eru þær að vikuna 21. - 28. ágúst gekk ég með Útivist frá Sveinstindi við Langasjó suður Eldgjá (gist í Skælingum, Álftavatnakrók og Strút) að Mýrdalsjökli, áfram í Emstrur (Botna) og enduðum loks í heljarpartýi í afmælisveislu Útivistar í Básum. Algerlega frábær 108 km löng ferð sem verður lengi í minnum höfð.

Nóg að gera í vinnunni. Oracle ráðstefna á morgun sem endar með djammi á Grand hótel ásamt hinum tölvunördunum. Þessa dagana erum við að uppfæra úr Oracle Discoverer í Oracle Discoverer Plus auk þess sem við erum í óða önn að tengja saman upplýsingar úr hinum ýmsu upplýsingakerfum fyrirtækisins. Þá erum við að vinna í því að koma starfslýsingum, starfsmannasamtölum, handleiðslu og mörgu öðru inn í mannauðskerfið. Mjög spennandi og endalaus verkefni framundan.

Er byrjaður í fullu námi í Söngskólanum í Reykjavík. Hörku vinna og miklar kröfur sem innihalda tvö skipti í viku með söngkennara, einu sinni í viku með undirleikara, klukkutíma á viku í tónheyrn, klukkutíma í tónfræði og klukkutími í það sem kallað er opin grunndeild. Þar er blandað saman tónlistarsögu, leiklist auk þess sem við syngjum eitthvað hvert fyrir annað og fáum feedback á frammistöðuna. Svo þarf ég að æfa mig heima. Hefur nú aldrei verið mín sterka hlið.

Þá er ég að vinna í verkefninu Ljóð í sjóð með MND félaginu. Þar erum við að safna ljóðum, málverkum og tónlist sem gefin verður út í glæsilegri ljóðabók sem einnig mun innihalda myndir af málverkunum. Með henni mun svo fylgja diskur með tónlist og upplestri ljóða. Fjölmargir af þekktustu ljóðskáldum, myndlistar- og tónlistarmönnum þjóðarinnar munu taka þátt í því verkefni og er stefnt að útgáfu næsta vor í kringum sumardaginn fyrst. Allir listamennirnir gefa MND-félaginu vinnu sína til rannsókna á þessum svakalega sjúkdóm.

Er svo auðvitað formaður Skátakórsins og einnig í kór Orkuveitu Reykjavíkur. Það þýðir að ég mun syngja í skólanum á mánudögum, Skátakórnum á þriðjudögum, skólanum og með ORkórnum á miðvikudögum og í skólanum á fimmtudögum. Þetta verður því söngmikill vetur í meira lagi.

Á laugardaginn næsta ætlum við að skella okkur á "Hörður Torfa lengi lifi" sem eru heiðurstónleikar í Borgarleikhúsinu tilefni af 60 ára afmæli Harðar þar sem hinir ýmsu tónlistarmenn munu taka lögin hans. Um næstu helgi á eftir förum við síðan á hausttónleikana hans sjálfs auk þess sem ég fer á Úlfljótsvatn með RAP-hópi Bandalags íslenskra skáta en við erum hópur sem erum að vinna að endurskoðun skátadagskrárinnar, þ.e. þess starfs sem skátarnir okkar fara í gegnum á sínum skátaferli. Þar er ég með góðu og öflugu fólki og erum við meðal annars á leið til Danmerkur í nóvember. Stefni að því að kíkja við hjá Kristófer í Álaborg í leiðinni.

Um þar næstu helgi ætlar stjórn STOR austur í sumarbústað, þrífa bústaðina, ganga frá eftir sumarið og fá sér loks öl og gott að borða á eftir. Er þar eldhress hópur á ferð. Um mánaðarmótin verður síðan heilsað upp á tengdó á Akureyri í fyrsta skiptið. Verður örugglega mjög skemmtilegt því mér hefur heyrst þetta vera hið skemmtilegasta fólk.

Já, lífið er náttúrlega bara að komast á full-swing eftir sumarið. Svo þarf maður að reyna að vera duglegur að læra heima og reyna að koma sér í ræktina öðru hverju svo maður hafi nú þrek til að gera þetta allt saman.

Já, best að fara að koma sér heim strauja jakkaföt og skyrtur fyrir morgundaginn og...úúúú það verður ljúft að koma til yndislegu konunnar sinnar.

Já lífið er ljúft...

Magnað viðtal við borgarstjóra New Orleans!

2005-09-06T18:28:00.000Z

Magnað viðtal við borgarstjóra New Orleans. Þarna talar þreyttur maður sem er hættur að skafa utan af hlutunum og hættur að hlusta á PR-ráðgjafana. Hamfarasvæðið er á stærð við Stóra-Bretland. Rosalegt!

http://www.atypical.net/mm/nagin.mp3

Lilja Ósk Prinsessa

2005-08-10T20:09:00.000Z

Þá er hún búin að eignast sitt eigið nafn. Prinsessan hér að neðan var í gær skírð Lilja Ósk og er náttúrlega Árnadóttir. Fallegt nafn, stutt og laggott.

Til hamingju Lilja Ósk, Árni og Guðbjörg ;o)

Prinsessa Árnadóttir

2005-08-09T11:11:00.000Z

Árni og Guðbjörg eignuðust litla fallega prinsessu í júlí. Kíkið á síðuna hjá henni og heilsið upp á familíuna. :)

Flott fólk á flakki!

2005-08-09T10:30:00.000Z

Endilega kíkið á bloggsíðuna hjá Gísla, Sonju og hinum fimm fræknu krakkalökkum. Þau eru á ferð þvert yfir Bandaríkin og aftur til baka. Geri aðrir betur sjö manna fjölskyldan. Fullt af myndum og skemmtilegheitum. Eru bara með GPRS síma sem þau tengja við tölvuna hjá sér og fara á netið og blogga á meðan þau eru að keyra, þ.e.a.s. á meðan hitt er að keyra. Snilld! Maður verður að skella sér á svona Road Trip einhvern tímann...mmmmm.....

Annar hópur eru íslenskir skátar á Eurojamb. Það er semsagt í gangi núna Evrópumót skáta sem er nokkurs konar æfingamót fyrir Heimsmót skáta - World Jamboree - sem haldið verður á sama stað í Bretlandi á 100 ára afmæli skátahreyfingarinnar árið 2007. Einar Elí og félagar eru á staðnum og halda úti skemmtilegri bloggsíðu.

Fullt af fólki á fleygiferð!

Bless Marco og Simona!

2005-08-08T19:09:00.000Z

Kvöddum í gær Marco Cherry og Simonu kærustuna hans sem hafa verið á flakki um Frónið á hálfan mánuð. Marco kom á Nordjamb 2000 þar sem ég sá um útlendingana og kynntist honum ágætlega. Hann hafði síðan samband aftur í sumar og sagðist vera á leiðinni. Alltaf skemmtilegt þegar maður hittir fólk aftur!

Hann kom með þá hugmynd að fara á Þjóðhátíð í Eyjum og verður honum seintþökkuð sú hugmyndaauðgi enda helgin fádæma skemmtileg.

Þau fóru hringinn þegar þau komu frá Eyjum, gistu í Vík að ég held eða á Klaustri, síðan á Seyðisfirði sem þeim fannst frekar lásí staður. Þaðan héldu þau til Akureyrar sem heillaði þau og loks út í Grímsey sem þau kylliféllu fyrir. Skiptu þar lundarnir höfuðmáli enda Simona meira fyrir það að horfa á lunda en borða hann - eins og hún tilkynnti okkur í Eyjum. Hey, var ekki málið að "nýta og njóta" þegar svona dýr eru annars vegar???

Að norðan fóru skötuhjúin til Grundarfjarðar. Ég veit ekki alveg af hverju en af einhverjum ástæðum urðu þau ástfanginn af nafninu þegar þau voru að skoða Ísland fyrir ferðina og ákváðu að gista þar yfir nótt. Já, margt er skrítið í kýrhausnum! Voru svo á Geysi í tvær nætur áður en þau komu í mat heim til Ingu í gærkvöldi þar sem við skelltum í þau svolitlu rauðvíni og dýrindis kjúklingarétti a la Inga og skoðuðum myndir. Frábært kvöld og gaman að eiga vini héðan og þaðan. Nú fer Ítalía síðan á listann yfir þau lönd sem maður þarf að kíkja við í á næstu árum þegar maður er búinn að styðja við bakið á Björgúlfi og félögum í Landsbankanum.

Marco er annars framarlega í samtökum sem vilja sameina öll neyðarnúmer á Ítalíu í eitt 112 - Einn-Einn-Tveir eins og á Íslandi og víðar. Hann heldur úti þessari fínu heimasíðu um það mál. Simona er líka með blogg ef einhvern langar að æfa sig í ítölskunni.

Ætlaði að fara að skokka í fyrrakvöld og endaði á slysó. Frekar fúlt. Var varla byrjaður að hlaupa þegar ég fékk í hnéð. Ákvað að láta skoða þetta. Fékk þetti nokkrum sinnum í fyrra líka. Það virðist eins og hnénu sé ekkert um það gefið að ég skokki úti undir beru. Get gengið með og án bakpoka og hlaupið á bretti en ekki úti takk fyrir.
Fékk kannski áfall þegar ég fór allt í einu að hlaupa 10 kílómetra upp úr þurru í fyrrasumar og er staðráðið í að hafa nú hemil á karlinum. Beið í tvo og hálfan tíma á slysó en fékk að launum stórglæsilegan kvenkyns læknanema til að skoða mig. Stefni læknastéttin í þessa átt erum við í góðum málum strákar! Niðurstaðan var hins vegar sú að það eru engin bönd slitin og allt í góðu en gæti verið smá vökvi í hnénu en ekkert sem heita má. Ljóskan henti mér því bara út, sagði mér að taka því rólega næstu daga og fara síðan bara rólega af stað í skokkinu.

Ég held ég geti því kvatt Reykjavíkurmaraþonið þetta árið. Er að leggja af stað í vikugönguferð daginn eftir maraþonið og tek ekki sénsinn fyrst það er eitthvað tæpt. Svekkelsi því þetta var mjög gaman í fyrra.

Nú er farið að styttast í söngskólann. Mér skylst að ég verði kallaður í eitthvað viðtal þegar líða tekur á mánuðinn þar sem ég kemst vonandi að því hvað ég sé að fara að gera þarna. Ætti líklega að hafa samband af fyrra bragði og athuga hvort ég eigi þá ekki auðveldara með að velja mér tíma sem henta vinnunni o.þ.h. Troða mér nett fram fyrir í röðinni. Maður verður að bjarga sér.

Dagfinnur Dagmar dýralæknir er flutt upp í sveit við Elliðavatn. Til hamingju með það Dagmar! Verður örugglega ljúft að búa þarna. Maður þarf að kíkja í kaffi einhvern tímann í hjólatúr. Þarf þá reyndar fyrst að fara í hjólatúr!

Jamm, svona getur maður blaðrað. Gamla settið á Íslendingaslóðum í Kanada. Þangað hefur maður nú aldrei komið. Mikið er til af spennandi stöðum.

Hey! Eitt að lokum: Kíkið á http://earth.google.com Ferlega flott. Maður getur hlaðið niður græju sem að gerir manni kleypt að fljúga um dali og fjöll í þrívíddarumhverfi eftir hæðarlínum. Ofursvallt.

Að gera ekki neitt...

2005-08-05T03:48:00.000Z

Er að reyna að einbeita mér að því að gera ekki neitt í nokkra daga...

...ætla að halda því áfram. :)

Við erum öll einstök...

2005-08-03T23:11:00.000Z

...en sum einstakari en aðrir.

Rakst á þessa mynd í Mogganum á yfirferð minni um fjölmiðla júlímánaðar.

Myndin er tekin á Snoop Dogg tónleikunum. Strákarnir dýrka goðið af miklum móð og í kraftmiklum rokkgír

EN

...stelpan í miðjunni...tja...hún dýrkar það ekki minna en er í besta falli í svolítið öðrum gír. ;)

Kominn til byggða!

2005-08-03T22:52:00.000Z

Jæja, þá er maður kominn aftur til byggða og sumarfríið á enda í bili. Það er athygliverð öfugþróun að maður skuli ekki hafa tíma til að blogga akkúrat þegar maður er í sumarFRÍI. Þannig var það nú samt.
Fór í frí mánudaginn 3. júlí þegar ég var kominn í bæinn úr Básum aðra helgina í röð. Var þó með verkefni á öxlunum út þá viku þannig að hún endaði sem vinnuvika en ekki sumarfrí. Leikið með Kristó á daginn og tölvunni fram eftir nóttu.

Síðan héldum við Birna systir "Litla ættarmótið" helgina 8.-10. júlí sem varð nú reyndar ekki svo lítið og vorum síðan áfram í sumarbústað við Vesturhópsvatn út þá viku. Mætti á hádegi fimmtudaginn 14. júlí í Varmahlíð tilbúinn í fjögurra daga óvissuferð um Skagafjörð með Sárum og súrum fótum. Óvissuferð reyndist réttnefni því þær systur Kristbjörg og Kristveig höfðu heldur betur platað okkur og byrjuðu á því að keyra okkur norður fyrir Ólafsfjörð í norðanverðum Eyjafirði þaðan sem gengið var yfir í Héðinsfjörð, Siglufjörð, yfir í Fljótin, keyrt upp á Lágheiði, gengið yfir í Svarfaðardal og þaðan yfir í Kolbeinsdal ofan við Hóla í Hjaltadal. Tröllaskaginn var semsagt tekinn með trompi 14.-18. júlí.
Brennt í bæinn og haldið þann 19. júlí á landsmót skáta á Úlfljótsvatni með viðkomu á sjónvarpsstöðinni Sirkus þar sem við Huldu mössuðum kvöldþátt með Guðmundi Steingrímssyni. Fyndið, vegna þess að ég hafði aldrei horft á sjónvarpsstöðina Sirkus áður en ég kom fram á henni!

Costa del Úlfljótsvatn leyfði okkur að njóta unaðssemda sinna til 26. júlí þegar við feðgar héldum í bæinn og voru í bænum fram á föstudaginn 29. þegar sá stutti hélt til Danaveldis en sá langi á vit lunda og brekkusöngs í Eyjum. Komum frá Eyjum í gær, þriðjudag - alveg óvart - kíkti svo í vinnuna í dag massaði tölvupóstinn og svoleiðis.

Eftir stutta talningu segir mér svo hugur um að ég hafi frá byrjun júlí gist 13 nætur í tjaldi auk staða eins og tæpa viku í sumarbústað við Vesturhópsvatn, nótt í skátaheimilinu í Eyjum, nótt í innsta bæ í Svarfaðardal, nótt í Fljótum, nótt í gagnamannakofa í Kolbeinsdal í Skagafirði svo fátt eitt sé nefnt.

Já og vitiði hvað? Ég kynni hérmeð Ingu Jónu til leiks. Okkur tókst að rugla saman reitum okkar í fríinu...sem telst nú nokkuð vel að verki staðið svona með tilliti til upptalningarinnar hér að ofan. Þeir sem voru í Eyjum vita við hverja er átt. Hinir hefðu betur verið í Eyjum! :)

Já...það liggur við að maður þurfi að sækja um aukasumarfrí til að hvíla sig eftir sumarfríið. Er þó búinn að ákveða að eyða helginni í bænum. Datt í hug að skella mér í fiskiveislu á Dalvík en ákvað þess í stað að gæða mér á hinsegin veislu í Reykjavík. Já, margt í boði!

Næsti hluti sumarfrísins er síðan í lok ágúst þegar óbyggðirnar kalla og gengið verður frá Sveinstindi í Bása endað á fyrirtaks afmælishelgi Útivistar í fyrirheitna landinu í faðmi jöklanna þriggja...

og spáið í það ... þá ég ennþá rúma viku eftir af sumarfríinu!!!! Þetta er nú alveg yndislegt líf!

Eiríkur ofurplöggari skilar í kassann!

2005-06-30T21:25:00.000Z

Fyndið þetta Bubba - Brynju - Eiríksmál!

Íslendingar geta verið á þeirri skoðun að þessi fréttaflutningur sé fullkomlega óeðlilegur, siðlaus og allt saman en á meðan þeir kaupa síðan blaðið þá skiptir álitið engu máli.

Hvorki Heyrt og séð né DV er gefið út af hugsjón. Þetta er viðskiptaáætlun sem snýst um krónur og aura. IE brást við og ákvað að hætta að selja þessi blöð og tel ég það til eftirbreytni. Ef okkur finnst eitthvað um þetta þá þurfa þeir sem reka dæmið að upplifa það í buddunni.

Eiríkur er hins vegar pottþétt að vinna vinnuna sína. Allir vita hvernig blaðamaður Eiríkur er. Hann er búinn að vera í bransanum í 25 ár og fer ekkert í felur með það hvað honum finnst um svona fréttaflutning. Fólk veit að Eiríkur er á DV og les DV og verður síðan voðalega hneykslað þegar það sér vafasama grein eftir hann - í hundraðasta skiptið - í DV. Fyrirgefiði, hvar er það sem kom á óvart? Til hvers keyptirðu DV?

Eiríkur fékk verkefni: Að koma nýju blaði, Heyrt og séð, á koppinn, skapa því sess á markaði.

Eiríkur brilleraði í þessu verkefni með hjálp Bubba. Hann einfaldlega lét vaða í háværan og kjaftforan rokkarann og fékk til baka þrjú viðtöl um blaðið sitt á besta tíma í sjónvarpi, við Eirík sjálfan, Bubba og fleiri plús ótrúlega umfjöllun í öllum fjölmiðlum landsins og umræður á öllum vinnustöðum landsins í marga daga - Frítt! Hann var ekki ráðinn í þetta verkefni vegna þess að hann er svo góður og sannleikskær. Honum er slétt sama þótt fólk sé á því að þetta sé nú svolítið vafasamur fréttaflutningur - HANN SELUR sem er það sem skiptir máli. Halló, vafasamur fréttaflutningur er það sem hann er að markaðssetja. Fólk kaupir DV og Heyrt og séð vegna þess að þar er vafasamar fréttir að finna!

Stutt samtekt yfir árangur Eiríks í starfi á undanförnum vikum með splunkunýtt blað á erfiðum markaði:

Er einhver á Íslandi sem ekki veit núna af tilvist þessa nýja blaðs? Nei, alla vega mjög fáir.
Er einhver á Íslandi sem veit ekki fyrir hvað blaðið stendur? Að þar sé allt svæsnasta slúðrið að finna? Nei, alla vega mjög fáir.
Er blaðið að seljast eins og heitar lummur út á alla þessa umfjöllun? Veit það ekki en er samt algerlega sannfærður um að svo er. Umfjöllun selur. Krassandi umfjöllun selur mikið.

Það er því eins með þetta og stjórnmálamennina: Við fáum það sem við eigum skilið ....og Eiríkur, til hamingju með að hafa heldur betur unnið fyrir kaupinu þínu þennan mánuðinn!

Frítt í Bása um helgina????

2005-06-30T18:30:00.000Z

Vill einhver koma með mér í Bása um helgina að aðstoða skálaverðina?

Í boði er:

Fallegasti staður landsins, fullt af klósettum að þrífa, frábær félagskapur (ég OG meira að segja fleiri!), traktor að keyra, fullt af rusli að henda, söngur, grín og gleði, grill, frítt í rútuna, frí gisting í tjaldi með mér...eða einhverjum öðrum svona þegar líða tekur á kvöldið. ;)

Rútan fer úr bænum annars vegar klukkan 8:30 í fyrra málið og hins vegar klukkan 17. Ég kemst líklega ekki fyrr en með 17 rútunni.

Áhugasamir hafið samband við undirritaðan í síma 6176821 eða við Lóu á skrifstofu Útivistar í fyrramálið í síma 562 1032 eða í síma 895 1428 til að fá beiðni fyrir rútunni.

Nýtt leikfang!!!

2005-06-30T02:02:00.000Z

Hey, var að fá nýtt leikfang!

Kiddi frændi í kjallaranum er svolítið í því að panta alls kyns dót af Ebay og héðan og þaðan. Pantaði "flakkara", færanlegan 20 Gb harðan disk með kortalesara. Sá hann hjá honum og ákvað að splæsa í eitt stykki.

Það þýðir að þegar ég fer út úr bænum 8. júlí til 26. júlí eiginlega án þess að koma í bæinn þá get ég einfaldlega tekið kortið úr myndavélinni þegar það fyllist og tappað af því inn á græjuna sem er á stærð við vasadiskó. Síðan hreinsa ég bara út af kortinu og held áfram að taka myndir eins og ekkert sé. Tær snilld!

Borga tæplega 15 þús. kr. fyrir gripinn sem á klárlega eftir að koma sér vel. Síðan er ekkert því til fyrirstöðu að kaupa í hann stærri harðan disk en 20 Gb verði hann of lítill. Á hins vegar ekkert sérstaklega von á því nema náttúrlega ef maður fer til Afríku, í heimsreisu eða eitthvað...sem mun væntanlega gerast á næstu þremur til fimm árum - vonandi.

2 dagar í sumarfrí - Jibbbííííí!!!

2005-06-29T01:45:00.000Z

Nú eru aðeins tveir dagar í sumarfrí. Ætlaði í sumarfrí á föstudaginn en ætli ég vinni hann ekki og fari síðan í frí á mánudaginn í staðinn. Býst við því. Ýmislegt sem liggur fyrir áður en maður fer í frí.

Skemmtilegt kjúklingapartý í gærkvöldi. Birna hafði lofað Kristófer síðbúinni afmælisveislu (hann átti afmæli 30. mars) þegar hann kæmi heim. Hún var semsagt framkvæmd með látum í gær. Stórfín afsökun fyrir að ná fjölskyldunni saman sem er alltaf skemmtilegt.

Enn skemmtilegra var að tvíburarnir Aníta og Viktor, tveir bestu vinir Kristófers frá því í gamla daga af Bakkaborg gátu einnig verið með okkur. Frábært að okkur og foreldrum þeirra er að takast að láta þau halda tengslum þótt Kristófer sé fluttur út. Það sama á reyndar við um Árna, bróður hennar Gunnu, því hún renndi með Kristófer austur til Árna fyrir helgi og hann meira að segja gisti þar aðfararnótt föstudags. Þau sögðu að það hefði verið eins og þær hefðu hisst í gær! Frábært! Það er mikilvægt að halda góðum tengslum við vini sína þótt maður búi langt í burtu.

Við Birna renndum bara á KFC og keyptum 30 kjúklingabita og mesta magn af frönskum sem ég hef séð. Risastóra KFC fötu fulla af frönskum. Ég hélt að þetta myndi duga okkur í tvo mánuði. Korteri seinna var allt búið. Ótrúleg familía þegar kemur að mat!!!

Ásta bauð okkur Unni síðan í burger áðan í tilefni af hennar afmæli sem var í gær. Alltaf gaman að hittast, spjalla og borða saman. Þær vinkonurnar eru á leiðinni til Danmerkur sitt í hvoru lagi en voru að plotta það að mögulega væri hægt að tengja það saman. Ásta er semsagt á leið á dansmót í 10 daga eða hálfan mánuð eða eitthvað svoleiðis. Hlýtur að vera tær snilld. Fara út og dansa í tvær vikur. Ég þarf að gera þetta einhvern tímann! :) Algjörlega útilokað að láta sér leiðast og dansa á sama tíma.

Í kvöld hittust síðan Sardínurnar - Dos Sardinos - eitt af kórböndum Skátakórsins og æfðu aðeins. Skemmtilegur hópur. Komum mögulega tveimur lögum á Skátakórsdiskinn. Kemur þó í ljós. Hinn möguleikinn eru einhverjar uppákomur á landsmótinu.

Talandi um landsmót þá tilkynnti Fríður Finna dagskrárstjóri mér það að það hefði verið ákveðið á mótsstjórnarfundi að ég mætti sofa milli 5 og 10 og síðan aftur milli hálf tvö og 8 á næturna. Þess á milli yrði ég náttúrlega með flekapóstinn og síðan skemmtanastjóri á kaffihúsinu. ...og vitiði hvað!!! Ég sagði NEI!!! Jibbbíííí!!! Ég er að æfa mig - víst þótt þið trúið því ekki. Hefði nú líklega sagt já nema vegna þess að ég verð með Kristófer og get því ekki lofað mér seint á kvöldin öll kvöldin. Þetta gengur svona. Er líka í formannshlutverki Skátakórsins þannig að maður verður svosem ekkert að deyja úr aðgerðarleysi - en fyrst og fremst verður maður bara úti að leika. Rosalega verður þetta skemmtilegt! Ekki dró svo úr gleðinni þegar við fréttum að Aníta og Viktor yrðu á mótinu líka. Foreldrar þeirra duttu inn á landsmótið á Akureyri í nokkra daga og fannst það svo æðislegt að þau ákváðu að koma aftur núna. Eru ekki í neinu skátastarfi en Halla, mamma þeirra var skáti sem krakki.
Taki þetta sér fleiri til fyrirmyndar! Þetta er endalaust skemmtilegt fjölskylduumhverfi og ég mæli eindregið með því að fólk skelli sér, a.m.k. yfir helgina. Mótið er frá þriðjudeginum 19.-26. júlí á Úlfljótsvatni - Allar nánari upplýsingar hér. Sjáumst spræk á landsmóti!!!

Frábær Jónsmessuhelgi í Básum!

2005-06-27T00:29:00.000Z

Kominn af fjalli eftir algerlega frábæra helgi. Skellti mér semsagt í Jónsmessugöngu Útivistar ásamt Unni og um það bil 300 öðrum. Gengum yfir Fimmvörðuháls aðfararnótt laugardags. Er búinn að fara þarna á hverju ári síðan 1999, þ.e. vera í Básum. Þetta er hins vegar í þriðja skiptið sem ég geng yfir.

Fórum Fimmvörðuhálsinn í þremur hundraðmanna hópum, borðuðum kjötsúpu í Fimmvörðuskála, renndum okkur á rassinum niður Bröttufönn, skáluðum í kampavíni á Heiðarhorninu o.s.frv. o.s.frv. þangað til við komum niður í Bása.

Á laugardagskvöldið var grill, um áttaleytið byrjuðum við nokkrir að spila í matartjaldinu í ca. klukkutíma og svo var kveikt upp í varðeldinum kl. 10.

Þar var líklega um fimmhundruð manns eða svo og feykilega góð stemning! Ég lét liðið taka allt frá drykkjusöngvum yfir í leikskóla-, skáta- og jólaballalög eins og "Höfuð, herðar, hné og tær", "Rúllandi", "Singing in the Rain" og "Sæll, ég heiti Jón" - sem var svolítið skemmtilegt enda liðið þokkalega stirt eftir Fimmvörðuhálsinn.

Þarna komu líka Sirkus Cirkör, sænskur sirkus sem er eitthvað að æfa hér á landi og sýndu listir sínar á varðeldinum. Þau voru bara þarna í útilegu að djamma og ákváðu að leyfa okkur að njóta. Joggluðu með allt upp í 7 bolta og tóku heljarstökk í útilegugallanum; gúmmístígvélum og vélsleðagalla. Fannst það nú nokkuð vel af sér vikið - Flestir eiga nú nóg með að standa upp í þeirri múnderingu!

Eftir varðeldinn var síðan fljótlega haldið áfram að spila, dansa og syngja inn í Strýtunni og ég held ég hafi spilað þar stanslaust frá ca. hálfeitt eða svo til hálfsex! Frábært! Ágætistörn enda hljómaði ég eins og skringileg blanda af karra og unglingi í mútum megnið af deginum í dag. Allt í fína. Hæfilegt hæsi er að sjálfsögðu gæðastimpill á kvöldið!

Kom síðan í bæinn í dag með Ofur-Baldri. Frábær náungi eins og aðrir sem að þessu koma. Við erum þarna fjórir sem höfum spilað saman á Jónsmessuvarðeldinum undanfarin ansimörg ár. Ég, Ofur-Baldur, Halldór Fannar (tannlæknir á daginn en skeggjaður hippi í frístundum) og Hilmar (bókasafnsfræðingurinn kvenholli). Erum þrusuteam og getum spilað lengi og vel þegar sá gállinn er á okkur.

Kristófer var hjá Birnu um helgina. Fóru ásamt mömmu og pabba út í Viðey en Hanna og Óttar komu þangað siglandi á kajökum. Já, fín helgi hjá hele húbben!

Á morgun hefst síðasta vinnuvikan fyrir sumarfrí. Það verður frábært!!!

Básar - Here we come!!!

2005-06-23T23:39:00.000Z

Nú eru bara um það bil 18 klukkustundir þangað til lagt verður í'ann frá BSÍ áleiðis austur að Skógum undir Eyjafjöllum. Þaðan verður síðan arkað, í líklega um það bil 300-500 manna hópi yfir Fimmvörðuháls áleiðis yfir í Bása.

Hérna eru fínar myndir frá því 2003. Í fyrra rigndi eldi og brennisteini þannig að það er varla til mikið af myndum þaðan.

Við göngum um nóttina, flatkökur uppi á vaði, kjötsúpa í 1086 metra hæð í Fimmvörðuskála, skálað í kampavíni á Heiðarhorni, Gammel Dansk og/eða Lýsi í boði þegar komið er niður í Strákagil.

Þá eyðir maður seinustu dropunum af orkunni í það að tjalda og blása upp hátt í fjögurra fermetra dýnuna áður en maður kastar sér flötum í pokann. Sé maður svakalega duglegur fer maður í sturtu.

Sefur fram yfir hádegi. Fer hugsanlega í sturtu þegar maður vaknar (kannski í fyrsta skiptið hafi maður ekki nennt því fyrr um morguninn). Síðan er bara afslappelsi þangað til um kvöldið. Þá er kveikt upp í grillinu og þar á eftir hefst varðeldur með pompi og prakt. Söngur, grín, gítar og gleði fram undir morgun.

Eintóm snilld!!!! Svo skemmtilegt.

Hey, það er hægt að sjá slatta af myndum frá því 2003 á heimasíðu Útivistar - HÉR.

Vonandi að Veðurstofan verði miskunnsöm þetta árið. Veðurstofan hótar þó smá rigningu á Suðurlandi en það er alltaf möguleiki að jöklarnir gleypi hana og myndi þetta líka fína gat í himininn yfir Básum. Gerist oft við þessar aðstæður. Nú krossum við bara fingur og vonum að við sjáum eitthvað á leiðinni.

Sjáumst eldspræk handan helgarinnar!!!!

Kristófer mættur á Frónið!

2005-06-22T01:47:00.000Z

Fékk frábært símtal í dag af Reykjanesbrautinni. Kristófer, Hanna og Óttar á hraðri leið til höfuðborgarinnar.

Stuttu seinna hljóp karlinn í fangið á pabba sínum....oooooo hvað það var ljúft!!!

Best að fara að skella sér í rúmið - enda orðið heitt!

Agressobandið spilaði í kökuboði í tilefni alþjóðadags MND sjúklinga. Frábær stemning leidd af Gauja Sig. ofurleiðtoga. Þvílíkur leiðtogi. Aldrei lognmolla og alltaf endalaust fullt að gerast. Alltaf verkin látin tala.

MND félagið hefur verið að gefa fullt af tækjum og tólum til taugadeildar Landsspítalans. MND-félagið ætlar að kosta ferð læknanema á alþjóðaráðstefnu MND til þess að reyna að kveikja áhuga læknanema á að sérhæfa sig í taugalækningum. "Taugalæknar eru stétt í útrýmingarhættu" sagði Guðjón í dag. Þvílíkur kraftur. Forréttindi að kynnast svona fólki.

Hvet alla til að láta eitthvað pínulítið af hendi rakna til MND samtakanna í tilefni dagsins. Margt smátt gerir eitt stórt!!

Jibbíííí - Karatestrákurinn á leið til landsins!

2005-06-20T21:18:00.000Z

Kristófer karatestrákur lendir ásamt Hönnu og Óttari á Fróninu annað kvöld, þriðjudagskvöld.

Mikið hlakka ég til að sjá hann. Verða heldur betur fagnaðarfundir.

Hetjan var að taka gula beltið í karate um daginn. Tókst það að sjálfsögðu með glans. Er lengst til hægri á þessari mynd með splunkunýtt beltið og heldur betur til í slaginn!

Fer reyndar Fimmvörðuháls og í Bása um næstu helgi, Jónsmessuhelgina enda verður hann að fá tækifæri til að heilsa upp á fleiri en bara pabba gamla. Síðan er bara farið að styttast í sumarfrí hjá okkur feðgum. Bara skemmtilegt!

Falleg jarðaför

2005-06-20T21:15:00.000Z

Svava, mamma hennar Gunnu, var jarðsungin í dag. Athöfnin var haldin í Fríkirkjunni í Reykjavík. Presturinn var Hjörtur Magni fríkirkjuprestur og Anna Sigga tónlistarforkólfur kirkjunnar söng einsöng.

Þetta er líklega ein alfallegasta jarðaför sem ég hef farið í. Tónlistin, andrúmsloftið allt var bara einhvern vegin svo einlægt og fallegt. Gott þegar svo vel tekst til.

Skrítið

2005-06-18T00:35:00.000Z

Já, það skiptast víst á skyn og skúrir hérna á blogginu eins og í lífinu. Fannst einhvern veginn hálfundarlegt að setja inn 17. júní-kveðju strax á eftir Svövu.

Já, þetta er skrítið líf...

Hæ hó jibbí jei og jibbíííí jei....!

2005-06-17T01:13:00.000Z

... það er kominn sautjándi júní!

Til hamingju með daginn gott fólk!

Svava

2005-06-16T00:19:00.000Z

Svava, mamma hennar Gunnu er látin. Verður jarðsungin á mánudaginn frá Fríkirkjunni í Reykjavík kl. 13.

Takk Svava mín fyrir alla hjálpina aftur og aftur þegar þú vildir allt fyrir okkur gera. Þakka þér líka fyrir allan góða matinn sem þú töfraðir fram handa okkur með reglulega millibili og lagðir allt þitt í. Takk fyrir að vera alltaf svona góð við Kristófer. Takk fyrir allt og allt.

Sofnar drótt,

nálgast nótt,

sveipast kvöldroða

himinn og sær.

Allt er hljótt,

hvíldu rótt,

Guð er nær.

Launamunur kynjanna konum að kenna!

2005-06-14T12:21:00.000Z

Ásdís fer mikinn á blogginu sínu vegna launamunar kynjanna enda fullkomlega óeðlilegt að stelpurnar séu með lægri laun en karlarnir, þrátt fyrir það að við séum með typpi.

Munurinn hjá Félagi viðskipta- og hagfræðinga virðist vera 7,6% þegar búið er að taka tillit til annarra breyta. Miðað við að meðallaun voru 519 þús. er þetta um það bil 40 þúsund á mann.

Ef konurnar eiga skilið jafnhá laun og karlar verða þær að hætta að væla og taka málin í sínar hendur. Aumingjanöldur eins og um daginn á einhverju þingi þar sem samþykkt var ályktun gegn launaleynd er náttúrlega bara algjört bull sem enginn á nokkurn tímann eftir að hlusta á.

Þetta er nefnilega fyrst og fremst stelpunum sjálfum að kenna - sorrý stelpur. Þær eru ekki að selja sig jafn dýrt og strákarnir. Sem er auðvitað óþolandi fyrir okkur strákana, að þær hæfileikaríku, vel menntuðu og kláru konur sem eru komnar inn á vinnumarkaðinn séu að undirbjóða sig. Það er bara eins og þegar Tyrkirnir koma inn í Þýskaland og taka störfin af þeim sem fyrir eru með því að undirbjóða markaðinn.

Ef fyrirtæki á kost á því að fá jafnhæfa konu og karl fyrir 100 þús. krónum lægri laun en það þyrfti að greiða karlinum, getur það hækkað laun konunnar eftir þrjá mánuði um 50 þús. og haft í vinnu hjá sér ofsakátan starfsmann fyrir vikið en samt dregið úr launakostnaði sem nemur 50 þús. kr. á mánuði (600 þús. kr. á ári.).

Þið verðið að breyta þessu stelpur. Það gerir það enginn fyrir ykkur. Seljið ykkur eins og þið eigið skilið - á fullu verði eins og við strákarnir. Sorrý aftur, það er ekkert sem Alþingi getur gert í þessu máli.

Einhvern tímann voru auglýsingar í gangi, að ég held frá VR, sem sögðu konum að bæta 50 þús. kr. við þá tölu sem þær töldu eðlilega þegar þær semdu um launin sín. Sniðugt - Líklega nákvæmlega það sem þær þurfa að gera...nema upphæðin eigi kannski að vera hærri!

Ekkert grín að vera svín og vera étinn á jólunum!

2005-06-14T00:57:00.000Z

Já, nú er búið að sleppa Mikjáli Jackson. Æi blessaður karlinn. Maður vonaði nú alltaf að svona færi. Að þessar ásakanir reyndust ekki á rökum reistar. Voðalega hlýtur hann að vera einmanna. Væri kannski bara málið að bjóða honum að búa á Íslandi. Hvar ætli Bobby Fischer búi? Er ekki laus íbúð einhvers staðar í nágrenni hans? Sæmi rokk gæti örugglega tekið hann að sér.

Alltaf erfið svona barnamál. Barnakarlar eins og ég og Mikjáll eigum þetta alltaf á hættu. Ég á reyndar engan pening til að hafa af mér í réttarhöldum en Mikjáll á þá - eða alla vega átti.

Það er nefnilega mjög auðvelt að sjá hlutina frá mismunandi sjónarhornum þegar samskipti barna og fullorðinna eru annars vegar. Ein stærsta og blautasta tuska sem ég hef fengið í andlitið í mínu skátastarfi var þegar við Skjöldungar gistum einhvern tímann uppi í skátaheimili yfir nótt, líklega nóttina fyrir sumardaginn fyrsta einhvert árið. Við láum þarna í stóra salnum eins og hráviði út um allt á dýnum og vorum að gera okkur klár til að fara að sofa. Þá rennir ein lítil, ca. 13 ára eða svo, dýnunni sinni upp að minni og hjúfrar sig upp að mér - þurfti einhverja hlýju greyið. Ég legg hendina einhvern veginn yfir hana og fer svo að sofa.

Morguninn eftir kemur einn foringjanna inn og vekur okkur. Stuttu seinna, eftir að við vorum komin á fætur, kallar hann mig inn á skrifstofu til sín og spurði mig hvort ég gerði mér grein fyrir því hvernig þetta hefði litið út. "Ha?", sagði ég, "hvað?". "Þegar ég kom inn í salinn lást þú, hálfþrítugur maðurinn, og hélst utan um 13 ára stelpu." "Ha, já", sagði ég og var nú farinn að sjá heildarmyndina. "Ég þekki þig og hafði engar áhyggjur. Hefði ég hins vegar t.d. verið foreldri sem kom þarna inn og ekki þekkt aðstæður hefði verið mjög auðvelt að sjá þetta í öðru ljósi."

Ég vissi hreinlega ekki hvaðan á mig stóð veðrið. Síðan ég var einn af krökkunum hef ég legið í hrúgu með þeim hér og þar og alls staðar og ekki þótt það neitt athugavert - hvar sem er - hvenær sem er. Allt í einu þurfti ég að fara að spá í það hvernig hlutirnir litu út, alveg burtséð frá því hvort það væri satt eða ekki. Bara vegna þess að nokkur ár höfðu liðið. Þetta fannst mér erfitt að kyngja.

Það er gríðarlega mikilvægt að vera vel á verði gagnvart alls kyns ógeðum sem elta uppi börn. Hins vegar geta mörkin oft verið ansi óljós og það sem einum finnst fullkomlega eðlilegt, finnst öðrum fullkomlega óeðlilegt. Það þarf því ekki mikið til þess að maður lendi í sömu aðstöðu og Mikjáll. Hvað þá heldur þegar um er að ræða einhverja bilaða konu sem vill ná af manni fé yfir allt saman. Þá er mjög auðvelt að vekja grunsemdir og hreinlega jarða mann því það hlýtur að vera mjög erfitt að má þennan stimpil af manni hafi maður einu sinni fengið hann.

Mikjáll barnakarl var sýknaður að þessu sinni. Vonandi mun hann einhvern tímann geta treyst fólki aftur og einhvern tímann geta haft óþvinguð samskipti við annað fólk, börn og fullorðna. Ég veit að ég get ekki annað en hugsað mig tvisvar um leggi ég hendina yfir skátabörnin mín áður en við förum að sofa, þrátt fyrir að mér finnist það beinlínis vera mitt hlutverk að bæta og auka hjá þeim öryggistilfinningu og þ.a.l. að vera til staðar fyrir þau þegar þau þurfa á því að halda.

Þetta er stundum erfiður og fólkin heimur!

Valdi Esjuna fram yfir kvöldverð á Einari Ben í kvöld í boði Agresso í Noregi. Sé ekkert eftir því. Borðaði góðan mat á föstudagskvöldið fyrir austan. Naut hverrar mínútu á Esjunni í kvöld. Við skelltum okkur ég, Birna systir, Unnur sem hafði verið á leiðinni á Esjuna í fyrsta skipti mánuðum saman og Jóhann sem er sumarstarfsmaður á framleiðslusviði OR og fór með mér á Móskarðshnjúka um daginn. Allt tókst þetta að lokum. Frábært að fara á Esjuna og rasa aðeins út eftir svona sólardag inni. Var fastur inni í fundarherbergi frá klukkan 13 til 17 í dag og þurfti því á einhverju drastísku að halda í lok vinnudags. Bara snilld!!!!

Eldspræk helgi!

2005-06-13T02:18:00.000Z

Velkominn í bloggheima Steini! Sérstaklega gaman að skoða myndirnar þínar. Hérna á blogginu getur maður masað og fjasað og hvað sem manni dettur í hug. Dagbókarfærsla í dag...enda nóg að gerast!

Búin að vera spræk og fjölbreytt helgi. Fórum vinnan í vorferð á föstudaginn í rútu austur fyrir fjall að skoða ýmsa hluta fyrirtækisins með samlokur og bjór í lestinni. Enduðum í humarveislu á Stokkseyri og loks í partýi í bænum fram eftir nóttu. Frábært!

Fór síðan í gær á þriðju tónleikana í vikunni. Nokkuð ánægður með frammistöðuna undanfarna viku. Fór á Jómfrúna í Lækjargötunni. Það eru held ég vikulegir tónleikar þar í bakgarðinum. Hitti þar Birnu systur, Unni og Ástu. Mjög gaman, gott veður, fullt af fólki og skemmtileg stemning. Fór á stuttbuxunum á hjólinu og hélt síðan áfram í góða veðrinu alveg út á Seltjarnarnes eins langt og ég komst út að Gróttu, fyrir endan og aftur til baka sunnanmegin. Elti ströndina alla leið fram hjá Nauthólsvíkinni, áfram upp Fossvogsdalinn og Elliðaárdalinn í sund í Árbæjarlaug. Hjólaði síðan heim. Fattaði það ekki fyrr en núna áðan þegar ég fór að skoða þetta að þessi hringur var 30 km langur! Þetta var ekkert mál - var ekkert að flýta mér - það var svo gott veður. Tók ca. tvo tíma. Þurfti varla nokkurn tíma að fara yfir götu. Algjör snilld!

Fór niður á Ingólfstorg í dag. Ásta dansar með "Komum og dönsum" og þau voru að dansa á Ingólfstorgi í dag. Gaman að fylgjast með þeim. Sum mjög góð. Einn dansaði við þrjár í einu og stjórnaði þeim öllum með glans. Verð kannski einhvern tímann svoleiðis... ;)

Endaði náttúrlega með því að hún dró mig með sér í einhvern hringdans, skildi mig svo eftir og ég var því allt í einu farinn að dansa tangó við fimmtuga konu sem ég þekkti ekki neitt á miðju Ingólfstorgi. Alltaf gaman að dansa! Túristarnir vissu ekki hvaðan á þá stóð veðrið. Hafa örugglega haldið að Reykvíkingar dönsuðu í miðbænum í tíma og ótíma! :)

Hitti seinni partinn Dos Sardinos, hirðhljómsveit Skátakórsins. Æfðum okkur aðeins. Erum að setja tvö lög á disk sem kórinn er að fara að gefa út. Alltaf gaman að syngja og spila með skemmtilegu fólki.

Skellti mér síðan á Star Wars í kvöld með Palla Viggós. Er svona must-see mynd. Annars er ég vægast sagt lítill áhugamaður um einhverjar geimmyndir en Star Wars er eins og Bond og fleiri - klassík sem maður bara verður að sjá. Hún var líka mjög skemmtileg og hnýtti saman nýju og gömlu seríuna sem maður man eftir síðan maður var krakki.

Jamm, fín helgi að baki. Þá er bara málið að gera vikuna jafn skemmtilega!

Ragnheiður Gröndal dugleg í ræktinni en með sára og súra fætur í Álaborg!

2005-06-09T22:31:00.000Z

Vissi ekki alveg hvernig ég gæti komið þessu í fyrirsögnina....vona að hún móðgist ekki mjög mikið stúlkukindin!

Skellti mér aftur á tónleika í gærkvöldi. Í annað skipti í þessari viku. Geri aðrir betur!!

Ég, Unnur og Ásta renndum semsagt á Næsta bar beint á mót Íslensku óperunni til að hlíða á Ragnheiði Gröndal og félaga. Mikið rosalega voru þetta flottir tónleikar! Var kominn frekar snemma og tók því frá fyrir okkur borðið næst hljómsveitinni. Með henni var kontrabassaleikari sem fór algjörlega á kostum - snilldingur - og gítarleikari sem gerði líka frábæra hluti. Þá mætti óvænt bróðir hennar, Haukur Gröndal, nokkurn veginn beint úr flugvél frá Danmörku og lék á saxafón. Hann vear ekki búinn að æfa með þeim held ég og því voru þau í því að spinna þarna á sviðinu. Þetta var algjört æði og stórkostlega að sjá hvað þessi stelpa er músíkölsk. Það hreinlega rennur tónlist um æðarnar á henni. Þarna söng hún fullt af lögum, mest einhvers konar blöndu af svörtum djass og blús og gerði það af stakri snilld. Það sem var líka athyglisvert var að hún var klárlega leiðtoginn í bandinu og taldi meðal annars inn í öll lögin. Það var því hún sem hafði tilfinninguna fyrir taktinum - hægum en samt hröðum í senn djasstakti. Frábært kvöld og ótrúlega kraftmikil en samt fullkomlega afslöppuð stemning á svona djasstónleikum. Mjög merkilegur suðupottur. Verð þó að koma einu að....mikið rosalega hlakka ég til 1. janúar 2007 þegar reykingar verða bannaðar á börum og skemmtilstöðum!! Fötin mín voru viðbjóður þegar ég kom heim og enn í kvöld, eftir að hafa verið úti í bíl í allan dag, var ógeðsleg reykingafýla af bílnum mínum. Það á skilyrðislaust að banna þetta og kasta því langt út í hafsauga!

Sárir og súrir fætur á óvissufundi
Sárir og súrir fætur hittust í gær á árlegum fundarstað sínum, Súfistanum við Laugaveg. Um er að ræða algerlega frábæran gönguhóp sem fór saman á Hornstrandir í fyrra og er á leiðinni í óvissuferð í Skagafjörðinn í júlí. Það var SVOOO gaman í fyrra að ég bíð þvlíkt spenntur eftir því að komast með liðinu norður. Um er að ræða óvissuferð þannig að við eigum bara að mæta í Varmahlíð á hádegi þann 14. júlí og þá verður lagt af stað. Þangað til fáum við ekkert að vita. Þetta var því athyglisverður fundur þar sem við reyndum að draga upplýsingar upp úr skipuleggjendum og þær reyndu að segja okkur allt sem þurfti að segja okkur án þess að kjafta því sem ekki mátti kjafta. Við vitum að við munum gista í tjaldi fyrstu nóttina einhvers staðar úti á túni nálægt á eða læk. Við vitum síðan að við fáum mat eldaðan fyrir okkur þar sem við verðum annan daginn. Ég þarf að athuga hvort ég geti ekki bara gengið með gítarinn upp úr bakpokanum. Þarf að skoða þessi trússmál aðeins betur. Hlakka ekkert smávegis til!!!!

"I just felt like it..."
Sagði Forrest Gump þegar hann var spurður af hverju hann hafi hlaupið þvert yfir Bandaríkin og hálfa leið aftur til baka. Hef núna farið í ræktina tvo morgna í röð. Byrja á því að hlaupa á brettinu í ca. 16 mínútur, geng fyrstu 2-3 mín., hleyp síðan á 12-13 km hraða upp í 10 km, 15-16 km. hraða í 2 mín upp í 12 mín markið og 17-18 km hraða í eina mínútu upp í 13 mínútna markið. Síðan róa ég niður næstu 2-3 mínútur. Þetta er ágætissprettur. Seinna mun ég reyna þetta með því að búa til smá halla. Geri það einhvern tímann. Þegar ég er búinn að hlaupa fer ég hring sem ég fékk Pálmar þjálfara í WorldClass í OR húsinu til að setja saman fyrir mig. Fínn strákur Pálmar. Mæli með honum fyrir þá sem ætla að fá sér einkaþjálfara.

Á gulu í Álaborg
Hringdi til Danmerkur í kvöld og talaði við Kristófer og Hönnu. Gaman að heyra í þeim báðum. Við Hanna stilltum af sumarið í grófum dráttum, frá því þau koma til landsins 21. júní og þar til þau fara út aftur þann 29. júlí. Erum annars mjög góð í þessu öllu saman þannig að ég hef engar áhyggjur. Þetta verður bara frábært!

Heyrði síðan í prinsinum. Mikið að gera hjá honum um helgina. Er að fara í ferðalag með skólanum á föstudagsmorguninn til klukkan hálf tvö. Fer síðan í annað ferðalag, nú með skóladagheimilinu, klukkan tvö og verður yfir nótt. Honum fannst þetta nú alveg nóg af því góða. Sérstaklega þar sem hann er síðan að fara að keppa í karate á laugardagsmorguninn og Óttar og Hanna þurfa því að sækja hann í útileguna svo hann komist í keppnina. Tók annars próf um daginn og er nú orðinn formlegur handhafi gula beltisins í karate. Ótrúlega flottur strákur!!!! Sagði að hann hefði þurft að gera eitthvað sem hann kallaði KATA nægilega flott til þess að fá beltið - annars fengju þeir ekki beltið. Var á því að það hefði tekist þar sem hann hafði jú fengið beltið. Síðan er hann að fara í afmæli á sunnudaginn. Var nú víst búnn að biðjast vægðar og óska eftir fríi í skólanum á mánudaginn vegna þessa óvænta álags um helgina. Foreldrarnir voru nú ekki alveg svo líbó og fannst honum það frekar fúlt. Sagðist líka vera búinn að búa til risastóra kónguló úr þremur Bionicle körlum. Hann er semsagt ókrýndur heimsmeistari í Lego Bionicle. Hreint ótrúlega góður!

Á morgun er síðan vorferð starfsmannahaldsins. Þá verður haldið austur fyrir fjall og endað að lokum Við fjöruborðið á Stokkseyri í humarveislu og er von á snilldardegi þar sem víða verður komið við. Já, fullt að gerast þessa dagana. Ótrúlegt hvað margt týnist til!

Nemandi!

2005-06-08T13:21:00.000Z

Já, nú er strákurinn bara orðinn nemandi.

Fékk bréf frá söngskólanum þess eðlis að ég hefði lifað þetta inntökupróf af. Jibbbíííí!!!!

Þetta verður snilldarvetur!

Bjargræðiskvartettinn brilleraði!

2005-06-07T02:03:00.000Z

Við mæðginin skelltum okkur á tónleika í kvöld. Fórum að sjá endurkomu Bjargræðiskvartettsins sem saman stendur af Erni Arnarsyni, öðrum af kórstjórum Skátakórsins; Önnu Siggu tónlistarprímusmótor í Fríkirkjunni í Reykjavík; Aðalheiði Þorsteinsdóttur (Öllu) píanóleikara sem útsett hefur mikið fyrir Skátakórinn og er að spila út um allt og Gísla Magnasyni sem hefur einnig útsett fyrir Skátakórinn og ég veit ekkert meira um!

Vissi ekkert á hverju ég átti von en bjóst við líflegum tónleikum enda á ferðinni vægast sagt líflegt fólk. Hópurinn tók 19 lög og var einu orði sagt frábær.

Ótrúlega fjölbreytt lög þar sem þau rödduðu af algjörri snilld enda á ferðinni mikið fagfólk, grínuðust og spiluðu á allt sem fyrir var. Tóku meðal annars "Jón var kræfur karl og hraustur" sem mig minnir að Utangarðsmenn hafi gert frægt hér um árið. Þar átti Anna Sigga stórleik þegar hún spilaði á koffort og teppabankara sem ásláttarhljóðfæri. Kom það verulega mun betur út en nokkrum gæti dottið í hug! Tóku einnig lög eins og fyrrnefnt lag með Utangarðsmönnum, Jóa útherja með Ómari Ragnarsyni, Riddara götunnar með HLH, Leyndarmál eftir Þóri Baldursson, Ég á mig sjálf (gamla hippalagið) og enduðu síðan á Harðsnúnu Hönnu.

Öll voru frábærlega rödduð og hvergi slegið af kröfunum þótt grínið væri allsráðandi og lögin í algjörum snilldarútsetningum sem manni hafði aldrei dottið í hug að setja saman. Þá spiluðu þau á glös, bongótrommur, gítar og andaflautu svo fátt eitt sé nefnt um leið og þau svissuðu milli hinna ýmsu búninga en Anna Sigga mætti þarna gölluð sem sjóræningi og stuttu síðar sem 7 ára strákur í "Lok, lok og læs og allt í stáli" sem var hrikalega fyndið.

Ótrúlega skemmtilegur hópur meiriháttar fagfólks sem fór algjörlega á kostum og kom á óvart í hverju lagi. Frábært kvöld og endalaust gaman að skella sér á svona tónleika öðru hverju.

Nú er bara að vinna í að plögga þeim á árshátíðina í haust. Fer að vinna í því máli... :)

Fyrsti sólbrunin - Útilífshelgi

2005-06-06T02:01:00.000Z

Já, það er svo sannarlega komið sumar. Helgin var nefnilega bara með þeim sprækari.

Jóhann, vinnufélagi minn kom til mín seinni partinn á föstudaginn og spurði hvort ég vildi koma með á Móskarðshnjúka (austast í Esjunni). Ég hélt það nú og eftir vinnu renndum við uppeftir og borðuðum m.a. á toppnum það sem eftir var af afmælistertu Sólrúnar, einnig vinnufélaga míns, en hún hélt kökupartý í vinnunni í föstudaginn í tilefni af því að vera orðin "dirty too".

Þegar ég var hálfnaður niður hringdi Unnur í mig og var á leið í útilegu með Jónínu, litlu frænku sinni 16 ára, á Þingvelli, ætlaði að vera þar um nóttina og spurði hvort ég vildi koma með. Auðvitað vildi ég það þannig að ég var ekki í bænum í nema 20 mínútur eftir að ég kom af fjalli og þá renndum við austur. Þar var svakafínt veður og á laugardagsmorguninn brann ég meira að segja! Jibbííí, fyrsti sólbruninn þetta árið. Klárlega vorboði.

Renndum í bæinn á laugardeginum og ég skellti mér í brúðkaup. Sú sem var að gifta sig heitir Dagmar Ásmundsdóttir og giftist hún Geir Hagalínssyni. Dagmar var dagmömmubarn hjá mömmu í gamla daga áður en hún fór í sex ára bekk og var því "litla systir" mín um tíma. Mér hlýnaði alla vega um hjartaræturnar í gær þegar hún kallaði mig stóra bróður! :) Heljarinnar veisla og mikil gleði þangað sem komu m.a. danshópur frá Færeyingafélaginu og dreif alla út á gólf í færeyska hringdansa. Stórskemmtilegt!!!

Frænkurnar voru enn sprækar eftir veisluna og var því ákveðið að skella sér bara í aðra örútilegu. Nú renndum við upp í Heiðmörk og sváfum þar, kannski eins gott að við fórum ekki austur því þar var 4 stiga frost í nótt!

Kom síðan heim í dag, tók því rólega yfir daginn og skellti mér svo út, hljóp 5 km og fór í sund.

Fór í kvöld á æfingu með Los Sardinos, kórbandi Skátakórsins og loks í bíltúr með Ástu og Guðrúnu sem ég hafði ekki séð í hálfan mánuð eða svo og var því kominn tími til.

Já, svei mér þá ef strákurinn hefur ekki bara tekið lit um helgina! Það er svo sannarlega komið sumar!

En hvað gerðir þú skemmtilegt um helgina?

Austur-Evrópa here we come!

2005-06-03T02:32:00.000Z

Söng með Orkuveitukórnum í Elliðaárstöðinni í kvöld. Stóðum okkur nokkuð vel. Allt blaðalaust og án kórstjórans! Rosalega hefur Árni Heiðar unnið gott starf. Það að kórinn geti komið svona fram skammlaust án hans ber vott um algerlega frábæra kórstjórn! Sungum fyrir stjórn dótturfyrirtækis OR frá Slóvakíu. Guðjón Magnússon ofurplöggari kom þeirri hugmynd af stað að þeir biðu okkur að syngja í Slóvakíu að ári. "Lítið mál" sögðu þeir þannig að við erum líklega á leiðinni næsta vor til Slóvakíu. Fyrst það er planið hví ekki að fara til Prag og Búdapest líka. Borgarstjórinn í Búdapest hefur eitthvað verið að vinna með OR líka. Já, það eru endalaust skemmtilegir hlutir sem detta inn á borð hjá manni.

Skemmtileg mánaðarmót. Næ líklega að greiða niður skuldirnar mínar um meira en 150 þús. kr. Svona er að búa á hótel mamma og pabbi. Þá gengur þetta hratt og örugglega! Rumpum þessu af og komum okkur síðan í framhaldsnám. Hvert á maður að fara? Hvað á maður að gera? Langar svo margt. Býst samt við því að svona upplýsingakerfi eða uppbyggingu information structure einhvern veginn verði fyrir valinu. Finnst það svolítið skemmtilegt. Þekking, upplýsingar og það hvernig þetta flæðir um fyrirtækið. Allt mjög spennandi. Síðan eru markaðsmálin alltaf bakvið eyrað. Gallupgenið er enn á sínum stað. Langar líka alltaf svolítið í fjármálin. Held það sé skemmtilegur leikur. Já, það er svo margt skemmtilegt hægt að gera!!! Kannski maður ætti bara að læra þetta allt! Upplýsinga, fjármála og markaðsverkfræði. Já, þá væri maður nú flottur - eða farinn yfir um, annað hvort!

Laun, línuskautar, maraþonkóræfing og næsti vetur!

2005-06-01T02:05:00.000Z

Jæja, nú er strangri törn lokið í launadeildinni. Alltaf action fyrir mánaðarmótin og núna sínu meiri en áður þar sem ég þurfti að taka svolítið í gegn ofurleiðréttingarexcelskjalið mitt frá því um síðustu mánaðarmót þar sem við leiðréttum 300 manns 2 1/2 ár aftur í tímann. Þess utan erum við að ráða um 250 sumarstarfsmenn þannig að það er nóg að gera á Bæjarhálsinum þessa dagana.

Fórum nokkur úr starfsmannahaldinu á línuskautanámskeið í kvöld. Stórskemmtilegt. Vorum í skautahöllinni í Laugardalnum þar sem það rigndi svolítið úti. Auðvitað var maður alveg eins og belja á svelli en komst þó merkilega áfram og datt bara einu sinni. Komst að því að ég er líklega svolítið útskeifur. Kannski ástæðan fyrir því að ég vel yfirleitt bæði hafi ég um tvennt að velja!

Fór síðan á seinustu skátakórsæfingu vetrarins. Þetta var maraþon æfing, haldin í safnaðarheimili Fríkirkjunnar í Hafnarfirði þar sem Erna og Örn sjá um tónlistarstarfið. Fyrst æfðum við svolítið og svo fluttum við okkur yfir í kirkjuna og tókum upp hvorki meira né minna en fjögur lög. Ótrúlega duglegur hópurinn í kvöld. Þá er þessi sérlega skemmtilegi vetur á enda. Frábær hópur og hvet ég alla til að slást í hópinn. Sérstaklega ef þú ert tenór. Okkur vantar fleiri tenóra. Eru bara 3-4 yfirleitt á æfingum. Þyrftu að vera ca. helmingi fleiri.
Munum hittast næst á landsmóti skáta, laugardaginn 23. júlí á Úlfljótsvatni og syngja hér og þar um svæðið okkur og vonandi fleirum til ánægju og yndisauka.

Skátakórinn hefur löngum farið ótroðnar slóðir í lagavali. Við njótum náttúrlega þeirrar sérstöðu að syngja skátalög sem engir aðrir kórar gera. Ætlum að halda þeirri sérstöðu næsta vetur með því að syngja popplög. Erum búin að skoða efni með Bee Gees, Beach Boys, Queen og fleiri hljómsveitum. Næsti vetur gæti því orðið verulega skemmtilegur og öðruvísi, en jafnfram mjög krefjandi. Hlakka til!

Skattmann & Tollmann eiga mikið verk óunnið

2005-05-31T23:35:00.000Z

Tók mér frí seinni partinn í dag. Maður nennir eiginlega ekki að gera neitt eftir spennufallið þegar launakeyrslan fer úr húsi. Heimsótti meðal annars vin minn Tollstjórann í Reykjavík. Hef heimsótt hann nokkuð reglulega upp á síðkastið þar sem hann hagar sér með mjög sérstökum hætti í mínum málum og mætti nýta starfsfólk verulega betur á þeim bænum með bættri notkun upplýsingatækni.

Dæmi: Við Gunna stofnuðum fyrirtæki í kringum blómabúðina á sínum tíma. Sökum slóðaskapar kláruðum við ekki að ganga frá bókhaldinu fyrir 2003 og 2004 fyrr en um síðustu áramót. Sendum þá inn skattaskýrslu 2004 (rekstrarárið 2003) og barst hún Skattstjóra þann 1. febrúar síðastliðinn.

Þann 7. apríl trítlar Sigginn niður í Tollstjóra og greiðir staðgreiðsluna (tæpar 20 þús. krónur) sem við drógum af þeim launum sem við skrifuðum á okkur og áttum að gera skil á ásamt tryggingargjaldi. M.ö.o. ég gerði upp skattinn og allt átti því að vera fullgreitt.

Stuttu seinna fæ ég bréf um að skattaskuldin upp á rúmlega 800 þús. sé komin í fjárnám. Þetta virkar nefnilega þannig að ef þú skuldar skattinum eitthvað þá áætlar hann bara svolítið ríflega á þig og byrjar síðan bara að rukka þig um þá upphæð þangað til þú sýnir honum fram á að hún sé ekki rétt. Ég átti semsagt að mæta hjá Sýslumanni í byrjun maí vegna ógreiddrar skuldar þar sem áætlunin var rúmlega 800 þús. á skuld sem var í rauninni um 20 þús.

Hefðu þeir bræður Tollstjóri og Skattstjóri nýtt sér upplýsingakerfin sín hefðu þeir komist að því að a) ég var búinn að leggja inn skattaskýrsluna (1. febrúar) og hún var á stafrænu formi þannig að þeir hefðu einfaldlega geta sótt þangað þær lykiltölur úr rekstrinum sem skiptu máli og því ekki þurft að áætla (800 þús.) heldur verið með rauntölur (20 þús.) og hins vegar það b) að ég var búinn að greiða skuldina 7. apríl eða næstum mánuði áður en fjárnámið átti sér stað.

Þess í stað þurfti ég í byrjun maí að fara úr vinnu, niður í Sýslumann og hitta þar tvo aðra fullfríska einstaklinga og þarna sátum við og eyddum tíma í mál sem var í rauninni ekki til. Vegna þess að 800 þús. kr. skuldin var í rauninni 20 þús. kr. skuld og þar á ofan löngu greidd.
Þetta kallar maður að sóa tíma starfsmanna sinna í ekki neitt. Ef ég væri eitthvað einsdæmi þá væri þetta kannski næstum því í lagi en væntanlega eru í gangi þúsundir svona mála í kerfinu og þarna sitja hinir tveir allan daginn alla daga með mismunandi Siggum og ræða mál sem eru í rauninni ekki nein mál. Í stað þess að nota upplýsingatæknina til að frysta áætlanir þeirra sem búin eru að skila skattskýrslum þangað til búið er að fara yfir þær og taka þá einungis fyrir raunverulega skuld þegar og ef hún raunverulega er til staðar þegar loksins er búið að fara yfir skattaskýrsluna. Það var semsagt ekki ennþá búið í dag þegar ég fór niður eftir þó svo hún hafi verið send inn 1. febrúar. Já, það er margt skrítið í kýrhausnum!

Ps. Það ánægjulega er hins vegar að beibstuðullinn virðist eitthvað fara hækkandi meðal þjónustufulltrúa hjá Tollstjóra og gerði það heimsóknina verulega mun ánægjulegri en oft áður. ;)

Hvenær drepur maður mann og hvenær drepur maður ekki mann?

2005-05-29T18:34:00.000Z

...sagði Jón Hreggviðsson enda er heimurinn ekki svartur og hvítur heldur oftast nær bara misjafnlega grár. Var að lesa úttekt Fréttablaðsins á sölu bankanna, fyrstu tvo hlutana. Æsispennandi reifari, raunveruleikasjónvarp úr íslenskum samtíma. Það hlýtur að vekja ákveðnar spurningar...

Ein lykilspurninga hvers stjórnanda í fyrirtækjum eða samfélögum er sú hvenær hann eigi að vera við stýrið og stjórna og hvenær hann eigi að fylgjast með úr fjarlægð. Almenna reglan er sú að því stærra og mikilvægara sem verkefnið er þeim mun betri innsýn vill stjórnandinn hafa í framgang og niðurstöðu verkefnisins.

Salan á bönkunum er dæmi um þetta. Klárlega eitt af stóru verkefnum undanfarinna ára. Verkefni sem myndu hafa veruleg efnahagsleg áhrif á íslenskt samfélag næstu áratugina.

Ef ég eða þú hefðum verið í stöðu Dabba og Dóra hefðum við átt að a) blanda okkur í framþróunina sem fulltrúar í stýrihópi (ráðherrahópnum) verkefnisins og hafa þannig áhrif á niðurstöðu þess (samfélaginu til heilla - eða ekki) eða b) láta fyrirframskilgreint ferlið um atburðarásina?

Er eðlilegt eða ekki eðlilegt að þeir sem ráðnir eru sem stjórnendur séu virkir í jafn stórum atburði og sölu bankanna? Er eðlilegt að þeir haldi sig bara þeygjandi á hliðarlínunni? Eru þeir þá að axla ábyrgð sína?

Hvað finnst ykkur?

Vorhátíð Skátakórsins - Útitónleikar & Grill

2005-05-28T14:56:00.000Z

Útitónleikar og grill við þvottalaugarnar í Laugardal laugardaginn 28. maí kl. 16.

Á morgun laugardaginn 28. maí kl. 16 heldur Skátakórinn vorhátíð í Laugardal, nánar tiltekið við gömlu þvottalaugarnar í nágrenni Skautahallarinnar.

Þungamiðjan í efnisskránni verða létt og skemmtileg skátalög sem kórinn hefur verið að taka upp á disk í vetur og er stefnt að útgáfu í sumar. Kórstjóri er Erna Blöndal og Örn Arnarson leikur undir á gítar.

Mótssöngur landsmóts 2005 - Frumflutningur kórsins
Landsmót skáta 2005 verður haldið að Úlfljótsvatni í 19.-26. júlí. Á tónleikunum frumflytur kórinn mótssönginn en hann hefur ekki verið sunginn af kórnum opinberlega áður. Textinn er eftir Kristján Hreinsson og lagið eftir Hrafnkel Pálsson, gítarleikara hljómsveitarinnar Í svörtum fötum og útsetningu fyrir Skátakórinn annaðist Aðalheiður Þorsteinsdóttir.

Grillað úti í vorinu Eftir tónleikana verður slegið upp grilli og eru tónleikagestir hvattir til að mæta með eitthvað gott á grillið. Höfum gaman saman úti í vorinu í Laugardalnum!

Listir og sólarlag!

2005-05-28T02:01:00.000Z

Búinn að fá þráðlausa netið mitt til að virka heima. Ekki búið að virka á fartölvunni í 2 mánuði. Núna verður maður því oftar on-line heima.

Tók í inntökupróf í Söngskólanum í dag. Já, alltaf að prófa eitthvað nýtt! Blastaði þar yfir hóp af söngkennurum, Garðari Cortes, Ólöfu Kolbrúnu Harðardóttur og fullt af öðru liði. Það var líka tónheyrnarpróf sem var nú ekki mjög erfitt. Píanóleikari spilaði tvær og tvær nótur saman og maður átti að syngja annað hvort efri nótuna eða þá neðri. Nokkuð sniðug tónheyrnaræfing. Nokkuð skemmtilegt próf!

Fór síðan með Unni í Loftkastalann í kvöld á Múlan Rús sem FG er að setja þar upp. Flott sýning og aðalleikkonan hreinlega sló í gegn. Var ótrúlega öflug í mjög erfiðu og fjölbreyttu hlutverki. Svaka gleði og drama í bland, söngur, dans og alles. Rosalega öflug stelpa - stal alveg senunni!

Sátum reyndar að 2 bekk fram að hléi. Mæli ekki með því. Sáum reyndar upp undir pilsin hjá tuttugu stelpum eða svo en þar var ekki mikið að sjá enda kappklæddar. Dettur líka svolítið erótíska edge-ið úr þessu þegar maður sér gömlu sumarbúðabörnin sín dansandi uppi á sviði. Þá einhvern veginn hættir þetta að vera sexý og verður bara skemmtilegt í staðinn. :) Vissum líka alveg hver var með fæðingarbletti og í hvernig skóm liðið var. Vantaði hins vegar alveg "breiðtjaldsfídusinn".

Færðum okkur á fjórða eða fimmta bekk eftir hlé og þá fór maður loksins að sjá sýninguna sem varð alltaf betri og betri!

Stóðst ekki mátið eftir leikhúsið þegar ég var búinn að skila Unni heima og renndi út á Seltjarnarnes, settist á stein og horfði á sólina setjast. Var hrikalega flott að horfa yfir Snæfellsnesið og jökulinn og hreint með ólíkindum hvað hún hverfur hratt þegar hún er komin á bakvið fjöllin á annað borð. Þarna var fullt af bílum og fólki í sömu erindagjörðum enda sólarlagið eins og það gerist flottast. Já, synd að segja að þetta hafi ekki verið fjölbreyttur dagur.

Einn og hálfur tími í inntökupróf...

2005-05-27T14:58:00.000Z

Var sagt að ég þyrfti ekki að fara í inntökupróf í Söngskólann. Það var hins vegar misskilningur og nú gengur það í garð kl. 16:30, eftir einn og hálfan tíma. Spitt spitt...nú er bara að hössla þetta lið og syngja annað hvort svo vel að það vilji mann inn í skólann eða svo illa að það vilji ekki þurfa að hlusta á mann í öðru inntökuprófi á næsta ári. Sjáum til hvort verður!

Í kvöld er það síðan Múlan Rús í Loftkastalanum og á morgun tónleikar og grill með Skátakórnum við Þvottalaugarnar í Laugardalnum. Annars verður þetta vinnuhelgi. Margt sem þarf að klára vegna útborgunar eftir helgi....Action action action!

Pólitíkin er skrítin tík...!

2005-05-24T10:03:00.000Z

Já, Imba Solla kom sá og sigraði hjá Samfylkingunni um síðustu helgi ásamt Gústa litla. Haft var eftir bónda að norðan að þetta helv... væri orðið alveg eins og heima, konurnar og börnin stjórnuðu öllu!!

Álit mitt á Össuri jókst verulega um helgina. Það er ekkert mál að vera sigurvegari en það tekur á að komast vel frá því að tapa. Hann hefði svo auðveldlega getað misst sig í einhver leiðindi, sagt að allir væru vondir við sig og fengið sína menn á eftir sér í einhvern ríg en skildi þess í stað eftir stóran og sameinaðan flokk sem hefur aldrei verið stærri. Hann hefur klárlega sinnt ljósmóðurhlutverkinu af stakri snilld undanfarin ár eftir sameininguna (þótt hörðustu kommarnir hafi reyndar farið í Vinstri græna - sumir kalla Samfylkinguna reyndar Hægri rauða!). Eins og oft vill vera með frumkvöðlana þá var rétt að skipta um manninn í brúnni fyrir átök næstu missera. Svo missti hann mömmu sína strax eftir kveðjuræðuna, blessaður. Sjaldan er ein báran stök í sjö vindstigum. Nú er svo bara að sjá hvort Imba Solla skilar einhverju þannig að maður hafi áhuga á að kjósa þá næst.

Hef aldrei gert það. Hef hins vegar kosið R-listann. Finnst heppilegt að skipta um lið í brúnni á ca. 10 ára fresti. Það er að koma tími á það í borginni en þar hefur Sjálfstæðisflokkurinn verið algerlega höfuðlaus her síðan Davíð fór og verður það þangað til (og þetta hef ég sagt í líklega 7 ár eða svo) Kristján bæjarstjóri á Akureyri flytur í bæinn og tekur við borginni. Ég er viss um að það gerist fyrr eða síðar. Bíðið bara!

Er ánægður með Davíð og Halldór þegar á heildina er litið. Þeir eru að skila mjög góðu starfi. Auðvitað má alltaf gera enn betur, sérstaklega í velferðarmálunum en það verður líka að eiga fyrir hlutunum þegar hugsað er til langs tíma. Það er hins vegar alltaf spurning í öllum löndum hvort skynsamlegt sé að sömu menn séu við völd í 15 ár eða meira. Þá er embættismannakerfið orðið algerlega gegnsýrt af fólki með sömu skoðanir og svolítið farið að úldna innan frá. Ríkið hefur reyndar verið að taka mjög til í sínum ranni undanfarin ár hvað snertir árangursstjórnun en þó er full ástæða til að hafa varann á. Veit þó ekki hvað ég kýs næst. Það verður bara að koma í ljós hvað verður í boði.

Kaus síðast Framsókn. Hef ekki gert það áður. Það var bara það eina sem var í boði. Samfylkingin var bara barn og hafði nóg með að stjórna sjálfri sér, hvað þá heldur að reyna að stjórna einhverju öðru. Davíð var á hormónaflippi vegna blöðruhálskirtilsins, talaði tóma steypu og tók ennþá fleiri geðþóttaákvarðanir en venjulega; eins og þegar hann tók í bræðiskasti sparnaðinn sinn út úr KB-banka og heimtaði að jafnvel lífeyrissjóðirnir gerðu slíkt hið sama vegna þess að nokkrir menn í bankanum voru með of há laun að hans mati. Það væri náttúrlega hreinn glæpur ef lífeyrir landsmanna væri ávaxtaður á grundvelli launa nokkurra bankastarfsmanna í stað þess að vera ávaxtaður á grundvelli hámarksávöxtunar! Ekki gekk því að kjósa Dabba í það skiptið og ekki fer ég að kjósa Vinstri græna Jesús minn! Þá voru bara tveir möguleikar eftir: Að bjóða fram sjálfur eða kjósa Framsókn. Nennti ekki í framboð þannig að ég valdi hinn möguleikann. Já, hún er skrítin þessi pólitík!

Söngur, dans og Los Sardinos!

2005-05-23T20:55:00.000Z

Það verður ekki annað sagt en að kórpartý Orkuveitukórsins sem haldið var á föstudagskvöldið hafi farið ansi verulega fram úr væntingum. Átti von á tiltölulega rólegu eldriborgaraboði en bjóst við nokkrum söng. Þess í stað varð úr þessu fimm tíma snilld! Ég mætti með gítar, annar með harmonikku og á staðnum var forláta píanó. Kvöldið hófst á skemmtilegu spjalli þangað til ein af aldursforsetum hópsins, pínulítil kona að verða sjötugt greip nikkuna, spilaði af krafti í þrjú korter eða svo og blés ekki úr nös. Þá tók eigandi nikkunnar við í annan klukkutíma og þegar honum lauk þriðji kórfélaginn. Sá er fagmaður í bransanum, lék og djassaði á nikkuna sem óður væri. Með slíkan snilling á nikkunni stóðst kórstjórinn ekki freistinguna, settist við píanóið (maðurinn er með doktorspróf í píanóleik) og svo var djassað og djammað í bland við hin ýmsu lög, kokkinn og fleira. Þeir héldu áfram fram undir miðnætti og var dansað þarna upp um alla veggi. Eftir ballið fór gítarinn í gang og var sungið með honum og nikkunni fram á nótt. Hreint ótrúlega sprækur hópur og meðalaldurinn líklega hátt á sextugsaldurinn. Já, maður þarf sko ekki að örvænta hvað aldurinn snertir eftir svona partý!

Hafði áður farið í 10 ára afmæli til Teymis þar sem var salsaþema og allar stelpurnar með blóm í hárinu. Stöðug skot á einn starfsmanninn þarna sem í London með okkur í fyrra át eitt blóm eða svo en ákvað að hafa það í hárinu að þessu sinni.

Rólegheita laugardagur. Snatt hér og þar þangað til ég fór upp í vinnu. Vann nú ekki mikið því allur tíminn fór í Skátakórsmál. Ætluðum að halda tónleika uppi við Hvaleyrarvatn en það klikkaði. Ég fór því í tveggja tíma göngutúr um Elliðaárdalinn í leit að tónleikastöðum. Fann tvo og annan sínu betri en hinn. Kannaði í morgun (mánudag) hvort hægt væri að nota hann en svo var ekki. Er því búinn að finna þriðja staðinn og verður vorhátíð Skátakórsins haldin í Laugardalnum við gömlu þvottalaugarnar, næstkomandi laugardag kl. 16. Skemmtilegur staður í hjarta borgarinnar en samt í rólegheitum fjarri ys og þys borgarinnar. Spáð sól og blíðu um næstu helgi þannig að þetta verður gott frábært. Allir mæti með eitthvað á grillið og svo er bara að syngja með!

Sardínurnar héldu æfingu í gærkvöldi. Skemmtilegt. Sardínurnar - Los Sardinos - er laukur út frá Skátakórnum, þeirri merku menningarstofnun og sérhæfir sig í ýmsu með suðrænum blæ. Enduðum niðri í Hinu húsi hjá Hauki og höfðum þar snilldaraðstöðu. Spiluðum og rödduðum þar nokkur lög - skemmtilegt og fín æfing í því að radda. Hef ekki mikið verið í svona hljómsveitum. Stefnum að því að koma lagi á Skátakórsdiskinn og jafnvel ef við verðum í æfingu að koma fram á laugardaginn. Það verður þó að koma í ljós.

Svona fór um sjóferð þá!

2005-05-20T00:23:00.000Z

Greyið Selma tapaði á náttfötunum í Kiev. Hún og þær stöllur stóðu sig samt með mikilli prýði eins og hennar var von og vísa. Svakalega öflug stelpa og mikill fagmaður. Lagið var líka fínt. Málið var bara að það var fullt af fólki þarna að gera svipaða hluti þannig að lagið stóð ekkert út úr að neinu leyti. Við þurfum gott lag + sérstöðu til að gera einhverja hluti í þessari keppni. Nojararnir komust áfram vegna þess að þeir höfðu sérstöðu og þegar þú varst búinn að heyra öll lögin þá mundir þú ennþá eftir því að þeir höfðu tekið þátt. Selma greyið var gleymd. Hún var bara ein af fjöldanum.

Tillaga: Næst sendum við Jóhönnu Guðrúnu. Öflug stelpa, ca. 14 ára eða svo. Getur sungið, hefði sérstöðu og þetta trikk virkaði síðast með J'aime la Vie þegar Sandra Kim vann 1986. Sérstaða er lykilatriði þegar þú hlustar á tuttugu og fimm lög í röð. Annað hvort hefurðu sérstöðu, hver svo sem hún er, eða gleymist.

Gaman líka að sjá Lovísu og Álfrúnu saman í dansarahópnum. Ég vann með Lovísu í sumarbúðunum á Úlfljótsvatni 1993, rosalega skemmtileg stelpa og strax þá á fullu í dansinum. Einmitt þá var Álfrún sumarbúðabarn hjá okkur Lovísu og fleirum. Frábær krakki. Ein af þessum leikarabörnum sem maður vissi frá upphafi að yrði leikkona. Brilleraði á öllum kvöldvökum og hvar sem hún opnaði munninn.

Gott að Selma varð SOS sendiherra. Hún hefur þá eitthvað að gera í Úkraínu annað en að drekkja sorgum sínum fram yfir helgi. Já, svona fór um sjóferð þá!

Út og suður þrumustuð!

2005-05-19T23:29:00.000Z

Renndi í tjaldútilegu frá laugardegi fram á sunnudag upp að Djúpavatni á Reykjanesi. Þurfti á því að halda að sofa í tjaldi. Mmmm það var svo ljúft! Þurfti líka að lesa yfir RAP. Er í hópi á vegum Bandalags íslenskra skáta sem á að leiða endurskoðun á dagskránni. RAP stendur fyrir Renewed Approach to Programme og er stuðningsefni sem gefið er út af Evrópuskrifstofu skáta. Lá þar í blíðunni og fegurðinni, drakk kakó og Stroh og las yfir RAP-efni. Komst eitthvað af stað en betur má ef duga skal.

Fór síðan í Klink og bank á sunnudagskvöldið. Í meira lagi sérlega athyglisvert hús - og fólkið sem ég því er. Það er einhver stórskrítinn Þjóðverji með sýningu í kjallaranum sem við fórum í gegnum í myrkri - öfugt. Heitir Schliesenbergen eða eitthvað svoleiðis. Er að spá í að kíkja á hana frá réttum enda einhvern daginn. Stórskrítinn og mjög ólíklegt að maður komi út sem sami maður og maður var þegar maður fór inn. Vá! Rosalega voru þetta margir menn í einni setningu!!

Kóræfing á þriðjudaginn þar sem við tókum upp tvö lög fyrir diskinn. Fór síðan á Esjuna eftir vinnu í gær. 56 mínútur á Þverfellshornið. Gæti með látum meikað það á nokkrum mínútum skemmri tíma en þó ekki mikið. Maður verður kominn niður í 50 mín. þegar líða tekur á sumarið. Samt allt í fína að fara þetta rólegheitum líka. Þá leggur maður bara af stað með öðru hugarfari í sólinni.

Eftir Esjuferðina bauð Ásta mér í grill. Lánaði henni gasgrillið mitt um daginn sem ég vann á árshátíð OR síðastliðið haust. Var á því að ég yrði ekki að saddur af grilli sem væri ofan í kassa. Það stóð heima! :) Fór þaðan á 1. stjórnarfund Skátakórsins í Hafnarfirðinum. Komumst yfir mörg mál og skemmtileg. Ef fram fer sem horfir verður næsti vetur verulega skemmtilegur og mun koma mikið á óvart.

Í dag söng Orkuveitukórinn svo í hádeginu og held ég að það hafi bara gengið nokkuð vel. Þetta er orðinn ágætiskór undir stjórn Árna Heiðars sem var sko ekki hægt að segja um hann í haust. Árni hefur lyft Grettistaki í vetur með ótrúlegu æðruleysi, þolinmæði, fagmennsku og hæfni í mannlegum samskiptum. Topp strákur og magnaður píanóleikari.

Teymi er 10 ára á morgun. Mikið partý í uppsiglingu. Þar á eftir kórpartý OR kórsins sem verður örugglega ekki rólegra og mikið sungið með gítar og píanó. Langar síðan í sumarbústað laugardag fram á sunnudag. Vill einhver koma með? Er að spá í að leigja bústaðinn í Svartagili í Borgarfirði. Er víst æðislegur bústaður og var laus í dag. Kanna málið - Kemur í ljós hvernig þetta þróast...

Vegslóðakönnunarárátta!

2005-05-14T22:50:00.000Z

Er haldinn ákveðinni áráttu þegar kemur að vegaslóðum. Könnunargenið í mér er risavaxið og hafi ég ekki farið einhvern veg eða viti ekki hvert hann liggur kviknar hjá mér óslökkvandi þörf til að kanna hann til hlýtar. Fer ekki alltaf mjög vel saman við að eiga smábíl eins og Ford Fiestu!!! Var reyndar búinn að sannfæra gömlu Fiestuna um að hún væri jeppi. Er að vinna í þeirri nýju.

Byrjaði á leiðnni heim frá Henglinum á því að keyra nýjan veg sem liggur inn að borholustæði við Engidalsánna vestan við Hengilinn. Á leiðinni til baka sá ég annan slóða sem ég hafði ekki prófað. Beygði út á hann og hófst þá nokkur svaðilför. Komst fljótlega að því að þarna var um að ræða línuveg með háspennulínunni. Var hann stundum svolítið grófur - svo ekki sé djúpt í árina tekið - en með þolinmæði, árverkni og hægum akstri komst ég þetta smátt og smátt. Þetta tók hins vegar mun lengri tíma en ég bjóst við.

Þegar ég var búinn að lúsast áfram þarna lengi lengi þá kom ég að brekku sem ég komst varla upp. Prófaði þá aðra leið og endaði inni á krossbraut og var kominn hluta úr hring þegar ég ákvað að mótorkross og Ford Fiesta væri kannski ekki málið og snéri við. Já, svona er maður nú orðinn þroskaður! ;) Fór aftur til baka og lét vaða upp erfiðu brekkuna. Tókst í þriðju tilraun og stækkaði jeppagenið í Fiestunni nokkuð við það. Passaði mig nú samt á því að fara vel með hana greyið og held ég að hún sé alveg sátt við mig eftir daginn.

Vegurinn byrjaði við Kolviðarhól og endaði ekki fyrr en ég kom út á þjóðveg númer 1 stuttu neðan við Bláfjallaafleggjarann löngum tíma og vegi síðar! Var oft búinn að velta þeim slóða fyrir mér. Veit nú hvert hann liggur og svei mér þá held ég að ég láti hann vera þangað til stóri bróðir Fiestunnar verður keyptur eitthvert árið!

Eðaldagur á Hengli!

2005-05-14T22:24:00.000Z

Já eðaldagur! Var mættur upp í skíðaskála í Hveradölum klukkan tíu í morgun, laugardag. Þar voru mættir á annan tug Orkuveitustarfsmanna og maka á leið í gönguferð um Hengilsvæðið. Markmiðið var að labba yfir Skarðsmýrarfjallið og inn í Innstadal en var ákveðið að hverfa frá því þar sem mjög mikil þoka var á fjallinu og hefðum við því ekki séð nokkurn skapaðan hlut.

Því var keyrt inn fyrir skátaskálanna og síðan gengið sem leið lá inn í Innstdal meðfram Skarðsmýrarfjallinu nokkurn veginn inn í botn og síðan til baka hinum megin í dalnum, gegnum Miðdalinn og niður í Fremstadal. Hengladalsáin var vaðin, borðað nesti og síðan keyrt á bílum að borholum Orkuveitunnar þar sem okkur var sagt frá hinu og þessu. Enn var haldið áfram niður Hellisskarðið þar sem hægt er að sjá eina af elstu veghleðslum á landinu og þar sem nýja stöðvarhúsið á að vera. Þá skoðuðum við pípulager sem er neðan við Hamragilið. Vá!!! Þvílíkt magn af pípum. Skipta örugglega hundruðum! Prófið að fara þarna og sjá. 18 metra langar og nýþungar þannig að hver vörubíll tekur bara 3 stykki í ferð. Ærslabelgirnir í ferðinni; ég, Sigrún og Guðný þurftum auðvitað að prófa að fara í gegnum rörin. Skemmtilegt og ótrúlega magnaður hljómur inni í svona röri!

Síðan var endað aftur við skíðaskálann í Hveradölum. Fararstjórar voru Einar Gunnlaugsson sem er jarðfræðigúrú Orkuveitunnar og Kristinn H. Þorsteinsson sem er gróðurgúrú Orkuveitunnar og þegar þessir tveir koma saman er ekki ýkja margt sem þeir vita ekki. Frábærir fararstjórar! Sólin var meira að segja farin að berjast í gegnum skýin í lokin. Meiriháttar ferð um það svæði sem maður eyddi unglingsárunum á. Af hverju er maður ekki duglegri að fara svona og labba? Þetta er svo æðislegt þegar maður er kominn af stað!

Upptökum frestað um sinn...

2005-05-13T01:59:00.000Z

Ákveðið var að fresta upptökum á DVD disknum um hálfan mánuð eða svo. Það er ágætt þá höfum við aðeins meiri tíma til að finna okkur lag og læra það. :)

Brjálað að gera í vinnunni...er enn að nú klukkan 2 eftir miðnætti og er á þessu augnabliki að bíða eftir því að ná miklu magni af gögnum út úr blessaðri tölvunni. Hún er semsé að vinna í þessum töluðu orðum og ég dunda mér bara á meðan.

Hvað ætti maður að gera um helgina? Hvítasunnuhelgina! Einhverjar hugmyndir?

Hugsanleg Hengilsganga á laugardaginn með OR...annars bara ekkert planað. Hvað kallar maður svoleiðis: jú, tækifæri!

Vika hinna óvæntu uppákoma...

2005-05-11T23:24:00.000Z

Listagyðjan ríður ekki einteyming þessa vikuna.

Skráði mig óvænt í alvörunám í Söngskólanum í gær eins og þekkt er orðið. Fór í annan söngtíma til Sigga Braga í dag. Tekin sú strategíska ákvörðun að ég syngi "Hættu að gráta hringaná", "Mamma ætlar að sofna" og "Snert hörpu mína" í inntökuprófinu sem ég fer í líklega 27. maí. Eins gott að lifa það af! Þarf líka að læra textana. Má ekki vera með blað. Úff!

Tónleikar hjá Orkuveitukórnum og Kór Landsvirkjunar í gærkvöldi í Grensáskirkju. Mjög ánægjulegt að það var fullt út úr dyrum í kirkjunni, kvöldið mjög notaleg stund og almenn ánægja með tónleikana. Við í Orkuveitukórnum sungum fimm lög, síðan söng Landsvirkjunarfólk sín lög og að lokum söng sameinaður 55 manna kór "Sofðu unga ástin mín" og "Úr útsæ rísa Íslands fjöll", sem er svona testósteron-þjóðrembulag, með miklum glæsibrag og látum. Stórskemmtilegt!

Í dag renndi síðan Guðjón MND-töffari í flasið á mér og spurði hvort Agressobandið yrði ekki örugglega með á DVD disknum "Ljóð í sjóð" sem verður jóladiskurinn í ár. Þarna verða hinir ýmsu tónlistarmenn s.s. Hörður Torfa, Rúni Júl, Gísli Helgason og um fimmtán aðrir og verður tekið upp í Kling og bang fimmtudag og föstudag. "Aaaa....uuuuu.....ég hafði nú eiginlega hugsað mér að aðstoða með því að flytja til dæmis kassa frá einum stað til annars en ekki endilega með því að flytja lög", sagði ég frekar hissa. "Ef þetta verður hræðilegt þá einfaldlega bara sleppum við því að nota þetta", sagði Guðjón galvaski þá og lét hvergi bilbug á sér finna. Hringdi í ofboði í Óskar úrræðagóða og sagðist hann vita af frumsömdu lagi frá öldruðum, rámum frænda sínum. Skynsamlegra að flytja eitthvað sem enginn hefur flutt áður. Þá er ekki hægt að bera okkur saman við hina. Klókt! ;) Æfing á morgun og hugsanlega syngja dæmið inn á DVD disk á föstudaginn. Já engin veit sína æfina....eða kannski bara vikuna...fyrr en öll er! Hvað ætli gerist eiginlega í næstu viku?

Skellti mér á Esjuna í kvöld með slatta af OR starfsfólki. Fínn túr í frábæru veðri. Fyrsta ferðin á Esjuna þetta sumarið og pottþétt ekki sú síðasta.

Lífið getur stundum verið svolítið óútreiknanlegt...

2005-05-10T17:58:00.000Z

Skellti mér í Söngskólann í vetur. Ákvað bara aðeins að prófa þetta og taka lítið sætt kvöldnámskeið. Gaman að læra svolítið á röddina. Hef löngum þótt nokkuð hávær skratti og því gæti verið skemmtilegt að reyna eitthvað að temja skrímslið.

Fór í söngtíma til Sigga Braga núna í hádeginu í dag. Þar jós maðurinn yfir mig lofi sem aldrei fyrr og ég vissi bara ekki alveg hvaðan á mig stóð veðrið. Hann spurði mig hvað ég ætlaði að gera í haust og sagðist ég hafa áhuga á að taka annað svona lítið og sætt kvöldnámskeið.

Hann leit hins vegar á mig íbygginn á svip og sagði að hann væri með fullt af nemendum á kvöldnámskeiðunum en það væru tveir, ég og einn tenór, sem hann vildi hvetja mjög ákveðið að fara í meira nám en bara kvöldnámskeiðin næsta vetur. Sagði að ég væri með það góða og mikla rödd að það væri synd ef ég færi bara á kvöldnámskeiðið. Með þessa rödd ætti ég fullt erindi í alvörunámið. Þar fengi ég miklu meira út úr þessu, tvo tíma á viku með honum, einn með píanóleikara, tónheyrn og ég-veit-ekki-hvað-og-hvað. "Já", sagði ég bara og ranghvolfdi augunum. Þetta var nú ekkert á döfinni...

Þarna er með betri söngkennurum landsins að halda þessa ræðu yfir Sigga litla skátalingi. Hvað á hann þá að gera? Jú, eins og honum er sagt!

Gott fólk..., ég er bara að spá í að skella mér í alvörunám í Söngskólanum í Reykjavík næsta haust. Ef þið hefðuð spurt mig klukkan hálf tólf í dag hefði mér þótt það fjarstæðukennt. Gæti reyndar flogið hringinn í kringum hnöttinn fyrir skólagjaldið en shit happens... ég get þá alla vega sungið í flugvélinni þegar ég verð búinn með þetta nám! Tek nú samt bara einn vetur í einu. ;) Hef engan metnað til að verða atvinnusöngvari. Það held ég að sé bölvað hark. Þú ert alltaf að selja þig alla daga hér og þar. Fyrirgefiði, ég nenni því ekki. Hins vegar er alltaf gaman að syngja þannig að ég bara kýli á þetta og sé til. Lífið er til þess að gera skemmtilega hluti og dömur mínar og herrar...þetta er skemmtilegt.

Ég skráði mig því áðan í grunndeild Söngskólans í Reykjavík. Inntökupróf 27. maí. Syng þá eitthvað fyrir einhvern og læt kylfu ráða kasti. Ég hlýt að komast fram hjá honum fyrst ég komst fram hjá Sigga.

Já..., "Life is like a box of chocolate. You never know what you get!"

Að vera að vera ekki...

2005-05-09T19:16:00.000Z

...það er spurningin! Fór með Unni á Be Cool með John Travolta í gærkvöldi. Fór því tvisvar í bíó þessa helgi, samanlagt með u.þ.b. 45 mínútna fyrirvara. Gaman af því. Myndin var svona lala... Eins og við var að búast með mynd sem heitir Be Cool. Fín videómynd ... á mörkunum að vera ástæða til að fara í bíó. Athyglisvert með John Travolta. Hann er svona eins og Hugh Grant. Alltaf eins. Er það sterkur karakter að þótt hann reyni eitthvað að leika þá er hann bara einhvern veginn hann sjálfur og þannig nokkurn veginn alltaf eins. Þeir eru hins vegar báðir mjög skemmtilegar týpur. Travolta var fínn í gær og bar myndina uppi.

Skoðaði síðuna hennar Siggu Víðis sem Steini sendi mér í commentinu. Þetta er stelpa sem er. Hefur staðið upp úr sófanum og gert hluti. http://siggavidis.blogspot.com/. Stórmerkileg stelpa og það að vera nýbúinn að sjá Hotel Rwanda færir svo miklu nær manni allt sem hún er að gera og segja. Öflug stelpa úti í Afríku að skipta máli. Frábært. Hvet ykkur til að kíkja við á blogginu hennar. Ég þekki hana ekkert en um mjög merkilegt framtak að ræða. Hún hefur verið að safna inn á bankareikninginn sinn fyrir ýmislegt á þessu svæði svo fátt eitt sé nefnt.

Tónleikar með Orkuveitukórnum og Landsvirkjunarkórnum í Grensáskirkju klukkan 20:30 annað kvöld. Verður örugglega skemmtilegt.

Er eitthvað hálftuskulegur í dag. Veit ekki af hverju. Brjálað að gera í vinnunni og algjörlega fjarri því að ég sjái fyrir endan á verkefnalistanum. Þarf að fara út og labba aðeins í kvöld. Nauðsynlegt að viðra mann...

Rólegheita helgi...eins og venjulega!

2005-05-08T21:16:00.000Z

Tónleikar með Sinfó á föstudaginn þar sem hún töfraði fram rokk og ról að hætti Led Zeppelin, Queen, Pink Floyd og fleiri listamanna. Skellti mér ásamt Birnu systur og ungunum í fjölskyldunni Bergi og Sigrúnu. Sigrún var búin að vera að kvíða fyrir þessum tónleikum í margar vikur bara vegna þess að þarna var Sinfoníuhljómsveitin á ferð. Kom út með aðra skoðun. Gott mál! ;)

Glápti á sjónvarpið með Unni fram eftir nóttu en tók því hins vegar rólega í gær þangað til ég ákvað með 15 mínútna fyrirvara að fara á Hótel Rwanda í Regnboganum klukkkan 15:40. Man ekki eftir því að hafa áður farið í bíó milli þrjú og fjögur á laugardagseftirmiðdegi! Var sýnd í Sal 4 í Regnboganum sem er ca. 50 manna salur og í honum var kannski svona 20-30 manns. Myndin var snilld og ég hvet alla til að fara á þessa mynd...sjá síðasta blogg.

Þá var haldið á Úlfljótsvatn í mat á Norðurlandaráðstefnu radíóskáta þar sem ég fékk gott að borða a la Páll Viggóson og stjórnaði örkvöldvöku eftir matinn. Renndi þvínæst í bæinn aftur og skelltum við Ásta okkur þá á Geirmund á Klúbbnum við Gullinbrú með gamla fólkinu. Já Geirmund!!! Algjör snilld!!! Við vorum komin á gólfið ca. 90 sekúndum eftir að við komum í hús rétt eftir miðnætti og vorum þar til þrjú að undanskildum nokkrum mínútum þegar við skelltum í okkur vatni enda vökvaþörfin veruleg. Brjáluð brennsla og þurfti ég tvisvar að fara inn á klósett og þurrka svitann úr augunum á mér því ég var hættur að sjá. Var svona eins og að horfa út í gegnum sundgleraugu sem eru full af vatni!

Aðstoðaði Sonja Kjartans í nýju íbúðinni í dag við að fara að duttlungum Baldvins Ultima-Thule Víkverja sem er hennar sérlegi ráðgjafi í málningarmálum. Ekki að spyrja af kraftinum í Sonju. Er að gera góða hluti í nýju íbúðinni og ekki von á öðru en að hún verði glæsileg þegar allt er komið. Lánaði Ástu grillið mitt sem ég fékk í verðlaun á árshátíðinni í fyrra. Ástu vantaði grill og ég ákvað að grill í kassa gerði mann ekki saddann. Sátum í sólinni ásamt Guðrúnu þangað til ég renndi í Kringluna, keypti blómvönd handa mömmu í tilefni dagsins og tertur af Kristínu litlu frænku sem er á leiðinni í kórferðalag til Kanada í sumar.

Nú er síðan stefnan á Be Cool í Smárabíó eftir 20 mínútur...

Já, alltaf rólegar helgarnar hans Sigga...!

Ætlir þú að sjá eina mynd á árinu...

2005-05-08T20:46:00.000Z

...sjáðu Hotel Rwanda í Regnboganum. Algerlega frábær mynd. Myndin segir sögu manns sem rekur alþjóðlegt hótel í Kigali, höfuðborg Rwanda þegar þjóðarmorðin áttu sér stað nú fyrir nokkrum árum síðan. Vesturlöndum var alveg sama vegna þess að ráðamenn töldu ólíklegt að það að senda herlið til "Langtíburtistan-lands" eins og Rwanda halaði inn atkvæðum í næstu kostningum. Í staðinn voru áttahundruð þúsund Tútsar drepnir eins og flugur á nokkrum dögum í þessu annars fallega landi. Þetta er frábær mynd og tekst að vera spennandi, raunsæ án þess að fara yfir strikið og verða að einhverju yfirþyrmandi blóðbaði þannig að manni féllust bara hendur. Henni tekst að vera réttu megin við strikið og mitt í öllu því sem er í gangi hlær maður meira að segja stundum og er það oft svolítið kærkominn hlátur.

Langar alltaf að standa upp og gera eitthvað eftir að hafa horft á svona myndir. Hef lengi velt því fyrir mér að fara t.d. til Afríku á vegum Rauða krossins eða einhverra álíka stofnanna. Held það væri bæði spennandi og þroskandi að fara þangað í nokkra mánuði og gera eitthvað gagn.

Tel mig reyndar hafa gert svolítið gagn í gegnum skátastarfið. Það að ala upp leiðtoga annars vegar og innræta þeim kærleiksrík og uppbyggileg gildi hins vegar er gríðarlega mikilvægt starf og verður ekki ofmetið. Eftir tíu, tuttugu, þrjátíu, fjörtíu ár verða þessi börn farin að stjórna fjölskyldum, fyrirtækjum og stjórnmálaflokkum innanlands og utan og þá verða þær ákvarðanir sem þau taka á hverjum tíma byggðar á þeim grundvallargildum sem þau hafa tileinkað sér í gegnum uppeldið. Það skiptir því máli hvernig þau fræ eru sem sáð er. Seinni heimsstyrjöldin hefði ekki átt sér stað nema vegna þess að sterkur leiðtogi beygði af leið og eins og forystufolinn í stóðinu sem hleypur með fylgismenn sína fram af bjarginu. Páfinn ákveður að banna getnaðarvarnir og á meðan deyja milljónir úr eyðni í Afríku, í þeim löndum sem kaþólskan er að koma hvað sterkast inn í heiminum. Í Rwanda ákváðu menn að það væri réttlætanlegt að hreinsa út eina þjóð Tútsa vegna þess að einhverjir leiðtogar þeirrar þjóðar höfðu gert svipaða hluti við Hútúa nokkrum áratugum áður. Sama var að gerast á Balkanskaganum og sama er að gerast í Palestínu og Ísrael.

Leiðtogum fannst/finnst réttlætanlegt að aðrir létu lífið vegna þess að þeir voru þeim á einhvern hátt ekki samboðnir eða "fittuðu" ekki inn í þá sýn sem þeir höfðu/hafa. Leiðtogarnir selja síðan undirmönnum sínum hugmyndirnar og keyra þær í gegn. Því er ómetanlegt að tryggja að upprennandi leiðtogar meti lífið, náttúruna og fólkið í kringum sig með þeim hætti að það sé ekki í lagi að myrða fólk vegna þess að það er af röngu þjóðarbroti, trú, lit eða öðru. Dæmin sýna okkur að það er ekki heldur sjálfsagt og gerist þar af leiðandi ekki af sjálfu sér. Leiðtogum má heldur ekki vera sama þegar slíkt á sér stað annars staðar. Þar er ekki bara um leiðtogana að sakast heldur einnig okkur sem kjósum þá. Að vera ekki sama er grundvallardrifkraftur allra úrbóta í heiminum. Okkur má ekki vera sama.

Upp á svið og upp á Keili!

2005-05-05T23:43:00.000Z

Starfsmannafélagið hélt í gær bjór og grillkvöld í nýrri starfsmannaaðstöðu OR sem hefur óformlega hlotið það ágæta nafn - Flöskuháls (stóð undir nafni í gær!) og er staðsett í göngunum milli stóra hússins við Bæjarháls og nýja norðurhússins við Réttarháls. Ákveðið var að Agressobandið myndi troða upp en það skipum við Óskar Jóhann Óskarsson. Þegar ég byrjaði hjá OR starfaði ég með honum að málefnum tengdum Agresso fjárhagsupplýsingakerfinu. Þegar við höfum spilað í partýum o.þ.h. þá hefur orðið til þetta líka fína nafn á bandið - held ég bara nokkurn veginn frá fyrstu tíð. Bandið er reyndar opið í alla enda (er ekki band heldur teygja) og er skipað þeim sem er á staðnum með hljóðfæri hverju sinni.

Við æfðum því á þriðjudagskvöldinu fram yfir miðnætti spilandi og syngjandi í Orkuveituhúsinu öryggisvörðunum til ánægju og yndisauka og tróðum síðan upp við ágætisundirtektir í gærkvöldi. Ég hef mjög sjaldan áður spilað FYRIR fólk á sviði. Hef hingað til almennt verið í því að spila MEÐ fólki, þ.e. stjórna fjöldasöng en ekki verið hljómsveit á sviði. Þetta var hins vegar stórskemmtilegt (fyrir okkur allavegana! :) , fólkið dansaði eins og það ætti lífið að leysa sem við ákváðum að reiknaðist okkur klárlega til tekna! Ótrúleg kvenhylli sem maður nær með svona gítarspili. Verst að allar konurnar eru komnar langt á sextugsaldur eða þaðan af eldri...ég þarf kannski að fara að endurskoða hjá mér lagavalið...hmmm... :)

Uppstigningardagur stóð undir nafni og stigum við Unnur upp úr sófanum og þaðan á Keili í sólinni. Flottur túr, kakó og kleinur á toppnum, sund á eftir og loks American Style í kjúklingasalat. Ég held ég hafi bara ekki komið á Stælinn síðan einhvern tímann í fyrra. Alltaf ljúft og ég mæli með kjúklingasalatinu. Dugar venjulegu fólki lengi...brennsluofninum í mér hins vegar ekki alveg nógu lengi en gott er það meðan á því stendur...og meira að segja hollt!
Þeir sem vilja vera á ég-er-að-fara-upp-á-fjall - sms-listanum eru hvattir til að skrá sig hér í commentunum!

Hitler og Erna...

2005-05-03T00:04:00.000Z

...eiga ekki annað sameiginlegt en að ég fékk að fylgjast með þeim báðum í kvöld.

Erna Tönsberg var að vinna í Orkuveitunni og að læra japönsku á sama tíma og endaði með að vera send til Japan sem fulltrúi Íslendinga á heimssýningunni Expo 2005 sem fram fer í Japan þessa mánuðina. Komst að því í dag að hún er að sjálfsögðu bloggari og er mjög gaman að heyra um öll Expo-ævintýrin hennar í Japanalandi.

Fór með Árna og Guðbjörgu á Seinustu daga Hitlers (Der Untergang) í kvöld. Mögnuð mynd sem bregður upp mjög mannlegri hlið á stríðinu og því sem gerðist þegar Hitler og félagar voru endanlega að tapa seinni heimsstyrjöldinni. Oftast fær maður að fylgjast með þeim sem sigra stríðin því þeir skrásetja sjálfa sig í bak og fyrir. Það er hins vegar merkilegt að fylgjast með mismunandi viðbrögðum fólks þegar það er í þeim aðstæðum að það er við það að tapa. Stórmerkileg mynd sem ég hvet alla til að sjá.

Jafnvægi!

2005-05-02T17:45:00.000Z

Það er mikilvægt að gæta jafnvægis í lífinu. Jing og jang; svart og hvítt, hitt og þetta...

Þess vegna ætlum við Árni að skella okkur á "Der Untergang" (Síðustu dagar Hitlers) í kvöld. Tryggir líklega ákveðið jafnvægi á sálinni eftir allt Jesúið undanfarnar vikur. :)

Einkunnirnar komnar út tónfræðinni...

2005-05-02T17:40:00.000Z

Úr skeytinu frá Söngskólanum...

"Einkunnir þínar í tónfræði:
1. Stig 94/100
2. Stig 94/100 "

...svona er maður nú stundum duglegur strákur...alla vega á meðan efnið er jafn skítlétt og raun ber vitni. Gæti nú farið að halla undan fæti eftir því sem stigunum fjölgar! En...er á meðan er...eins og bóndinn sagði.

Rólegheita helgi...eða hvað?

2005-05-02T00:08:00.000Z

Athyglisvert hvað hugtakið "upptekinn" er afstætt... Mér finnst ég hafa átt þvílíkt rólega helgi og ekki gert nokkurn skapaðan hlut en þegar málið er skoðað nánar þá hef ég síðan á föstudagskvöld t.d. hlaupið 4-5 km., farið í ræktina, farið í heimsókn til Birnu systur borðað þar á mig gat og lagað tölvuna hennar, setið úti á svölum í sólinni og spjallað, sett saman tertu og seinna borðað hana ásamt familíunni, æft og sungið með Skátakórnum fyrir 40-80 manns, borið vitni fyrir löggunni, farið á rúntinn í Reykjavík og Hafnarfirði, út að hjóla, út að labba, á samkomu í Fíladelfíu, á óperu í Íslensku óperunni og loks horft á mynd með Dirty Harry. Ætlaði alltaf einhvert á fjall en það varð ekkert úr því. Kannski þess vegna sem mér finnst ég ekki hafa gert neitt!

Já, nú halda allir að það sé endanlega búið að Jesúa mig. Önnur samkoman á sumrinu og aðeins búnir 10 dagar af því! Ásta bauð mér á eitthvað sem hét lofgjörðasamkomu þar sem átti að vera ennþá meiri tónlist en venjulega, kórinn og alles. Ég ákvað því að skella mér því kórinn var ekki með um daginn. Þetta var glæsilegt í alla staði og það sem kom mér á óvart var að þetta var algerlega ofstopalaus messa/samkoma/predikun eða hvað á að kalla þetta. Ágætisprestur þessi Vörður og svei mér þá ef ég er ekki búinn að finna einn kór í viðbót sem ég væri meira en til í að syngja með. Þetta er rosalega flott og skemmtileg tónlist og hvet ég fólk til að horfa á messuna á ríkissjónvarpinu á hvítasunnudag. Mjög hresst og skemmtilegt! Ásta sagði reyndar að ég þyrfti að skírast inn í söfnuðinn til að fá að syngja með kórnum. Það hlýtur nú að vera hægt að komast þarna inn bakdyramegin einhvern veginn. Ég er alla vega ekki til í að taka allan pakkann. Er einhvern veginn of mikill efasemdamaður. :) Er svosem með marga aðra kóra sem mig langar að syngja með t.d. Karlakór Reykjavíkur eða Fóstbræður. Glæsilegir og ofurflottir kórar. Mig langar semsagt að prófa alvöru karlakór einhvern tímann, gospelkór einhvern tímann og örugglega einhverja fleiri. Held að gospelkór sé t.d. miklu skemmtilegra en að vera í venjulegum kirkjukór. Það gætu hins vegar verið fordómar.

Fór síðan í óperuna í kvöld á sýningu einhvers apparats sem heitir Óperusmiðjan. Það var frítt inn og þetta er einhvers konar samstarfsverkefni nokkurra tónlistarskóla í Reykjavík, Listaháskólans og óperunnar til að gefa hljóðfæra- og söngnemendum tækifæri til að reyna sig við óperuhlutverk í alvöru húsi við alvöru aðstæður. Apótekarinn; mjög létt, fyndið og skemmtilegt verk. Ástæðan fyrir því að við fórum þarna var sú að fyrrverandi dagmömmubarn mömmu, Guðbjörg Sandholt var að syngja eitt af hlutverkunum. Já, ótrúlegt hvað litlu börnin eru orðin stór! Hún stóð sig með mikilli prýði og það sama mátti segja um hina söngvarana og hljóðfæraleikarana en nemendur tónlistarskólanna skipuðu heila sinfoníuhljómsveit í gryfjunni.

Jæja, best að fara að lúlla í hausinn á sér. Nú verður maður að standa við stóru orðin og hjóla í vinnuna á morgun. Ég kom þátttökunni í því verkefni af stað í vinnunni þannig að ég verð að hjóla á undan og sýna gott fordæmi! Ótrúlegt hvað maður er alltaf að koma sér í klandur!

...og vika

2005-04-30T18:56:00.000Z

Vikan fór í brjálaða vinnu þar sem lífið var eiginlega bara söngur, stuttur svefn og vinna frá 8/9 á morgnanna til 2/3/4 á næturna við afturvirkar launaleiðréttingar 300 manna og kvenna 2 1/2 ár aftur í tímann. Þetta gekk þó allt að lokum og var mikið spennufall í starfsmannahaldinu á hádegi á föstudag þegar launaskráin var send til Reiknistofu bankanna og launaseðlarnir í prentun.

Seinni hluta föstudags fór stjórn STOR (starfsmannafélag Orkuveitunnar) austur í Úthlíð eftir hádegi að kíkja á sumarbústaðarlóðir. Ákváðum að nýi bústaðurinn okkar færi þangað á mikið fína lóð sem okkur stendur til boða. Hittum þar einnig óðalbóndann Björn bónda í Úthlíð. Alltaf gaman að hitta svona karla. Alvöru karl um sjötugt sem hefur byggt upp þarna heilt sumarbústaðaþorp af miklum stórhug undanfarna áratugi. Glæsilegur árangur hjá glæsilegum stórhuga karli. Sýndi okkur nýjasta stolltið sitt; þriggja bursta glæsihús sem hann hafði meira að segja teiknað sjálfur. Mjög flott hús og aðstaða, heitur pottur með DVD og margt fleira.

Skellti mér út að hlaupa í gær, hljóp stífluhringinn í Elliðaárdalnum, lyfti svolítið og endaði í heimsókn hjá Birnu systur fram yfir miðnætti. Rólegur dagur í dag. Úti á svölum í sólinni. Setti saman tertu úr tertubotni og Betty Crocker. Ótrúlegt hvað maður er myndalegur og gott að eiga góðar vinkonur eins og Betty! :)

Skátakórinn kemur síðan fram í kvöld á Landsþingi St. George skáta (eldri skátar) í Kópavogi. Það verður skemmtilegt...alltaf gaman að syngja.

Öllu rólegri helgi núna en síðast...sem er kærkomið eftir vikuna!

Action helgi...

2005-04-29T17:06:00.000Z

Síðasta helgi var nokkuð í fyllri kantinum, í alla vega tveimur mismunandi merkingum.

Fór með Unni og innheimtudeildinni í óvissuferð á föstudagskvöldinu. Fórum í Gvendarbrunna og skoðuðum dælustöðina þar. Stórglæsilegt. Man þegar við settum evrópuráðstefnu skáta þar í fyrra. 600 útlendingar sem áttu ekki orð yfir þessum stað! Þá var haldið austur á Stokkseyri og snæddur humar af miklum móð, spilað á gítar og haldið heim á leið í dúndrandi gítaraction megnið af leiðinni. Þaðan var farið í eftirpartý í Grafavogi sem aldrei þessu vant var bara mjög skemmtilegt - sem er nú ekki alltaf málið með eftirpartý.

Kóræfing á laugardagsmorguninn. Var aðeins "þreyttur" svona svolítið frameftir degi. Æfðum nokkur lög og fórum síðan yfir í Fríkirkjuna í Hafnarfirði þar sem lögin voru tekin upp. Gekk ágætlega og alltaf gaman enda eldsprækur hópur.

Um kvöldið var aðalfundur og hittist hópurinn í sal uppi í Mjódd. Allir mættu með eitthvað á hlaðborð og úr varð þessi líka rosalega veisla. Flottara en nokkur veitingastaður, algjörlega óskipulagt en algjör snilld! Borðuðum, héldum aðalfund þar sem mál voru afgreidd hratt og örugglega, kosið í stjórn, nefndir og ýmislegt lauslegt. Síðan var djammað af krafti fram eftir nóttu...aðra nóttina í röð! Raggi lét af störfum sem formaður en var varandlega skipaður forseti og fær að halda þeim titli eitthvað fram eftir öldinni. Raggi hefur náttúrlega staðið sig feykilega vel sem formaður kórsins undanfarin 9 ár. Það var hann sem kom skátakórnum í Reykjavík á koppinn sem síðar var sameinaður skátakór Hafnarfjarðar í það sem heitir í dag einfaldlega Skátakórinn. Hann hefur leitt hópinn allan þennan tíma af mikilli snilld. Verðskuldað rigndi því yfir hann og Kiddý heiðursmerkjum, þökkum og gjöfum fram eftir öllu kvöldi.

Já, það er þetta með litla puttann og handlegginn. Ég bauð mig fram í stjórnina fyrir einhverjum vikum en endaði sem formaður kórsins á laugardaginn. Já, það er ekkert grín að taka við af Ragga. Maður verður bara að reyna að standa sig. Gleði - Söngur - Árangur eru lykilþættirnir þrír sem mér finnst vera í starfi kórsins. Ekkert þessara þriggja atriða getur án hins verið. Frábær hópur og alltaf skemmtilegt.

Við Ásta Bjarney, sem á laugardaginn var kosin sérlegur prótókollmeistari hópsins sem og skemmtinefndarfulltrúi, mættum síðan á sunnudaginn og gengum frá. Mjög lítið var eftir því við gengum frá næstum öllu áður en við fórum heim á laugardagskvöldið. Skrapp í vinnuna seinni partinn og þaðan á tónleika.

Fór á tónleika með Borgarkórnum. Mjög skemmtileg tónlist og alltaf jafn innilegur og hlýr hópur. Var í Borgarkórnum veturinn 2003 til 2004 og á þaðan góðar minningar. Tónleikarnir voru skemmtilega blandaðir og gaman af þeim. Sigvaldi kórstjóri og stofnandi kórsins er að hætta sem kórstjóri en ætlar í staðinn að færa sig yfir í bassann og syngja þar. Það er nú ekki lítill fengur fyrir bassana.

Sunnudagskvöldið fór síðan í próflestur fyrir tónfræðipróf 2. stig, þangað til ég datt inn í Dirty Harry með Clint Eastwood. Það gerði það að verkum að ég las megnið af efninu til prófs á 20 mínútum á bílastæðinu fyrir utan Söngskólann á mánudaginn. Komst að því að ég hafði fengið eitthvað milli 9 og 10 í 1. stigsprófinu hálfum mánuði áður. Held mér hafi gengið ágætlega í þessu prófi. Lítið og auðvelt efni. Finnst samtlíklegt að úr þessu fari málin að flækjast svolítið meira. Þarf líka að öðlast meiri þjálfun en ekki bara raða inn stigum og taka próf.

Ætli nokkur nenni að tefla við páfann næstu árin!

2005-04-26T23:50:00.000Z

Magnað með þetta páfakjör. Þarna er kosinn maður sem er svo út úr kú að það hálfa væri nóg. Hann er algjörlega úr tengslum við samfélagið eins og reyndar kaþólska kirkjan sem stofnun. Fólkið náttúrlega finnur sem betur fer sínar leiðir en þó ekki nægilega.

Ein vel valin samsæriskenning er sú að vegna þess að kaþólska kirkjan sé ekki tilbúin í breytingar (Ekki tilbúin að skipta á lífi nokkurra milljóna alnæmissjúklinga og smokknum...fóstureyðingar...hommar...kvenprestar og aðrir skelfingarþættir sem ógnað gætu heiminum...) þá hafi verið fenginn þarna háaldraður ofurharðlínumaður sem mun þess vegna haga sér extra ansalega næstu árin og fá alla upp á móti sér.

Fyrsta skrefið í breytingastjórnun er að sannfæra lýðinn um að það sé yfirhöfuð nauðsynlegt að breyta einhverju. Þetta tryggi vonandi að þegar hann geyspar golunni (sem væntanlega verður eftir skikkanlega stuttan tíma þar sem hann er jú 78 ára gamall) þá verði kaþólska kirkjan búin að fá endanlega nóg af þessari vitleysu og verði loksins til í breytingar.

Hann olli ekki heldur vonbrigðum í fyrstu messunni sinni þegar hann hvatti alla kristna menn á sinn ofurdiplómatíska máta til að sameinast. Það eina sem þeir þyrftu að gera væri að hugsa eins og hann sjálfur og safnast allir undir hans eigin stjórn. Vá! ...og svei mér þá ef manninum var ekki bara alvara!

Næring!

2005-04-26T16:43:00.000Z

Já, þetta er nú orðin frekar löng nótt frá því síðasta vetrardag þegar ég sagðist koma inn aftur daginn eftir... skamm Siggi...en það hefur reyndar ýmislegt borið á góma síðan þá.

Sumardagurinn fyrsti var fínn og fjölbreyttur dagur frá upphafi til enda - einkenndist af næringu ýmiss konar.

Byrjaði með kórsöng í skátamessu í Hallgrímskirkju. Þurfti reyndar að yfirgefa samkvæmið áður en yfir lauk því kokkalandsliðið hafði boðið mér í hádegismat. Uuuummmmm.... þvílík dýrð!!! Forrétturinn var búinn að vera í þróun í 6 ár!!! Spáið í það! ...og ég verð að segja þeim tíma hefur verið ágætlega varið. Forrétturinn var semsagt ýmislegt tengt humri, hörpudisk í samblandi við mangó frauð og ýmislegt fleira ásamt hvítvíni. Hrein dásemd! Aðalrétturinn var kálfa og nautalund, græn kartafla (stórmerkileg), brjóst og bris. Já, ég er ekki að grínast...brjóst og bris. Ekki slæmt að fá brjóst í hádegisverð, ha! Þetta rann náttúrlega niður, meirt og stórkostlegt ásamt dýrindis rauðvíni...mmmm....
Herlegheitin enduðu síðan með skyrrétti, súkkulaði, karamellu, kanil og ég veit ekki hvað og hvað. Mmmmm.... Matarmaðurinn Siggi var algjörlega að fýla þetta hádegisboð!

Nýtti það sem eftir var dagsins með Ástu og Guðrúnu, ýmist heima í rólegheitum eða úti á rúntinum. Fínt í sólinni, afslappað og þæilegt!

Um kvöldið gerði ég síðan eitthvað sem ég hef aldrei gert. Skellti mér á samkomu í Fíladelfíu með mæðgunum og Unni. Nokkuð merkilegt. Var búinn að vera á leiðinni nokkuð lengi og ákvað að skella mér þarna. Þetta var bara skemmtilegt. Helsti munurinn sem ég upplifði var sá að mér fannst þeir komnir lengra í boðskiptafræðinni en þjóðkirkjan. Það sem sagt er þarna og gert felur í sér mun meiri þátttöku, meiri söng (þú syngur - ekki bara einhver kór), það er talað mun persónulegar við þig og á mannamáli á meðan "venjuleg messa" er mun uppskrúfaðri og fjarlægari manni sem gerir það að verkum að það sem sagt er þar verður hálfgerð síbylja sem maður tekur ekki til sín. Manns trúarupplifun kemur eiginlega frá manni sjálfum. Ræddi þetta reyndar við kirkjunnar mann um helgina og sú upplifun sem ég hef af "venjulegum messum" sagði hann að væri reyndar nokkuð á undanhaldi. Ég sé að ég þarf að fara að prófa að fara í kirkjur víðar og komast að því hvort þetta er eitthvað að lagast.
Ég var ekkert sammála öllu því sem predikarinn sagði en ég er það ekki heldur í venjulegri messu. Munurinn er sá að mér er eiginlega alveg sama í venjulegu messunni því hlutirnir eru einhvern veginn fjarlægari. Vissulega var þarna fólk sem fýlaði þetta svolítið öflugar en ég en það var ekkert meiri múgæsing en maður sér á tónleikum með Jónsa í Svörtum fötum eða Birgittu. Hún var bara að degi til og fólk almennt edrú.

Er ég á leiðinni í Fíló? Neeiii varla. Er hins vegar alveg til í að fara þarna aftur og hlusta á skemmtilega tónlist. Langar að upplifa alvöru gospelmessu með kór, feitri kerlingu (helst svartri) og alles. Það væri glæsilegt! Þarf reyndar líka að heilsa upp á Örn og Ernu, vini mína í Fríkirkjunni í Hafnarfirði, en þau eru að gera góða hluti þar í tónlistarmálum.

Já þrusudagur í upphafi sumars. Jesúnæring um morguninn, maganæring og vinanæring um miðjan daginn og aftur Jesúnæring um kvöldið. Maður verður nú ekki öllu nærðari!

Læt þetta duga í bili... Helgin var síðan stútfull (í fleiri en einni merkingu). Meira um það seinna!

Hrútar, plussklæddir veggir og himnaríki!

2005-04-20T20:44:00.000Z

Það er sumt fólk sem er alveg ótrúlega fært í mannlegum samskiptum. Svo gott að vinna með því og umgangast það að maður þarf algjörlega að setja sig í verulega stellingar til að geta sagt nei við það. Lenti í því á fundi í dag. Er reyndar kominn í svolitla æfingu með þessa. Maður stillir sig í mjúka "líka ofurgóður í mannlegum samskiptum"-gírinn og segir síðan undurblítt - "Nei".

Viðkomandi er hins vegar eldklár og MJÖG fylgin sér þannig að þessi einstaklingur heldur áfram og kemur sínu máli eins langt og fræðilega er mögulegt. En maður segir bara aftur undurblítt - "Nei"....og svo aftur "Nei, það er því miður ekki hægt"... og þarna sitjum við bæði haus í haus eins og hrútar sem lenda á vegg...sem þrátt fyrir það að vera bæði bólstraður og plussklæddur er ekki að færast sentimeter!

Maður þarf að vera mjög vel undirbúinn fyrir svona fólk og vera með möguleg ágreiningsmál og forsendur ansi vel skilgreindar því annars getur maður ekki annað en lent undir valtaranum. Stórskemmtilegt og mjög þroskandi að fylgjast með svona fólki að störfum.

Sem betur fer er skoðanakönnunin búin. Nú fer púlsinn í vinnunni að hækka all verulega. Tvö samkomulög við sitt hvort stéttarfélagið sem bæði á að borga út um mánaðarmótin og enn ekki búið að skrifa undir annað þeirra. Innihalda launaleiðréttingar aftur til desember 2002, samanlagt til handa næstum þrjú hundruð manns. Er reyndar kominn töluvert af stað með þetta í Excel. Við erum að tala um Excelskjöl dauðans...! 30 sheet hvort skjal, þúsundir og jafnvel tugþúsundir lína og VLOOKUPPUÐ í bak og fyrir. Já, sjaldan er ein báran stök í sjö vindstigum!

Sumardagurinn fyrsti á morgun. Mæti klukkan 9 í skátamessu í Hallgrímskirkju. Messan byrjar klukkan 11 en kórinn þarf að undirbúa sig svolítið áður. Gaman en síðan tekur enn meiri hamingja við!

Klukkan tólf er ég nefnilega boðinn í matveislu aldarinnar!!!!! Hlakka ekkert smávegis til! Hvorki meira né minna en æfing hjá kokkalandsliðinu...ég er ekki að grínast, gott fólk! Við erum að tala um hreint himnaríki fyrir Sigurð matmann! Segi ykkur meira frá því á morgun!

Takk fyrir afmæliskveðjurnar!

2005-04-19T18:26:00.000Z

Vildi bara þakka ykkur innilega fyrir afmæliskveðjurnar sem rigndi yfir mig í gær á öllum mögulegum og ómögulegum formum. Alltaf ljúft til þess að vita einhver sé einhvers staðar að hugsa vel til manns! :)

Afmæliskveðja,

Siggi 1 árs....nei...þrjátíu og eins árs

Jibbbíííííííííí!!!!!!!!!!!!!!!!!!!!!!!!!!!

2005-04-19T18:18:00.000Z

Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jibbbíííííííííí!!!!!!!!!!!!!!!!!!!!!!!!!!! Jei!!!!!

Ég er búinn með skoðanakönnunina!

Mikið var ...að beljan bar í buxurnar á Valdimar!

Búinn að vera að síðan í janúar með tvær stórar skoðanakannanir og var alveg orðinn til í að losna við þetta af bakinu. Kláraði fyrri könnunina í sumarbústaðnum um páskana og byrjaði um leið á þeirri seinni.

Er búinn að vera að til tvö / þrjú á næturna í á aðra viku og var til hálfsex í morgun og kláraði!!!

Var mættur galvaskur á verkefnastjóranámskeið klukkan 9 í morgun. Hélt ég myndi ekki lifa það af en leiðbeinandinn, Dr. Helgi Þór Ingason, var það góður að það reyndist ekkert mál.

Nú er bara út í sólina, kóræfing á eftir og síðan heim að lúlla. Action dagur á morgun!

Æi mikið er ljúft að vera til!!!!

Allt að gerast!!!

2005-04-15T13:39:00.000Z

Nú kemst maður betur inn á fertugsaldurinn á mánudaginn. Aldrei hefði ég trúað því fyrir 10 árum síðan að maður yrði ekki orðinn gamall og gugginn kominn á fertugsaldurinn...eða er maður það? Neeeeiii, ég held ekki. Nú er bara að halda dampi næstu 50 árin eða svo!

Minnir mig á textann góða eftir Sverri Stormsker...

Jón Jónsson lést í gær 85 ára að aldri.
Þeir deyja ungir sem guðirnir elska!

Er annars á seinustu metrunum í Verslókönnun númer tvö í ár. Klára hana vonandi á sunnudaginn eða mánudaginn. Er þá búinn að vera í þessum skoðanakannanbransa síðan í janúar. Jesú minn, hvað ég verð feginn að geta um frjálst höfuð strokið!

Skátaþing um helgina. Leiðum hópavinnu allan laugardaginn. Verður action og mjög skemmtilegt. Er annars að segja mig úr starfsráði. Verð nú að viðurkenna að það veldur nú smá trega í hjartanu. Á samt von á því að það gangi hratt yfir. Slagar samt í þriðjung ævinnar sem ég hef verið í ráðinu, 9 ár, frá 1996! Kominn tími á að hleypa öðrum að. Búinn að læra fullt og koma ýmsu í verk. Vildi alltaf hafa gert meira en svona er þetta bara. Maður mun þurfa aðeins að raða upp á nýtt.

Held það sé reyndar að takast... :) Sýnist ég vera á leiðinni að taka við af Ragga rakara í Skátakórnum. Stóð nú ekki til. Bauð mig fram í stjórnina en ekki formanninn. Síðan er ekki að takast að fá formann þannig að ætli ég tækli það ekki bara. Getur nú varla verið svo rosalegt...famous last words! Hvenær læri ég?

Tók 1. stig í tónfræði í söngskólanum í mánudaginn, veit ekki hvernig gekk en held það hafa bara verið fínt. Hef nú reyndar alltaf haldið það eftir próf og áður en ég hef fengið einkunnirnar! :o) Tek svo líklega 2. stigið 25. apríl eða þar um kring. Ætla alla vega að reyna það. Athuga hvort mér tekst að renna yfir þetta efni á þeim tíma. Maður hefur nú svosem tæklað stærri bækur um flóknara efni á skemmri tíma fyrir próf. Þetta er tiltölulega einfalt svona til að byrja með...vona ég alla vega!

Heyrumst eftir helgina og vonandi EFTIR skoðanakönnun!

Nei, ég er ekki...

2005-04-11T16:12:00.000Z

...horfinn af yfirborði jarðar...ennþá!

Verkefni dagsins eru hins vegar svo eitthvað sé nefnt...

...spila fyrir gamla fólkið í hádeginu
...vinna
...tónfræðipróf, 1. stig
...byrja að læra fyrir tónfræðipróf 2. stig sem ég held að verði 25. apríl
...lesa yfir eitthvað á annað hundrað blaðsíður í nokkrum skýrslum og koma þeim frá mér (skoðanakönnun 2)
...ætlaði að skreppa og dansa aðeins í kvöld...en er ekki viss um að það gangi eftir...

...læt þetta örblogg því duga í dag.

Skemmtið ykkur í sólinni.

Sigginn

Úlfarsfell, afmæli og óvænt veisla!

2005-04-04T23:07:00.000Z

Við systkinin og Ásta Bjarney skelltum okkur á Úlfarsfell á föstudaginn eftir vinnu. Lítið mál - Tekur ca. 2 tíma með því að labba á báða tindana. Ekkert erfitt, fyrst og fremst fín útivera í góðum hópi. Fór beint úr vinnunni með bindið á toppinn. "Svolítið villt en samt snyrtimennskan ávallt í fyrirrúmi" sögðu Stuðmenn á sínum tíma og ákvað ég að gera þau orð að mínum, nú eins og svo oft áður!

Renndi austur á Selfoss á laugardaginn í afmæli til Guðbjargar hans Árna. Alltaf gott að hitta þau. Borðin svignuðu undan kræsingunum og við var að búast á þeim bænum.

Kom við í Holtablóminu á leiðinni. Gaman að koma þangað inn. Orðið bara nokkuð flott og þau með flottar vörur, mikið frá Sia. Svo er þetta vinnustofa líka og gallerí því þær eru listamenn sem eru með búðina núna og selja munina sína í búðinni. Litu vel út. Gaman að sjá að þetta gengur. Sakna þess nú ekki að vera ekki eigandi að blómabúð. Úff, þvílík binding! Ekki fyrir "út um allt" fólk eins og okkur.

Gaman að sjá gamla vini í afmælinu. Anna Guðrún var þarna með Kristjönu Alladóttur, Sigrún og Freyja. Einnig Björn úr Málbjörg sem ég kynntist á Snæfellsnesinu í haust. Skemmtilegt! Kristjönu hef ég ekki séð síðan hún var lítil. Er þar öflug og klár stelpa á ferðinni sem á án efa eftir að láta að sér kveða í framtíðinni.

Prófaði að bjalla í Möggu Völu þegar ég var búinn í afmælinu. Magga Vala og Logi eru semsagt búin að kaupa íbúð á Selfossi. Var boðið í heimsókn og vildi svo til að Logi var að elda páskamáltíðina í þann mund sem ég renndi í hlað. Mér var því óvænt boðið í svakalega þríréttaða veislu og prófaði þar akurhænu í fyrsta sinn. Skemmtilegt og spennandi og alltaf gott að hitta þau bæði. Góðir vinir.

Náði fínum skoðanakönnunardegi á sunnudaginn. Er búinn með Excelhlutann. Nú er næst að henda öllu upp í skýrslur í Word og skrifa texta. Tekst vonandi að klára sem mest í vikunni.

Tónfræði í dag, Siggi söngkennari veikur - aftur! Fór hins vegar í tónfræðina. Tónfræðipróf 1. stig á mánudaginn næsta. Verður vonandi í þetta skiptið. Síðan var hún að tala um hvort ég vildi ekki bara taka 2. stigið líka hálfum mánuði seinna, 25. apríl. Ég sagði að sjálfsögðu "Jújú - ekki málið!". Maður verður bara að tækla þetta og standa við stóru orðin!!!

Hitti líka Kristveigu stórsöngkonu úr Sárum og súrum fótum. Hlakka til að skella mér í Skagafjörðinn með þeim í júlí.

Svo erum við Birna að skipuleggja ættarmót 8.-10. júlí við Vesturhópsvatn í Húnavatnssýslu. Actionsumar í vændum!

Var að spjalla við Badda skáta í kvöld. Þau eru nokkrir krakkar á leiðinni á skátamót í Mozambique um næstu áramót. Algjör snilld!!! Það væri nú ekki mjög slæm hugmynd að skella sér með þeim...neeeeiiii...klára Landsbankann fyrst!

Á meðan lætur maður sig dreyma með því að lesa bloggið hans Hugins. Kappinn er nú staddur í Suður-Ameríku á hraðri leið inn í Amazon (ekki bókabúðina) og ætlar að eyða þar 10 dögum með indjánum. Svona eiga menn að vera!!!

Úlfarsfell & 1. apríl!

2005-04-01T15:42:00.000Z

Við Birna og Ásta Bjarney erum á leiðinni á Úlfarsfell klukkan 18! Áhugasamir hvattir til að hafa samband eða mæta á bílastæðið við suðurhlíðina.

Besta aprílgabbið var á mbl.is í dag...

Fann upp málið í tilefni dagsins
Norska-íslenska hugbúnaðarfyrirtækið Opera Software ASA ákvað að bregða á leik í tilefni dagsins og sendi frá sér tilkynningu um, að náðst hefði stórmerkur áfangi í þróun samskipta. Hefði fyrirtækið uppgötvað óháða raddtæknilausn fyrir fjarskipti milli einstaklinga sem ekki eru í mikilli fjarlægð hver frá öðrum.

Þegar lesið er í gegnum tækniorðaflauminn í tilkynningunni kemur í ljós, að fyrirtækið sagðist hafa uppgötvað talmálið.

Opera segir í tilkynningunni, að þessi merka uppgötvun, sem nefndist Opera SoundWave, dragi 30 metra og hægt sé að beita henni án sérstaks búnaðar, t.d. með því spyrja einhvern nærstaddan spurningar eins og: Er 1. apríl í dag?

Ef lesendur eru engu nær eftir að hafa lesið þetta er upplýst í tilkynningunni, að einkaréttarvarða P2P taltæknin noti hliðræn merki sem berist gegnum loftið og þannig geti notendur átt samskipti í rauntíma án aðstoðar tölva eða farsíma.

Síðan er því lýst hvernig SoundWave tæknin hafi verið uppgötvuð þegar tæknimaður hjá Opera sagði eitthvað og gerði sér grein fyrir því að félagar hans skildu hann.

„Eins og flestir aðrir hef ég notað tölvupóst sem aðalsamskiptaleið í mörg ár og komist að raun um að hún er ekki 100% örugg," segir Trond Werner Hansen, tæknimaður, í tilkynningunni. „SoundWave hefur opnað fyrir mér nýjan heim, mér tekst að vinna störfin hraðar og betur en áður - og það er ótrúlega auðvelt að nota þessa tækni."

Í lokin er lesendum boðið að smella á nettengil til að skoða Opera SoundWave betur. Þá opnast netsíða þar sem eftirfarandi tilkynning birtist: „Til að fá sýnishorn af SoundWave P2P rauntímaraddartækni er nóg að spyrja einhvern í nágrenninu eftirfarandi spurningar: „Hvaða dagur er í dag?" SoundWave-síða Opera

Verzlókönnun númer eitt loksins búin!

2005-03-31T19:10:00.000Z

Aaahhhhh....þvílíkur léttir! Búinn að vera með þetta á öxlunum síðan í janúar! Alltaf gott þegar maður tekur svona bakpoka af öxlunum og leggur hann frá sér vitandi það að maður þarf ekki að taka hann upp aftur...alla vega ekki á næstunni.

Var reyndar kominn með nýtt verkefni, Verzlókönnun númer tvö, áður en númer eitt lauk. Er nú oftast reyndin. Merkilegt hvað þetta gerist bara einhvern veginn sjálfvirkt!

Þó smáminnkun í bili. Er búinn að segja mig úr starfsráði BÍS frá og með skátaþingi núna í apríl. Líklega kominn tími til, búinn að vera í ráðinu síðan 1996...og geri aðrir betur! Mjög spennandi tími og maður hefur lært mjög margt um mjög margt. Skoðar þetta kannski einhvern tímann seinna...þegar maður hefur lítið að gera!

Reyndi í gær að reyna að panta mér flug til Köpen og áfram til Álaborgar fyrrihluta maí. Fékk ekkert flug á minna en 25-30 þúsund, hvori hjá Icelandair né Iceland Express! Fáránlegt! Steini, ég prófaði líka hjá þér og það var ekkert undir 20.900 plús skattar. Eru engin svona "special-price-for-you-my-friend" tilboð á Flugleiðavefnum? Er ekki til eitthvað www.icelandair.is/notasexpensiveasyoumightthink

Föstudagur á morgun...strax...vikan var að byrja! Afmæli hjá Guðbjörgu á Selfossi á laugardaginn. Það verður gaman. Hlakka til að hitta gott fólk...Long time no see.

Áætlun að öðru leyti fyrir helgina: Skoðanakönnun...Hljómar kunnuglega...nema að þessu sinni...númer tvö!

Afmælisdagur í Danmörku, páskar, Fischer og fleira...

2005-03-30T19:31:00.000Z

Í dag eru nákvæmlega 7 ár síðan Kristófer Helgi stórtöffari og þar með lifandi eftirmynd föður síns, kom í heiminn. Heyrði í karlinum áðan. Alltaf gott að heyra röddina. Var sáttur en jafnframt dasaður enda búið að vera afmæli í gangi í fjóra klukkutíma eða svo. Fékk fullt af gjöfum, línuskauta, tjald í garðinn, íþróttagalla, Bionicle karla, Pokemon kúlu og ýmislegt fleira. Þá höfðu hann og Birna systir komist að því samkomulagi að það yrði haldið síðbúið afmæli þegar hann kæmi til Íslands í sumar...ekki málið!

Heyrði líka í Gunnu í dag frá Brussel...allt í fínu formi þar. Var nýbúin að komast að óvæntri sérstöðu sinni, þ.e. að hún væri í blóðflokknum AB mínus. Úff, skyndilega fannst mér ég hræðilega normal verandi bara í A plús eins og allir hinir. Ólíklegt að það standi til bóta.

Gaman að fá comment frá Laufeyju. Komdu fagnandi og til hamingju með tilvonandi Sálaraðdáandann. Það mætti vera svakaleg stökkbreyting á geni eigi barnið ekki eftir að fýla og syngja með Sálinni út í eitt!!

Naut páskanna í sveitinni. Tók bústað á leigu í Straumnesi við Úlfljótsvatn og var þar í einbeitingarbúðum (concentration camps) frá fimmtudegi fram á mánudag við að koma frá mér skoðanakönnununum, þ.e. númer 1 og númer 2. Kláraði loksins númer eitt - Jibbíííí!!!! Held ég hafi lofað því fyrst í janúar einhvern tímann eða í byrjun febrúar. Þvílík skelfileg vinna! Er búinn að prenta út, á eftir að lesa síðustu skýrsluna yfir aftur útprentaða, binda hana inn og senda hana frá mér. Geri það á eftir. Loksins - Úff úff úff! Komst töluvert af stað með skoðanakönnun númer 2. Þarf að reyna að ná að klára hana á næstu viku til tíu dögum. Hún er öll fljótlegri og meðfærilegri...held ég hafi líka sagt þetta um hina - í janúar!

Þetta varð nú ekkert mjög rólegt þótt ég hafi verið þarna einn að mestu leyti til að byrja með. Pabbi og mamma komu í stutt kaffi á föstudaginn langa; Ásta, Unnur og Guðrún komu ásamt tveimur Norðmönnum, Bengt og Daníel, á laugardaginn. Grill, pottur, gítar, rólegheit og fínerí. Frábært! Flestir heim á sunnudag og Nojararnir meira að segja með fyrstu vél til Noregs. Unnur varð eftir fram á mánudag og ég hélt áfram að vinna.

Fórum reyndar út að viðra okkur á sunnudeginum og enduðum úti á bát. Alltaf skemmtileg tilbreyting. Nokkur ár síðan maður hefur farið út á bát á Úlfljótsvatni. Fann þarna óvart bát, mótor og allar græjur í bátaskýlinu. Veðrið var snilld þannig að það var látið vaða og eftir nokkuð brölt var allt farið að fljóta og mótorinn meira að segja kominn í gang! Gekk allt eins og í sögu þangað til mér gekk svolítið illa að drepa á honum aftur. Það lagaðist samt um leið og við STOP-takkinn fórum að fá betri tilfinningu hvor fyrir öðrum. Um kvöldið var önnur ofursteik að hætti hússins þar sem ýmis trix voru prófuð. Mjög gott að grilla kartöflur og bræða gráðost ofan á þær á grillinu. Líka fínt að steikja grænmeti upp úr vatni! Afbragð...föttuðum nefnilega að það var engin matarolía í húsinu. Þetta var líka miklu betra!

Fínt að vera svona einn í bústað þótt það sé auðvitað líka fínt að hafa skemmtilegt fólk í kringum sig. Tók allnokkrar söngskólaaríur um helgina ásamt slatta af gítarsessjónum í bland við skoðanakönnunina. Labbaði einnig yfir að Þingvallavatni og skoðaði Skinnhúfuhelli. Hef líklega ekki komið í hann síðan ég var í sumarbúðunum í gamla daga, líklega 15-20 ár síðan. Vá!

Er búinn að komast að því (svosem ekki í fyrsta sinn) að ég er ekkert sérstaklega góður innkaupastjóri. Keypti inn mat fyrir páskana sem hefði dugað Eþíópíufjölskyldu fram að jólum og kom með stóran hluta af honum í bæinn aftur. Ég hlýt að hafa farið svangur í Bónus! Alveg bannað!

Fór Nesjavallaveginn heim. Gróðurhúsáhrifin virðast hafa opnað hann í mars þetta árið. Það man ég ekki eftir að hafi gerst áður. Við ættum kannski að skoða það mál eitthvað nánar.

Var upptekinn í gærkvöldi. Skátakórinn byrjaði að taka upp disk sem kemur að öllum líkindum út með vorinu fyrir landsmótið í sumar. Tókum upp tvö lög í fríkirkjunni í Hafnarfirði og höldum áfram á þriðjudaginn.

Fischer karlinn er kominn til landsins og þegar farinn að kasta sprengjum. Það er nú reyndar gott að vita af því að hann er ekki lokaður lengur inn í japönsku fangelsi í níu mánuði fyrir það eitt að tefla skák. Veit ekki hvor hafði sig að meira fífli hann eða Wiesenthal stofnunin sem svaraði honum í heimspressunni! Þetta á að heita virt stofnun sem er í fjölmiðlasamskiptum allt árið og því með mikla reynslu á því sviði. Hvernig dettur þeim í hug að svara manni sem allir vita að er fárveikur rugludallur? Maður svarar ekki svoleiðis og málið fellur dautt niður þar sem enginn hlustar á hann hvort eð er vegna þess að hann er jú fársjúkur blessaður maðurinn. Þeir ættu frekar að eyða orkunni í að losa heiminn við útrýmingarbúðirnar á Guantanamo. Þar ætti þeim nú að renna blóðið til skyldunnar og frelsa þá sem þar hafa verið ólöglega í haldi án dóms og laga í þrjú ár...og hananú!!!

Jæja...action paction...nú kýlir maður skoðanakönnun númer 1 á algjöra endastöð og númer 2 nær sinni endastöð! Adíos Amigos!

Góðir Íslendingar, til hamingju með nýjasta öryrkjan ykkar!

2005-03-24T02:45:00.000Z

Já, vegir Davíðs eru órannsakanlegir!

Hugsið ykkur...það er svo mikið góðæri núna að viðskiptahallinn er næstum því orðinn lóðréttur, svo mikið kaupum við inn í landið af ýmiss konar varningi. Á öðru hverju götuhorni eru sprottin upp bílaumboð sem flytja inn Porsche, Benz og BMW, Lexus og aðrar eðalsjálfrennireiðar í áður óþekktu magni. Íbúðaverð hækkar lóðrétt og Íslendingar eru í óða önn með að kaupa upp Bretland. Til að kóróna allt saman, auka notkun á allt of miklu fjármununum okkar og væntanlega draga úr þennslu höfum við nú tekið upp innflutning á öryrkjum frá Japan.

Hvaða húmor er þetta að sækja Fischer rugludall um hálfan hnöttinn? Við erum í stólpavandræðum með að halda utan um alíslenska geðsjúklinga og hef ég sjálfur kynnst sem aðstandandi að þar stöndum við okkur ekki mjög vel. Þá dettur Davíð í hug að flytja einn frægasta geðsjúkling heims til landsins alla leið frá Japan.

Reyndar það sem gerir þetta skemmtilegt er að þetta er í andstöðu við Bandaríkjamenn og okkur finnst alltaf skemmtilegt að skella á nefið á stóru þjóðunum. Munið þið þegar aðstoðarforsætisráðherra Taiwan kom hingað fyrir ekki mjög mörgum árum? Þá mótmæltu Kínverjar harðlega (eins og þeir gera líklega alls staðar þar sem hann fer). Þau mótmæli hleyptu Íslendingum kapp í kinn og við tókum á móti þessum manni eins og hann væri æskuvinur okkar og hann varð skyndilega miklu velkomnari en hann hefði nokkurn tímann orðið án kvartana Kínverja - auðvitað bara til þess að gefa Kínverjum langt nef. Nú gerum við það sama við Fischer.

Þeir sem ekki þekkja sögu Taiwan þá er það lítil eyja undan ströndum Kína sem ákvað upp á sitt einsdæmi að gerast sjálfstæð og stofna "Lýðveldið Kína" (e. Republic of China) í staðinn fyrir "Alþýðulýðveldið Kína" (e. People's Republic of China) sem er formlega nafnið á stóra bróður. Kínverjum var ekki skemmt en þetta var í miðju kalda stríðinu og Bandaríkjamenn tóku Taiwana upp á sína arma af því Kínverjar voru kommar og því "vondi karlinn". Kínverjar létu gott heita en hafa alla tíð verið hundfúlir út í Taiwan. Þeir hafa aldrei viðurkennt Taiwan sem sjálfstætt ríki heldur halda því fram enn þann dag í dag að Taiwan sé í raun og veru hluti af alþýðulýðveldinu Kína.

En aftur að Fischer...af hverju Fischer? Hvað er svona merkilegt við Fischer?

Hann er einn af þessu svokölluðu "Íslandsvinum", fólki sem hefur komið hingað í viðskiptaferð í nokkra daga, haldið tónleika, sýningar, keppt á íþróttaviðburðum o.s.frv. og fengið greitt fullt af peningum fyrir áður en það fór aftur heim. Fischer kom í svona heimsókn 1972 þegar hann keppti við Spassky um heimsmeistaratitilinn í skák, Bandaríkjamaður við Rússa í kalda stríðinu miðju. Þeir hittust síðan aftur félagarnir í Svartfjallalandi eða einhverjum af þessum Balkanlöndum (gömlu Júgóslavíu) árið 1992 til að fagna 20 ára afmæli einvígisins og vekja athygli á stríðsástandinu í Júgó sem þá var. Þá var í gangi viðskiptabann á þetta svæði sem Fischer lét lönd og leið og síðan hefur hann verið á flótta undan Bandaríkjamönnum sem hafa birt á hann kæru fyrir að rjúfa viðskiptabannið með því að keppa þarna 1992. Þvílíkt bull!

Við tökum því við karlinum eins og hann sé þjóðhöfðingi enda er stóri feiti strákurinn í götunni með kúrekahattinn að nýðast á vini okkar og því tökum við hann upp á okkar arma. Þýðir þetta að við ætlum að beila alla Íslandsvini út úr fangelsum um alla heim og enda sem einhvers konar "celebrity fangaeyja"? Fullir hljómsveitarmeðlimir sem komu hingað einhvern tímann á undanförnum áratugum geta hringt í Dabba þegar þeim er stungið inn á fylleríi víðs vegar um heim og beðið hann um að senda þeim passa. "Ekkert mál strákar, þið eruð nú einu sinni Íslandsvinir - ha!", segir Dabbi og afgreiðir málið með forgangshraði.

Fischer er ekkert merkilegri en allir hinir "Íslandsvinirnir". Það er alltaf talað um að hann sé í sérstöku sambandi við land og þjóð - ekki hef ég tekið eftir því! Gæinn hefur alla vega ekki dottið í hug að koma í heimsókn og rækta sambandið í heil 30 ár!!!

Hvað gerist síðan þegar hann kemur til landsins? Þarf þá að greiða honum eins og öðrum stórmeisturum laun frá ríkinu til að hann geti stundað skákina (sem hann hefur ekki stundað í 15 ár). Bíðið bara, hann er kjaftforari en allt sem kjaftfort er og innan nokkurra mánaða verður hann farinn að kvarta yfir lágum örorkubótum á Íslandi. Það er kannski ástæðan fyrir því að Garðar, fyrrverandi framkvæmdastjóri Öryrkjabandalagsins og óvinur Davíðs nr. 1 er í vinahóp Fischers. Hann hugsar sér gott til glóðarinnar að fá til landsins háværan "celebrity" öryrkja sem gæti orðið öflugur fyrir málstaðinn. Já, það eru margar athyglisverðar hliðar á þessu máli - og engin eðlileg eða skiljanleg.

Úr því sem komið er verðum við bara að vona að karlgreyinu eigi eftir að líða hér þokkalega vel með sinni japönsku konu en að hann verði ekki bara til vandræða.

En hver skyldi vera næstur? Kannski við ættum að bjóða Karli Bretaprins og nýju konunni hæli eða Michael Jackson!

Svo er náttúrlega enn einn möguleiki; Kannski ætlar Dabbi bara að lokka hann til landsins og skipta síðan á honum við Bandaríkjamenn og nokkrum F15 þotum í Keflavík...Vegir Davíðs eru órannsakanlegir!

Bloggið komið í lag...Sumarbústaðaferð frestað til morguns...

2005-03-23T23:13:00.000Z

Nú virðist bloggið mitt vera komið aftur í lag. Hægri vængurinn hafði dottið niður fyrir textaboddýið en er nú kominn aftur á sinn stað. Veit ekki hverju ég á að þakka þennan óvænta bata en ég sendi Hr. Blogger.com póst og bað hann um að aðstoða mig. Gef mér að hann hafi kippt þessu í liðinn. Sé svo verð ég nú að hrósa þeim fyrir snilldarþjónustu. Hlýtur að vera ansi mikil vinna að svara öllum póstum sem þeir fá í inboxið sitt alls staðar að úr heiminum!

Skrítið annars þetta bloggdæmi. Hvar er gróðinn við það að láta mig og milljón aðra hafa aðgang að fríu vefsvæði? Þeir hafa ekki einu sinni klínt auglýsingu inn á bloggið hjá manni eins og þeir íslensku gera á folk.is. Þar sér maður mögulega viðskiptahugmynd en ég skil ekki alveg hver borgar brúsann í þessu www.blogger.com. Þarf væntanlega engan smá server til að halda þessu dæmi gangandi út um allan heim. Skilst að þetta hafi byrjað sem eitthvað fikt en óboj óboj þetta er sko ekkert fikt í dag heldur meiriháttar dæmi með kostnaði upp á tugi eða hundruð milljóna á ári. Ef þið vitið hvar herra blogger.com fær tekjurnar sýnir deilið því með okkur. Örugglega athyglisvert.

Seinkaði sumarbústaðarferð til morguns. Þarf að grunnvinna gagnaskránna fyrir Verzlókönnun 2 og það er miklu betra að gera það í bænum þannig að hægt sé að keyra hana í gegnum SPSS áður en ég fer með allt saman austur og vinn úr því. Er með SPSS hérna í bænum en ekki á fartölvunni. Fyrsta verk á morgun, eftir sturtu og Cheerios, verður því að þeysast út á landsbyggðina í bústað 4 í Straumnesi við Úlfljótsvatn. Hlakka til - Það verður ljúft!

Skellti mér annars á skátakóræfingu í gær. Upptaka á nýjum diski hefst næstkomandi þriðjudag í fríkirkjunni í Hafnarfirði. Þá verður maður...tja...upptekinn.

Clint Eastwood & sumarbústaður um páskana

2005-03-22T17:53:00.000Z

Fór á "Million Dollar Baby" með Clint Eastwood í gær. Mjög flott mynd og gerði mikið meira en að standa undir væntingum, alla vega hjá mér. Þau voru þarna þrjú sem málið snérist um leikin af Clint sjálfum, Hillary Swank sem lék box stelpuna og Morgan Freeman sem lék aðstoðarmanninn í boxgymminu. Þau voru frábær enda hrepptu þau öll óskarinn fyrir frammistöðu sína minnir mig. Handritið er snilld og tekur margar óvæntar beygjur og teygjur er í senn mannlegt og spennandi. Þetta er mjög góð mynd og ég mæli eindregið með henni. Ef þið ætlið á eina mynd á næstunni þá er þessi mjög góður kostur! Clint verður alltaf betri og betri leikstjóri og alveg eins og í vestrunum í gamla daga þá veit hann að það er ekki alltaf hvað er sagt heldur hvernig hlutirnir eru sagðir sem skiptir máli. Hann er snillingur í að nota þagnir sem margfalda áhrif augnabliksins. Meistari! Ég þarf auðsjáanlega að finna fleiri myndir með honum. Held ég sé t.d. ekki búinn að sjá Mystic River. Langar líka að sjá fleiri myndir t.d. Ray um Ray Charles. Ef ÞÚ ert ekki búin(n) að sjá Ray en langar bjallaðu þá og kýlum á það!

Fer einn í sumarbústað í Straumnesi við Úlfljótsvatn (við hliðina á Steingrímsstöð) um páskana. Vinnubúðir - Einbeitingarbúðir (Concentration Camps) eins og Hitler kallaði þetta. Ætla að nota tímann þessa daga til að klára skoðanakannanirnar báðar. Þeir ættu að duga til þess. Verður mikið ljúft að vera búinn með þær. Unnur og hugsanlega fleiri mæta á svæðið seinni partinn á laugardaginn og verður þá grillað af miklum móð. Mér er sagt að verði ég ekki búinn með skoðanakönnunina þá fái ég ekkert að borða. Eins gott að standa sig!

Allir velkomnir að kíkja við um helgina og skella sér í pottinn!

Er að spá í að renna annað kvöld (miðvikudagskvöld) á Úlfljótsvatn í páskaútilegu Skjöldunga, borða með þeim góðan mat, fylgjast með litlu englunum vígjast inn í skátafjölskyldu heimsins og vera á kvöldvökunni með þeim áður en ég renni í bústaðinn við hinn enda vatnsins. Væri nú skemmtilegt - ótrúlega mikil orka alltaf í kringum unglinga í action!

Kruss, Kross og páskaegg!

2005-03-21T18:15:00.000Z

Kröftug helgi að baki og fullt af óvenjulegum uppákomum.

Skellti mér á félagsvist með Hönnunardeildinni hjá OR á föstudagskvöldið. Þetta er árlegur viðburður; spil, öl og matur. Rúmlega 55 manns mætti í félagsheimilið niður í Elliðaárdal og var spilað á 13 borðum. Þetta var mjög skemmtilegt. Maður hitti fullt af fólki af því maður flyst á milli borða og spilar eiginlega við alla. Ég mundi nú ekki alveg hvernig þetta var þegar ég mætti enda held ég að ég hafði seinast spilað félagsvist þegar ég fór ca. 11 ára með pabba og mömmu á félagsvist hjá starfsmannafélagi ÁTVR þegar pabbi vann þar. Það var, já líklega í kringum 1985. Það er skemmst frá því að segja að yðar einlægur fór með sigur af hólmi í þessari merku keppni og var það vegsemd sem kom mér VERULEGA á óvart enda ekki mikill spilamaður. Mun því koma sterkur inn í félagsstarf aldraðra þegar þar að kemur! Verðlaunin voru forláta páskaegg af stærstu gerð og var þess neitt á staðnum. Páskaeggið rann ljúflega niður með gítarspili og söng. Sátum nokkur hópur og sungum í svolítinn tíma og tókst með því að hrekja ótrúlegan fjölda fólks út á ótrúlega skömmum tíma. Maður ætti að taka að sér að gerast útkastari!

Hannes bróðir hafði beðið mig um að skutla þeim í sumarbústaðinn þeirra í Húsafelli á laugardaginn og sækja þau á sunnudaginn. "Ekkert mál" sagði ég en það má eiginlega segja að helgin hafi farið í þetta! Tók sex klukkutíma með öllu á laugardeginum og aðra sex á sunnudagskvöldinu, samtals tæpa 600 kílómetra. Fékk þó glæsilegan hamborgarahrygg a la Rósa hans Hannesar í matinn á laugardaginn. Maður keyrir nú 600 km fyrir það! Bústaðurinn þeirra er hins vegar hin hlýlegasti og ágætt að eiga hann inni ef í harðbakkan slær í sumarbústaðarmálum.

Náði í bæinn fyrir kvöldmat á laugardaginn og skellti mér með Ástu á tónleika um kvöldið. Þar var maður heldur betur að stíga inn í tja...athyglisverðan heim því tónleikarnir voru í Krossinum í Kópavogi. Úff, alltaf athyglisvert að prófa eitthvað nýtt. Reyndar var þetta nú ekki jafnskelfilegt og maður var búinn að búa sig undir enda um að ræða opna tónleika en ekki samkomu. Maður hoppar út í djúpu laugina einhvern tímann seinna og athugar hvort maður lifi það af. Um var að ræða útgáfutónleika Írisar Verudóttur sem var að gefa út gospeldisk. Stelpan er þrususöngkona og mikið af þessum lögum voru mjög flott. Tónleikarnir var því mjög góðir og Írisi tókst að skapa mjög heimilislega og þægilega stemningu þar sem hún hálfsat kasólétt uppi á sviði, án þess þó að slaka nokkuð á tónlistarlegu kröfunum eða frammistöðunni. Semsagt mjög fínt og ekki að sakaði að Haffi, starfsmaður hagmála OR spilaði á bassa og gerði það með glans.

Eftir tónleikana fengum við okkur svo ís, rúntuðum, fundum Unni niðri í bæ og fórum á kaffihús. Fínt kvöld.

Fyrri hluti sunnudagsins (fyrir sumarbústaðaferð) fór í að kaupa afmælisgjöf handa Kristófer sem ég þarf að koma í póst til Danaveldis en kappinn fyllir sjöunda árið þann 30. mars. Það sem ég keypti var....nei....má ekki segja!

Annars gaman að heyra í Bryndís Ösp í gestabókinni. Endilega skiljið eftir skilaboð ef þið eigið leið hjá!

Var annars að boða HR-hitting í hádeginu þann 7. apríl á Sjanghæ við Laugaveginn. Það verður gaman að hitta hópinn, þ.e. þá sem ekki eru á fæðingardeildinni eða í útlöndum akkúrat þann daginn. Hópurinn er að standa sig með prýði við uppbyggingu á framtíð landsins enda gerir hann flest almennilega sem hann gerir á annað borð.

Verzlókönnun - Part II Ný Vaka komin í heiminn!

2005-03-17T23:34:00.000Z

Þá hefur nú stór-Skjöldungunum fjölgað um einn. Vaka vinkona Ágústsdóttir skáti og Orkuveitupía eignaðist 14 marka stelpu á mánudaginn. Nú spretta börn fram úr öllum hornum hjá vinum og kunningjum. Fullt af þeim komin og fullt af þeim á leiðinni allt í kringum mann. Skemmtilegt - Væntanlega aldurinn. Eftir slatta af árum verða allir vinir manns haldandi fermingarveislur, þá giftingarveislur, farnir að tala um barnabörnin og loks farnir að mæta í jarðafarir 15 sinnum á ári. Já, að sumu leyti er lífið svolítið fyrirsjáanlegt...og þó ekki!

Eyddi annars fyrri hluta kvölds í að slá inn Verzlókönnun númer 2 í ár. Ekki það að ég sé ekki kominn með upp í kok af Verzlókönnun númer 1 en þar sem ég er að klára seinustu skýrsluna þar þá tók ég að mér aðra. Jibbíííí... Þessi er hins vegar verulega meðfærilegri en hin stóra. Verður þó fullt af vinnu. Merkilegt hvað Mammon getur dregið mann úti í!
Reyndar alltaf mjög gaman að koma upp í Verzló. Ofsalega góður kraftur í því húsi og krökkunum þar. Enda eru þeir ánægðir með skólann sinn. Skamkvæmt könnuninni voru 77,8% Verzlinga frekar eða mjög ánægðir með námið....geri aðrir skólar betur.
Var með eitthvað á bilinu 10-15 manns áðan sem sló inn hátt á fimmtánda hundrað spurningalista inn í fína Accessformið mitt á fjórum tímum eða svo. Verulega vel að verki staðið.

Jæja, best að rumpa Verzlókönnun nr. 1 af...!

Kíkið á þetta...stjórnmálaflokkarnir ættu kannski að fá þessa til að sjá um kynningarmálin fyrir sig.

Sumarið er tíminn!

2005-03-16T19:38:00.000Z

Nú er sumarið smám saman að taka á sig mynd, alla vega svona stærri viðburðir.

Maður verður væntanlega samkvæmt hefð í Jónsmessugöngu Útivistar yfir Fimmvörðuháls um Jónsmessuna sem er seinasta helgin í júní með tilheyrandi varðeldum og gleði.

Þá erum við systkinin, ég og Birna, að ýta af stað undirbúningi fyrir "lítið" ættarmót með afkomendum afa og ömmu og verður það vætanlega haldið í Húnavatnssýslunni í fyrstu eða aðra helgina í júlí.

Gönguhópurinn "Sárir og súrir fætur" munu leggja undir sig Skagafjörð og nágrenni frá 14.-19. júlí og verði sú ferð eitthvað í líkingu við Hornstrandaferðina í fyrra þá er von á góðu. Ferðin er óvissuferð og treystum við þeim Kristbjörgu og -veigu til þess að leiða okkur í hæfilegar ógöngur en tryggja það jafnframt að þær leiði okkur út úr þeim aftur.

Þá er ferðinni heitið beinustu leið á Úlfljótsvatn þar sem landsmót skáta verður haldið 19.-26. júlí. Það er náttúrlega bara snilld og verður án efa um að ræða stórkostlega viku.

Lokahnykkurinn í núþegarskipulögðum stórviðburðum sumarsins verður 30 ára afmælisferð Útivistar og er ég búinn að skrá mig í samsetta ferð frá 21.-28. ágúst þar sem byrjað verður að ganga gönguleiðina Sveinstind-Skælinga, haldið áfram Strútsstíg að Strút og að lokum áfram niður í Bása þar sem afmælishátíð Útivistar verður í hámarki þegar við komum á svæðið. Þetta verður náttúrlega stórkostleg ferð um stórkostleg svæði þar sem byrjað verður við Sveinstind nálægt Langasjó og endað í Básum.

Fyrir utan þetta verður Kristófer á landinu meira og minna í allt sumar og því ótæmandi tilefni til skemmtilegheita.

...og það er bara mars ennþá! Stefnir allt í snilldarsumar!

Ísland - sækjum það heim!

Gildur limur...loksins!!!

2005-03-16T09:58:00.000Z

Skellti mér í ræktina í morgun!!! Jibbbíííí...Það þýðir að nú er fjöldi heimsókna næstum því orðinn jafn hár og fjöldi mánaða sem ég hef greitt af kortinu! Nú er bara málið að halda dampi...kannski þó ekki sama dampi og áður. :) Ég er því hægt og bítandi að verða "gildur limur í sportamannafjelaginu" eins og Færeyingarnir myndu orða það í stað þess að vera bara styrktarmeðlimur - sem er þó vissulega göfugt hlutskipti.

Fyrstastigsprófið í tónfræði féll hins vegar niður á mánudaginn...átti reyndar held ég aldrei að vera. Við vorum tveir og skildum báðir orð kennarans þannig að það ætti að vera próf á mánudaginn. Ég held hins vegar að hún hafi bara verið að blekkja okkur til að læra heima og beitt fyrir sér tungumálamisskilningi...hún er nefnilega Tékki að ég held og talar svolítið bjagaða íslensku.
Var hins vegar ágætlega undirbúinn og hefði alveg tæklað þetta próf. Bíð því spenntur eftir því að vera þrykkt í prófið eftir páska. Byrja bara á 2. stigi strax og klára 1. stigsprófið þegar kennaranum dettur í hug.

Úff próf á eftir...

2005-03-14T16:04:00.000Z

Próf á eftir. Leið eins og í gamla daga þegar ég settist loks niður klukkan tíu í gærkvöldi, fór að lesa yfir dótið og komst að því að þetta var nú AÐEINS meira heldur en mér hafði minnt!

Komst þó í gegnum allt og í rúmið um tvöleytið. Um er að ræða tónfræði, 1. stig í söngskólanum. Bara nokkuð skemmtilegt. Ætla að reyna að vera duglegri að læra á 2. stiginu....hljómar kunnuglega....en einhvern veginn slampaðist maður nú í gegnum þetta. Hefði þó viljað standa mig betur og almennt sofa meira fyrir próf á minni skólagöngu. Læri það vonandi þegar maður fer í masterinn!

Jæja, best að fara að skella sér...þið hrækið á eftir mér ef ég mæti ykkur á Miklubrautinni!...en þó ekki á nýja fína bílinn minn!

Hefur bloggið mitt fitnað?

2005-03-11T22:02:00.000Z

Segið mér...birtist bloggið mitt á skjánum hjá ykkur eins og hjá mér. Þ.e. að linkalistinn og allt sem á að vera hægra megin dettur niður fyrir skrifaða "body" svæðið í staðinn fyrir að vera á sínum stað á hægri vængnum?

Er þetta af því að bodysvæðið hefur breikkað og þess vegna dettur hitt niður eða af því að heildarsvæðið hefur mjókkað og þess vegna datt þetta niður? Vitið þið hvernig þetta gerist? Hjálp eða ráðleggingar varðandi lagfæringar væru vel þegnar.

Hólmurinn, fellið og fleira!

2005-03-11T21:36:00.000Z

Já, við Birna systir renndum í Stykkishólm í gær. Frábær túr og nýja Fiestan stóð sig með miklum sóma. Það er ótrúlega auðvelt að renna þarna vestur. Þetta eru ca. 170 km. hvora leið og vorum við ca. klukkutíma og þrjúkorter hvora leið, allt á malbiki, breiðir og góðir vegir, gott veður, góður félagsskapur, Hörður Torfa í spilaranum og síðan var bara sungið út í eitt! Alltaf gaman þegar við systkinin ferðumst saman.

Komum til Stykkishólms um klukkan hálfátta og tókum hring um svæðið. Stykkishólmur er mjög fallegur bær, mikið af fallegum, gömlum, nýuppgerðum húsum, fallegt bæjarstæði og gaman yfir að líta. Alltaf með gönguskóna í skottinu löbbuðum við upp á Hólminn sjálfan eða "grjótið" sem vinnufélagar Birnu, ættaðir úr Hólminum, kölluðu "fjallið" sem við gengum á. Fallegt útsýni og ágætis tuttugumínútna labbitúr í góðu veðri með útsýni yfir bæinn. Voða fínt.

Fórum síðan á Narfeyrarstofu. Þangað var Hörður mættur og búinn að stilla upp. Þetta er notalegt kaffihús í gömlu og fallegu húsi. Hluti af því að ferðast um landið er að borða lókalinn og fengum við okkur "Narfeyring", hamborgara hússins. Stórmerkilegur réttur. Þarna var kominn burger með beikoni, gráðosti og hvítlauk. Hverjum hefði dottið í hug að setja þetta saman á hamborgara? Bragðið var því algerlega framandi og er þetta með betri borgurum sem ég hef smakkað lengi! Á eftir var síðan komið að kakó og súkkkulaðiköku - nett sykursjokk! Þjónustan á staðnum var líka afslöppuð og skemmtileg. Hvet landann til að fjölmenna í Narfeyrarstofu - verður ekki svikinn af því!

Spjölluðum við Hörð þangað til hann fór á svið. Þaðan raðaði hann niður snilldinni. Tók fullt af Ælandssöngvum og bland við ný og gömul lög úr öðrum áttum. Alveg frábært og í raun enn betra því við vorum komin svo langt að. Hörður er náttúrlega snillingur á sviði. Hann er leikari og leikstjóri að mennt og er því í rauninni að keyra þarna lítið farandleikhús með sjálfum sér og gítarnum. Æland er eyja sem Hörður hefur skapað. Hún er hvergi en er þó til. Þetta er staðurinn sem fýlupokarnir og leiðindaliðið hlýtur að koma frá því ekki á það svipaðan uppruna og við hin - nema hvað? Stjórnarskrá Ælendinga má finna hér. Þeir hafa alltaf rétt fyrir sér, vita allt best o.s.frv.

Hörður vatt sér t.d. í hlutverk Kalla kropps sem er hustler á níræðisaldri sem fjallar um það hvernig hann heillar dömurnar á elliheimilinu. Alveg óbroganlegur texti og bregður Hörður sér í karakter þessa gamla manns af mikilli snilld. Þau hjónin Karl R. emba og Kven R. emba komu við sögu sem og Per vinur þeirra sem ber ættarnafnið Vert. Já, það er mikið um athyglisvert fólk á Ælandi. Titillinn á blogginu mínu er einmitt frá Karl komið og má finna textann í bloggi frá því í janúar.

Síðan tók hann náttúrlega standarda eins og Dé Lappé og Ég leitaði blárra blóma sem og fullt fullt af öðrum lögum.

Tónleikarnir voru búnir milli ellefu og hálf tólf og renndum við Birna þá af stað í bæinn, enn með Hörð í spilaranum, allt í botni og sungum svo glumdi í bílnum. Komum í bæinn upp úr eitt eftir þennan líka fína bíltúr.

Það gefur lífinu tilgang að skella sér í bíltúr út á land á tónleika og síðan aftur í bæinn eins og ekkert hefði í skorist. Svona á að gera þetta!

Fórum síðan systkinin áðan upp á Úlfarsfell. Sendi Birnu sms: "Úlfarsfell í sólinni?" og það þurfti náttúrlega ekki meira. Upp fórum við og er maður að sjálfsögðu endurnærður á eftir. Alltaf svo gott að komast út!

Já, lífið er jafnskemmtilegt og fjölbreytt og maður ákveður að það sé!

Meistarinn!

2005-03-11T02:05:00.000Z

Ég vil sjá og sigra.
Ég sættist ekki á minna.
Hugurinn ber mig hálfa leið
hitt er bara vinna.
[Brekkan; Hörður Torfa]

Meistarinn var flottastur í kvöld! Meira um það á morgun...

Hjörtur & Hólmurinn

2005-03-10T14:38:00.000Z

Heyrði aðeins í félaga Hirti von London á MSN í morgun. Gaman að því. Kappinn þrítugur í dag! Been there - done it! Ég spurði hann hvernig hann væri að fýla það að vera kominn á fertugsaldurinn. Hann var ekki nægilega sáttur, sagðist vera þunnur, þreyttur og hálf illa fyrirkallaður enda mikið og krefjandi vinnudjamm í gær! :) Sagði því að fjórði áratugurinn virkaði því frekar strembinn svona enn sem komið er! :)

Söngur í Söngskólanum á mánudag, söngur með Skátakórnum á þriðjudag, söngur með Orkuveitukórnum á miðvikudag, söngur með Herði Torfa á tónleikum í Stykkishólmi í kvöld... Glæsilegt!

Heyrði í meistaranum í fyrradag og var hann mikið sáttur að við systkinin skyldum ætla að láta sjá okkur Vestur. Alltaf gaman í ferðalögum og á tónleikum! Verða haldnir á Narfeyrarstofu í Stykkishólmi sem lítur alla vega mjög vel út á netinu.

Kíkti við hjá Steina hjá Flugleiðum á mánudaginn í stutt brainstorming varðandi Flugleiðavefinn. Lét þar móðan mása með aðstoðarbeibunum hans Steina og hafði bara nokkuð gaman af. Stal síðan gestapassanum og fattaði það ekki fyrr en ég var kominn upp í vinnu. Sendi Steina hann. Ertu búinn að fá hann karlinn?

Er síðan á leiðinni á Pilobolus í Laugardalshöllinni á laugardagskvöldið með STOR (Starfsmannafélagi OR). Verður örugglega skrítið og skemmtilegt. Getur einnig verið að ég skelli mér á dansnámskeið um helgina en það er þó ekki alveg öruggt ennþá. Síðan er það bara gamla góða skoðanakönnunin sem kemur ennþá sterkt inn. Er að byrja á annarri í næstu viku þannig að það væri mjög jákvætt að ná að klára þá fyrri núna næstu daga. Mmm...

Er annars búinn að fá sumarbústað í Straumnesi yfir páskana. Allt skemmtilegt fólk velkomið á svæðið.

Semsagt, lífið bara rólegt, afslappað og yfirvegað eins og venjulega!!! ;)

Eldmóður...lafmóður...Úlfljótsvatn...dans og Gulla á öxlina!

2005-03-06T23:46:00.000Z

Úff, önnur vika og engin frammistaða í bloggmálum. Stefni að betrumbót!

Vitlaust að gera alla vikuna. Atvinnuumsóknarsíðan hjá okkur var að ergja okkur fyrri hluta vikunnar með forritunarvillum og veseni en nú er það vonandi að baki. Síðan tók við skipulagning Eldmóðs 2005, stefnumótunardaga starfsmannahaldsins sem haldnir voru á fimmtudag og föstudag niðri í stöðvarstjórahúsi í Elliðaárdal. Við Sólrún sáum um þá og vorum búin að stefna að skipulagningu þessa viðburðar með vikulegum fundum frá því um áramót. Héldum tvo fundi í janúar, ýttum restinni á undan okkur sökum annarra anna. Ætluðum síðan heldur betur að taka á því fyrri hluta vikunnar, tókum frá allan mánudaginn og allan þriðjudaginn en náðum síðan ekki að losa okkur fyrr en klukkan þrjú seinni part þriðjudags. Var þar meðal annars ákveðið að skýra viðburðinn "Eldmóður 2005", þar sem okkur þóttu "Stefnumörkunardagar" frekar leiðinlegt og lítt uppörvandi nafngift. Sannaðist þarna hið fornkveðna að maður er jafnlengi að skipuleggja svona hluti og maður hefur tíma til! Eitthvað af miðvikudeginum fór í þetta einnig og síðan fram á kvöldið í þátttakendamöppugerð. Skapaði ég þar vin okkar "Eldmóð snögga" sem bauð alla velkomna á staðinn á forsíðu möppunnar. Var þar kominn Flamboree karlinn frá mótinu í Belgíu 2003 sem ég Photoshoppaði út úr íslenska fararmerkinu. Hann er nefnilega með eldhöfuð og því kjörinn persónugervingur "Eldmóðs 2005". Maður er nú stundum óttalegur leikskólakennari!

Fyrri hluti fimmtudagsins fór í það að finna hlutverk(mission) og framtíðarsýn(vision) fyrir sviðið, þ.e. starfsmannahald OR. Gekk það samkvæmt áætlun og var klárt á hádegi. Niðurstaðan varð sú að hlutverk okkar er (svona nokkurn veginn eftir minni) að styðja, leiða og upplýsa starfsmenn með það að markmiði að hámarka nýtingu þess tíma sem starfsmenn selja Orkuveitunni. Mæltist þetta vel fyrir þótt nokkrar umræður spynnust um "selja" hlutann og það hvort starfsmenn upplifðu sig "að selja". Við ákváðum að það væru þeir að gera hvort sem þeim líkaði það betur eða verr og því þyrftu þeir að tryggja hver og einn að þeir væru söluhæf vara. Okkar er að aðstoða þá við það. Það varð niðurstaðan því við vildum hafa þetta svolítið beitt. Mun þetta örugglega vekja viðbrögð innanhúss - sem er gott.

Eftir hádegi komu Ingibjörg og Halli, samstarfsaðilar Þekkingarmiðlunar sem sérhæfa sig í hópeflisæfingum og tóku okkur á hópeflisnámskeið seinni partinn. Gekk það frábærlega, fór fram utandyra og innan með leikjum, verkefnum, viðræðum o.fl. Var þarna um að ræða nokkra velþekkta "skátaleiki" eins og t.d. að koma hópnum yfir "brennandi hraun" á nokkrum plönkum án þess að snerta jörð. Endaði það með því að við vorum tveir sem bundum plankana undir skóna okkar með skóreimum og héldum á öllum hinum, háum sem lágum, yfir hraunið. Gulla vissi ekki hvaðan á hana stóð veðrið þegar ég vippaði henni upp á öxlina í brunamannataki þannig að skyndilega stóð hún, rúmlega fimmtug konan, með hausinn niður og fæturna upp í loft og ég arkaði með hana yfir hraunið. Algjör snilld, ekkert smá skemmtilegt og þjappaði saman hópnum.

Seinna var okkur m.a. skipt í hópa, tvö og tvö, bundið fyrir augun á öðru, farið út að labba og hitt látið stjórna. Traust og skýr stjórnun lykilatriði. Ekki mátti segja orð og aðeins stjórna með vísifingrinum. Gekk glymrandi vel hjá okkur Heiðu en Skúli missti Gullu einhvert út í buskan. Tær snilld. Svona var haldið áfram fram eftir degi auk ýmissa verkefna um styrkleika okkar, veikleika sem og athyglisverðar og hreinskiptar umræður. Það er ekki spurning að þetta var mjög gott fyrir hópinn að fara í gegnum svona pakka, þrátt fyrir að hann hafi verið frábær fyrir. Þessum tíma var mjög vel varið, jók traust milli manna, við rannsökuðum hvernig við leysum verkefni sem hópur og greindum hvar við værum að standa okkur vel og hvað við mættum bæta á hreinskilinn hátt auk þess sem í lokin var okkur falið að hrósa hverju öðru. Það er ekki vandamál í þessum hópi en var þó athyglisvert að fara svona hringinn og hrósa fólki. Mættum gera það oftar þótt við séum nokkuð dugleg að því.

Mættum aftur á föstudaginn og héldum áfram vinnunni þar sem frá var horfið. Ingibjörg og Halli byrjuðu með okkur, fóru yfir atburði gærdagsins og könnuðu hvernig við hefðum sofið á niðurstöðunum. Fórum síðan aftur í stefnumótunarvinnuna. Settum upp markmið og verkefnalista sem síðan verður fylgt eftir á næstu dögum og vikum og vorum að því til að verða fimm.

Dagarnir tókust því með mikilli prýði og öll markmið náðust sem að var stefnt. Þetta var mjög gaman, krefjandi en jafnframt mjög fræðandi, bæði um hópinn og þau verkefni sem framundan eru. Hópurinn er samstilltari og heilsteyptari og var þó góður fyrir.

Á föstudagskvöldið var mökum síðan boðið að bætast í hópinn og djammað framyfir miðnætti. Kom endingin og kraftur djammsins mér nokkuð á óvart þar sem fólk var alveg búið á því eftir stanslausa vinnutörn frá 8 til 17. Við fengum hins vegar gott að borða sem gaf okkur aukinn kraft. Var haft á orði um daginn að djammið yrði líklega kallað "Lafmóður 2005" eftir þennan actiondag!

Unnur og Ásta komu eftir miðnætti og við renndum ásamt Heiðu og Jóni í nýja húsið þeirra í Seljahverfinu. Þar var spjallað og tekið því rólega fram eftir nóttu áður en haldið var heim á leið.

Tók því rólega á laugardaginn. Vann svolítið í skoðanakönnuninni (já hún er enn til staðar...) og fór síðan austur á Úlfljótsvatn og spilaði á Gilwellkvöldvöku með Björgvini Magnússyni um kvöldið. Það er alltaf krefjandi enda allt allt önnur lög en maður er að spila allt árið um kring. Mjög skemmtilegt og gaman að hitta góða vini og fá smá smakk af Gilwell. Eftir kvöldvökuna var síðan næturleikur sem fram fór á blöndu af skátadulmáli og ungversku og var ég staðsettur uppi í KSÚ. Þar var brunakerfið á fullu þegar ég kom þannig að ég nýtti það ástand þegar ég bjó mér til karakter til að leika þegar ég tók á móti krökkunum. Sat þarna með risastórt sigti á hausnu, umvafinn garðslöngum sem ég blés í og spilaði lúðrasveitartakta í takt við brunabjölluna sem alltaf vældi. Talaði við þau í sama tóni og brunabjallan og lét þau meira að segja dansa vals eftir henni. Mjög skemmtilegt. Það er alveg magnað hvað maður getur verið steiktur!

Síðan var brælt í bæinn og komst ég meðal annars að því að nýja Fiestan tekur hinni gömlu verulega út þegar maður er að drífa sig á djammið. Sú gamla slapp í 120 en var orðin leiðinleg þar fyrir ofan. Það var hins vegar staðfest að sú nýja kemst töluvert yfir 130 án þess að maður finni neitt fyrir því. Dugleg stelpa! Ég myndi hins vegar aldrei keyra svona hratt þannig að ég hef líklega enga þörf fyrir þessa þekkingu. ;)

Þegar í bæinn var komið skipti ég eldsnökkt um föt og fór á Players. Þar voru Unnur, Ásta og Héðinn og Svava vinir þeirra dansandi sem aldrei fyrr. Þangað var ég kominn um hálftvö og dansaði til klukkan að ganga fjögur. Glæsileg lok á fínu kvöldi.

Í dag ætlaði ég að vera í skoðanakönnuninni en veðrið var of gott. Baðaði bílinn minn (enda ekki vanþörf á) og síðan sjálfan mig í sundi. Lá í diskinum í Laugardalslauginni rúma þrjá klukkutíma og glápti út í loftið í góða veðrinu áður en ég var farinn að hafa áhyggjur af því að kjötið færi að leysast af beinunum bráðlega. Synti þá 500 metra og fór heim í skoðanakönnun.

Já, stórskemmtileg, fróðleg og spennandi vika að baki. Fékk víst úthlutað sumarbústað sem við ætlum að skella okkur í um páskana. Síðan minni ég á Stykkishólmsferð næstkomandi fimmtudag, 10. mars þar sem við systkinin auk annarra (t.d. þín lesandi góður) sem vilja koma með, ætlum að heiðra meistara Hörð Torfa með nærveru okkar á tónleikum hans í Stykkishólmi. Það verður þrusutúr!

Barnið mitt á baksíðu Moggans í dag...

2005-02-28T16:23:00.000Z

Brjálað að gera... Maður er því alveg búinn að vanrækja litla bloggbarnið sitt undanfarna daga.

Heyrði hins vegar í Kristófer fyrir helgi. Æi það er alltaf svo ljúft að heyra í honum karlinum. Hann á fullu að verða karatetöffari í Danaveldi. Kannski pabbi hans ætti bara að skella sér í austurlenskar bardagaíþróttir. Hef í alvöru verið að velta fyrir mér Thai Kwon Do (held það sé skrifað svona). Þetta er svona snerpu action íþrótt, maður þarf að mæta á ákveðnum tímum og svo er þetta svona hæfilega framandi og skrítið til að geta hugsanlega haldið einbeitingu minni í einhvern tíma. Skoða málið...!

Stutt dagbók síðustu daga...

Fimmtudagur...fórum starfsmannahaldið á vínsmökkunarnámskeið hjá Eðalvínum og þaðan heim til Sólrúnar um kvöldið.

Frábært námskeið þar sem maður draup á góðu víni, smakkaði síðan eitthvað salt og draup aftur á og þá smakkaðist vínið allt öðruvísi. Smakkaði síðan smá sætan mat og aftur bragðaðist vínið allt öðruvísi. Smakkaði síðan sterkan mat og enn og aftur bragðaðist vínið allt allt öðruvísi. Mjög athyglisvert. Vissuð þið t.d. að ef þið eruð með vínber með ostabakkanum ykkar þá "drepið" þið rauðvínið. Ef þið prófið það þá næstum því hverfur bragðið af víninu þegar maður fær sér vínber. Mjög sniðugt að salt eyðir út stemmubragðinu af rauðvíni. Stemmubragðið er þetta ramma sem mörgum er í nöp við. Ef þið kaupið vín með matnum og ykkur finnst vera of mikið stemmubragð af því, saltið þá einfaldlega kartöflurnar aaaðeins meira og þá hverfur stemmubragðið af víninum. Snilld!!!

Fórum síðan heim til Sólrúnar þar sem Snævar ofureiginmaður töfraði fram dýrindis ostabakkaveitingar sem aldrei fyrr. Ótrúlega öflugur maðurinn!

Á föstudaginn var uppskeruhátíð STOR þar sem "fólkinu á bakvið tjöldin" var verðskuldað boðið út að borða. Skemmtilegt kvöld sem hófst á minjasafni OR í Elliðaárdal, fórum síðan niður á Rauðará þar sem Food & Fun matseðillinn var innbyrtur. Magnað hvað hægt er að búa til góðan mat. Bragðlaukarnir fengu alveg sjokk í hverjum bita.
Áfram var haldið á Thorvaldsen bar þar sem við vorum að eitthvað frameftir og hitti ég meira að segja félaga Þorlák Karlsson og frú - í action á dansgólfinu eins og öflugum mönnum er lagið! Urðu þar fagnaðarfundir. Dönsuðum aðeins þar, síðan skruppum við Ásta og Unnur yfir á Dubliners, dönsuðum aðeins þar, aftur yfir á Thorvaldsen og heim. Frábært kvöld. Hafði reyndar byrjað aðeins fyrr þar sem ég mætti í vísindaferð stærðfræði- og eðlisfræðinema upp í OR og var síðan skilin eftir með það dæmi í fanginu þar sem hinir OR starfsmennirnir voru á leið á djammið. Tæklaði það og enginn dó.

Flott sýning í 100°, sýningarsal OR á Bæjarhálsinum bæðevei. Hvet fólk til að kíkja við. Meðal annars húsamyndir frá Ólafi Elíassyni...nokkuð töff. Einnig þessi líka glæsilegi rass uppi á vegg. Vissulega töff en hefur farið fyrir brjósið á sumum. :)

Laugardagur og sunnudagur fóru í vinnu (action fyrir launakeyrslu) og úrvinnslu úr skoðanakönnuninni frægu. Frægu er ekkert ofsagt því hún var á baksíðu Moggans í dag. Það hefði nú mátt lesa greinina aðeins betur yfir en skilaboðin komust til skila. Glæsilegt!

Síðan tókum við nokkur því rólega á laugardagskvöldið heima hjá Ástu í videó. Ágætt eftir ólæti föstudagskvöldsins.

Siggi söngkennari veikur í dag. Það er eiginlega ágætt þar sem ég var að skoðanakannast til fjögur í nótt og líklega ekki sérlega raddfagur í dag.

Kvöldið fer í skoðanakönnunina. Nú fer þessu vonandi að linna þegar líða tekur á vikuna. Held ég muni samt ekki ná að klára þetta alveg fyrr en um næstu helgi. Það passar. Þá er ég að taka að mér aðra! :) Maður verður að hafa eitthvað að gera. Hún verður hins vegar meðfærilegri heldur en þessi...famous last words!

Það er komið sumar - sól í heiði skín!!!

2005-02-25T15:02:00.000Z

Mmmmm..... fór út í ísbúð og náði í ís fyrir okkur í vinnunni.

Mmmm....ÆÐISLEGT!

Í Hólminn með Herði!

2005-02-21T15:47:00.000Z

Við systkinin, ég og Birna, erum að spegúlera í að renna í Stykkishólm þann 10. mars á tónleika með Herði Torfa.

Af hverju? Jú, það er alltaf gaman að skella sér í ferðalag, ekki verra en hvað annað að fara í Stykkishólm og Hörður er náttúrlega meistari.

Það eru 170 kílómetrar í Stykkishólm þannig að við þurfum að gera ráð fyrir ca. 2-3 tímum á leiðinni ef færðin er í lagi (sem hún er auðvitað alltaf fyrir Ford Fiestu!). Tónleikarnir byrja væntanlega átta eða hálfníu þannig að þá þurfum við að fara úr bænum um fimmleytið. Tónleikarnir verða til ca. tíu/ellefu þannig að þá erum við komin í bæinn aftur um tvöleytið. Þetta er á fimmtudegi þannig að mönnum er bent á að sofa bara nóttina áður í staðinn (svo geta þeir örugglega sofið á leiðinni líka ef þeir nenna ekki að syngja með okkur).

Það eru allir velkomnir með! Fínt að fá fleiri til að deila bensín og gangakostnaði sem og gleði og söng! Svo bætum við bara við bílum ef okkar fyllist.

Þetta verður þrusutúr...er það undantekningalaust þegar við systkinin leggjum land undir hjól!

Ofurafmæli!

2005-02-20T16:42:00.000Z

Jæja þá er það að baki!

Héldum upp á 50 ára afmælishátíð STOR (Starfsmannafélag Orkuveitu Reykjavíkur) á Bæjarhálsinum í gær. Eitthvað í kringum 500 manns mættu og gekk þetta eins og í sögu.

Eyjólfur Kristjánsson spilaði rólegheitarlög þangað til dagskráin byrjaði korter yfir sjö á jarðhæðinni með formlegum ræðum, bæði formanns STOR og Alfreðs stjórnarformanns, og síðan voru fyrrum formönnum félagsins færðir blómvendir að gjöf. Kom upp smá vandamál með hljóðkerfið þarna uppi þar sem hátalararnir dugðu ekki þegar allur þessi fjöldi var kominn í húsið. Munum það næst!

Þá var haldið niður á -1. hæð þar sem mötuneytið er og keyrt upp partý. Þar hafði mötuneytið sett upp fjögur hlaðborð, eitt með frönskum mat, eitt með mexíkönskum mat, eitt með ítölskum mat og eitt með asískum og voru þeim gerð góð skil...enda 500 munna að fæða.

Eyfi hélt áfram og var nú sínu sprækari en áður. Raggi Bjarna og Þorgeir Ástvaldsson mættu um áttaleytið, áttu að vera til hálf níu en gátu ekki hætt og voru til korter í níu. Ótrúlega sprækur karlinn. Hann kann enga texta sjálfur en veit að allir gestirnir kunna þá þannig að hann fær bara stóðið til að syngja með sér. Að sjötugur karl skuli geta rifið upp 500 manns sem þar á ofan er í óða önn að fá sér að borða standandi úti á gólfi er náttúrlega ótrúlega öflugt! Meistari!

Síðan kom Eyfi aftur með allt í botni þangað til lokaatriðið brast á rétt fyrir klukkan níu. Þar var mættur dúettinn Steintryggur, sem var nafn soðið saman á staðnum held ég en það voru þeir Bogomil Font (Sigtryggur Baldursson) og Steingrímur Guðmundsson trommuleikarar (Milljónamæringarnir). Búið var að koma þarna inn í hús stærstu trommum landsins og var þar um að ræða loftnetsparabólur, n.k. gervihnattadiskum, sem þeir höfðu fengið frá einhverju fjarskiptafyrirtæki. Hvor um sig um tveir metrar í þvermál og síðan voru þeir með einhver strítulaga fyrrum loftnet sem hljómuðu hvert með sínu laginu þegar barið var á þau. Þetta börðu þeir eins og bongotrommur. Alveg hrikalega töff og flottasta lokaatriði sem hægt var hugsa sér. Fólk stóð alveg með öndina í hálsinum!

Fyrir utan biðu stætóar sem keyrðu þá sem fara vildu niður á Kringlukrá þar sem Geirmundur Valtýsson byrjaði eitthvað upp úr klukkan tíu. Hafði ætlað að byrja ellefu en var til í að byrja fyrr þar sem þessi stóri Orkuveituhópur var mættur á svæðið. Öflugur karlinn.

Ótrúlega sprækur karlinn. Hann tók sér ekki pásu fyrr en milli tólf og eitt. Keyrði semsagt í hátt í tvo og hálfan tíma pásulaust. Var síðan í pásu í kannski 20 mínútur, kom aftur og hélt áfram í rúma tvo tíma til klukkan þrjú. Svona eiga bönd að vera. Glæsileg frammistaða og ótrúlegt úthald.

Var að vanda kófsveittur á dansgólfinu frá fyrsta til síðasta tóns. 5 tímar lágu frá kl. 22 til 03 og rétt skrapp nokkrum sinnum í 7 mínútur af dansgólfinu til að fá mér vatn. Þetta er SVOOO gaman! Unnur mætti með Ástu vinkonu sína sem kann að dansa. Slíkt er náttúrlega gulls ígildi á svona balli og var dansað alveg út í eitt.

Það var því ljúft að leggjast í rúmið sitt um fjögurleytið eftir að hafa keyrt 500 manna partý og 5 klukkutíma á dansgólfinu með Geirmundi. Í dag er maður síðan... tja, myndi nú líklega ekki velja þennan dag til að fara í maraþon en þó væri aldrei að vita ef einhver kæmi og spyrði! ;)

Mættum síðan upp á Bæjarháls í dag til að taka niður og ganga frá.

Djob vell dönn...nú bíður maður bara spenntur eftir sextugsafmælinu!

Allt í gangi! ! !

2005-02-18T15:48:00.000Z

Nú er allt á fullu...

...500-600 manna afmælisveisla starfsmannafélagsins á morgun laugardag. Verður tær snilld! Síðan verður liðinu smalað upp í strætó og brælt á Kringlukránna þar sem meistari Geirmundur mun virkja á okkur svitann fram eftir nóttu.

Ekki hlaupið að því að fara út að skemmta sér með 200 vinum sínum. Hringdi í nokkra skemmtistaði og sagðist vera á leiðinni út að skemmta mér á laugardaginn og ætlaði að taka ca. 200 vini mína með mér. Það voru bara einhverjir örfáir staðir sem gátu tekið við því og enn færri sem ekki voru fullir. Viðskiptatækifæri!

Ætlum að skreyta Orkuveituhúsið hátt og lágt að innan þannig að arkitektinn mun ekki þekkja það sem sama hús. Við erum með heilan birkiskóg í laufgun inni í geymslu og verða trén sett upp á víð og dreif um svæðið, sellófan hæðanna á milli svo aðeins fátt eitt sé nefnt. Þetta á pottþétt eftir að koma verulega á óvart!

Fengum annars þráðlaust net á Hólsveginn í gær. Virkaði ekki alveg nægilega vel. Ákváðum að taka þetta í samvinnu við þá bræður Kidda og Hjört í kjallaranum og hafa tenginguna þeim mun vígalegri. Þetta verður vonandi farið að virka á næstu dögum þannig að við getum tekið í gagnið nýju tölvuna sem þau gömlu hjónin voru að versla sér. Þrusugræja. 3,2 Ghz á móti 300 Mhz (=0,3 Ghz) sem gamla tölvan er. Þetta er semsagt u.þ.b. ellefuföldun á afli síðan 1998. Magnað!

Búið að vera brjálað að gera í kjarasamningaveseni í vikunni. Var á fundum í 9 klukkutíma straight á þriðjudaginn og síðan megnið af deginum bæði á mánudaginn og miðvikudaginn líka. Úff, ótrúlegt hvað maður getur orðið þurrausinn af svona! Síðan er kvöldvinna í því að klára fyrirtækjaskýrslurnar í skoðanakönnuninni.

Já, actionvika í gangi og allt að gerast!

Kraftaverk!

2005-02-15T00:23:00.000Z

Átti leið í gegnum bloggsíðuna hennar Guðrúnar Davíðs áðan. Þau voru að eignast litla prinsessu á fimmtudaginn. Meiriháttar! Þetta er svo stórkostlegt. Hugsið ykkur, lítill einstaklingur verður til. Þetta er svo magnað. Allt í einu birtist bara heilt barn! (Stelpur, svona er þetta frá sjónarhóli okkar strákanna...púff!...undanfarinn er líklega aðeins raunverulegri og áþreifanlegri ykkar megin...).

Man þegar Kristófer fæddist. Var eiginlega ekki að ná gleðinni fyrr en eftir sólarhring eða tvo. Var auðvitað glaður en ég var fyrst og fremst bara uppfullur af rosalega S T Ó R U M tilfinningum. Svo stórum að mér fannst hjartað vera að springa. Þær komust ekki alveg fyrir. Þarna var kominn heill einstaklingur - Vá! - barn - sem að ég átti! Þetta var eitthvað svo yfirþyrmandi...og magnað á sama tíma! Síðan róaðist maður aðeins og fór að njóta augnabliksins. Ferlega merkileg upplifun...svolítið eins og að fara á milli borða í tölvuleiknum, The Life of Siggi. Algerlega nýr heimur, maður hugsar öðruvísi, annað gildismat og...og...og..., allt öðruvísi þó svo maður sé náttúrlega ennþá í sama leiknum....og síðan verður þetta bara skemmtilegra og skemmtilegra eftir því sem þau eldast og verða skemmtilegri og skemmtilegri.

Tær snilld!

--//Sé einhver í vafa bendi ég á albúmið af Kristófer undir linknum myndir hér hægra megin. Þetta er bara skemmtilegt!

Skíði og skemmtilegheit!

2005-02-13T23:50:00.000Z

Fín helgi!

Kláraði nú kannski ekki allt sem ég setti á listann góða hér að neðan en komst þó áleiðis með flest.

Kláraði reyndar djammið...reyndar seinna en ég bjóst við...sem í tilfelli djammsins er gott öfugt við flest annað. Á föstudagskvöldið var semsagt þetta fína kóradjamm þar sem Skátakórinn hitti þrjá aðra kóra - söngur, grín og gleði. Þar vakti mesta athygli kór sem ber nafnið Raddbandafélag Reykjavíkur. Snilldarhópur og ég legg eindregið til að fólk leggi við hlustir þegar þið heyrið það nefnt. Ef þið heyrið af tónleikum með þeim látið mig vita hið snarasta!

Við þurftum hins vegar að yfirgefa húsið um tvöleytið þegar gleðin var rétt að byrja og því var haldið í partý í Kópavoginn til Möggu Blöndal. Glæsilegt teiti, söngur og fínerí... Kom heim um hálf sjö á laugardagsmorguninn. Ákváðum um kvöldið; ég, Palli Viggós, Ásta Bjarney og Ebbi að skella okkur á skíði morguninn eftir. Um tvöleytið var planið að fara um tíu. - Um sexleytið var tímasetningin orðin....tja....einhvern-tímann-upp-úr-hádeginu-bara! Síðan voru skíðasvæðin lokuð á laugardaginn og stefnan sett á sunnudaginn.

Það gekk eftir. Palli var reyndar með hjálparsveitinni í action og Ebbi að vinna en við Ásta, ásamt Sonju frænku hennar og Kolbrúnu, unganum í hópnum, héldum galvösk upp í Skálafell í dag. Nú verð ég að viðurkenna að ég hafði aldrei farið upp í Skálafell áður á skíði. Hef af einhverjum ástæðum alltaf farið upp í Bláfjöll. Þetta var hins vegar frábær dagur, ég á Telemarkinu niður allar hlíðar. Datt ekki nema svona tíu sinnum þannig að ég er tiltölulega sáttur. Er á þeirri skoðun að það séu bara aumingjar sem detta aldrei. Fólk sem ekki tekst á við nægilega krefjandi verkefni!

Svona Telemark-skíðamennska er þvílíkt púl og vöðvarnir framan á lærunum voru algerlega búnir eftir daginn. Hafði vit á því að teygja vel áður en ég fór inn í bílinn, fór í sjóðandi heitt bað í kvöld og bíð nú spenntur eftir því hvort ég verði fær um að ganga á morgun. Spennandi!

Hitti þarna m.a. Maríu Rúnars. sem var með börn ættarinnar í skíðakennslu. Þarf að fara að standa að fimmtudagshádegishittingi hjá HR liðinu. Það er orðið óheppilega langt síðan síðast.

Stefnum á það!

Söngur + Djamm = Söngdjamm!

2005-02-11T17:50:00.000Z

Vitlaust að gera í vinnunni eins og venjulega. Ótrúlegt hvað hægt er að búa til mikið af verkefnum í kringum svona starfsmannahald. Reyndar eru þetta 500-800 hausar eftir árstíðum í 20 stéttarfélögum sem þarf að gera kjarasamninga við hvert og eitt og ...og....og.... en maður verður að hafa eitthvað fyrir stafni! Það er lykilatriði!

Er á leiðinni á djammið í kvöld. Skátakórinn ætlar að hitta nokkra aðra kóra í Valsheimilinu einhvers staðar og verður þar væntanlega sungið og djammað fram eftir nóttu. Glæsilegt! Er alveg til í það.

Skemmtilegur þessi snjór. Þá birtir svo yfir öllu.

Fjögur verkefni fyrir helgina:
1) Klára að útbúa gögn í "Excelskjali dauðans" vegna kjarasamninga við Eflingu
2) Klára fyrirtækjaskýrslurnar úr Verzlókönnuninni góðu
3) Skrifa í gestabækur víðs vegar um heim hvatningarromsu um að mæta á landsmót skáta í sumar
4) Lesa yfir þarfagreiningu vegna starfsmannalista sem setja á upp á www.or.is og verður beintengdur inn í kerfin og voða fínt.
5) Stunda einhverja útiveru - fara á skíði, út að labba eða eitthvað svoleiðis.
...plús náttúrlega djammið í kvöld.

Kemur í ljós hverju mér tekst að ljúka af þessum pakka. Ef þið eruð að spá í útiveru látið þá vita. Ég er til í allt - Alltaf!

Adios Amigos!

Nýja Fiestan virkar vel!

2005-02-10T01:20:00.000Z

Ekki mikið að frétta í dag... nema það að nýja svarta snaggaralega Fiestan mín stendur sig með prýði. Nú er búið að keyra hana hátt í 50 kílómetra og sér ekki á henni. Í kvöld þegar ég skrapp aðeins út sást nú reyndar varla í hana heldur þar sem ég hafði geymt hana úti í dag til að geta kíkt á hana út um gluggann. Það hafði snjóað 10-15 cm ofan á hana þegar ég kom út og ég ekki búinn að fjárfesta í snjósköfu/kúst! Fór og fjárfesti í snjókúst/sköfu. Jæja, hún verður stór og sterk af þessu. Komst að því að snjór er frekar kaldur svona alla vega í þessu magni.

Kvöldið fór annars í vinnu. Kjarasamningaútreikningar sem ég var búinn að ýta á undan mér í einhvern tíma. Skrapp líka á kóræfingu í dag sem var kærkomin útrás á milli verkefna.

Maður ætti kannski að skella sér eitthvað á skíði um helgina. Hvað segið þið um það?

Gaui Sig. og ný Fiesta!

2005-02-09T01:28:00.000Z

Sáuð þið Gauja Sig. og félaga í Ísland í dag í kvöld. Algjör snilld! Það er auðvitað erfitt að segja að eitthvað sem tengist MND sé snilld og vissulega er þetta skelfilegur sjúkdómur en að hlusta á Gauja og vinna með Gauja eins og ég hef fengið tækifæri til að gera er bara algerlega frábært! Æðruleysið, töggurinn og húmorinn eru með ólíkindum svo maður tali nú ekki um miðað við þá stöðu sem hann er í gagnvart þessum skelfilega sjúkdómi. Sama að segja um Höllu og stelpurnar. Þvílík fjölskylda - þvílíkt team! Sjúkdómurinn hefur gert það að verkum að hann er svolítið lengi að tala en maður hefur lært það að það er algerlega þess virði að bíða því yfirleitt kemur eitthvað snilldarpunchline! Alveg æðislegt hvað það er til frábært fólk í þessum heimi.

Jafnskelfilegt að það skuli fá þennan ógurlega sjúkdóm. Það eru svo mikil forréttindi að fá tækifæri til að kynnast svona fólki þótt maður hefði nú viljað að það væri við aðrar aðstæður. Finnist manni eitthvað erfitt eða óyfirstíganlegt þá hugsar maður til Gauja í nokkrar sekúndur og veltir því fyrir sér hvað hann hefði gert í þessari stöðu. Við þetta einhvern veginn gufar vandamálið upp og eftir stendur verkefni til að leysa.

Hvet alla til að leggja inn á reikning hjá MND félaginu. Þú getur jafnvel stillt heimabankann þinn þannig að hann millifæri eitthvað mánaðarlega. Þetta þarf ekki að vera há upphæð, margt smátt gerir eitt stórt, en ég efast stórlega um að þér takist að eyða henni í eitthvað nauðsynlegra eða betra. Fann áðan reikningsupplýsingar á heimasíðu MND félagsins.

Hvet ykkur til að fylgjast með blogginu hans Gauja. Bætti því við hérna á hægri vænginn. Ótrúlega skemmtilegur húmor þótt verið sé að fjalla um eins alvarlega hluti og frekast eru til í þessum heimi.

Fékk nýju Fiestuna afhenta á kvöld. Svona líka falleg...svört og snaggaraleg. Pabbi sagði nú að það væri nú ekkert sérlega skynsamlegt að kaupa svartan bíl. Það sæi svo fljótt á honum skítur. Það gerir það kannski að verkum að ég þvoi oftar bílinn minn!

Athyglisverð annars svona viðskipti. Fékk þarna nýjan bíl og losna við minn gamla án þess að greiða krónu. Slepp reyndar við mánaðarlegu greiðsluna þennan mánuðinn, og byrja því í 20 þús. kr. gróða, því ég byrja ekki að greiða hinn fyrr en um næstu mánaðarmót. Tryggingarnar af þessum eru aðeins 2 þús. kr. hærri en af þeim gamla en mánaðargreiðslurnar ca. 7 þús. krónum hærri. Á móti kemur að bílinn er nýr þannig að viðhald ætti að vera í eins miklu lágmarki og nokkur möguleiki er á ætli maður að eiga bíl yfirhöfuð. Held þetta hafi bara verið nokkuð skynsamlegt...reyni alla vega að telja mér trú um það.

Sakna samt gömlu Fiestunnar minnar. Við vorum vinir. Höfum brallað ýmislegt saman í gegnum tíðina. Frábær bíll og algjör töffari! Þarf að skrifa minningargrein um hana hérna á blogginu einhvern góðan veðurdag. Hún á það skilið.

Skrapp á kóræfingu í kvöld með Skátakórnum. Alltaf jafnskemmtilegt. Erna er frábær kórstjóri. Hefur einstakt lag á því að halda uppi metnaði og aga á æfingum en samt tryggja að aldrei sé langt í hláturinn sem gerir þetta svo skemmtilegt. Hvet fólk til að skella sér í Skátakórinn. Tenórar eru sérstaklega velkomnir. Djamm á föstudaginn. Þá ætla fjórir kórar að hittast, syngja og skemmta sér. Mætum þar með söng og spilerí og ætlum að vera skemmtilegust. Tekst pottþétt!

Semsagt...enn einn skemmtilegur dagur!